ރީޖަނަލް ހޮސްޕިޓަލްތަކަށް ސްޕެޝަލިސްޓް ޑޮކްޓަރުން ތަމްރީނުކުރުމަށް ޚާއްސަ ސްކޮލަރޝިޕްގެ ފުރުސަތުތަކެއް ހުޅަވާލައިފިއެވެ.
މިނިސްޓްރީ އޮފް ހަޔަރ އެޑިއުކޭޝަނުން ހުޅުވާލި ޑޮކްޓަރުން ސްޕެޝަލައިޒްވުމުގެ މި ސްކޮލަރޝިޕްގެ ދަށުން 15 ފުރުސަތު ވަނީ ހުޅަވާލައިފައެވެ. އެގޮތުން ސްޕެޝަލައިޒްވުމަށް 13 ދާއިރާއަކުން ޚާއްސަކޮށްފައިވާ 7 ހޮސްޕިޓަލަކަށް ވަނީ ފުރުސަތު ހުޅުވާލާފައެވެ.
އައްޑޫ އެކުއެޓޯރިއަލް ހޮސްޕިޓަލް
- އެނެސްތީސިއޮލޮޖީ
- އިންޓަރނަލް މެޑިސިން
- އޯތޮޕީޑިކްސް އެންޑް ޓްރޯމާ ސަރޖަރީ
ހުޅުމާލެ ހޮސްޕިޓަލް
- ގޭސްޓްރޯއެންޓްރޮލޮޖީ އެންޑް ހެޕަޓޮލޮޖީ
- މެޑިކަލް އޮންކޮލޮޖީ
ކުޅުދުއްފުށީ ރީޖަނަލް ހޮސްޕިޓަލް
- ގޭސްޓްރޯއެންޓްރޮލޮޖީ އެންޑް ހެޕަޓޮލޮޖީ
- ޕީޑިއޭޓްރިކް ނިއުރޮލޮޖީ
- ނެފްރޮލޮޖީ
ލ. ގަން ރީޖަނަލް ހޮސްޕިޓަލް
- އޮފްތަލްމޮލޮޖީ
- ޑަރމެޓޮލޮޖީ
ޑރ. ޢަބްދުއްޞަމަދު މެމޯރިއަލް ހޮސްޕިޓަލް
- ނިއޯނޭޓޮލޮޖީ
- ޕަލްމޮނޮލޮޖީ
- ނެފްރޮލޮޖީ
ރ. އުނގޫފާރު ރީޖަނަލް ހޮސްޕިޓަލް
މ. މުލި ރީޖަނަލް ހޮސްޕިޓަލް
ކޯހުގައި ބައިވެރިވުމުގެ ޝަރުތުތަކުގެ ތެރޭގައި އެމް.ބީ.ބީ.އެސް ހާސިލްކޮށްފައިވާ މީހަކަށް ވާންޖެހޭނެއެވެ. އަދި މޯލްޑިވްސް މެޑިކަލް އެންޑް ޑެންޓަލް ކައުންސިލްގައި ރަޖިސްޓްރީވެފައިވާ މީހެއްކަމުގައި ވުމާއި، މިނިސްޓްރީ މެދުވެކޮށް ކުރިން ކިޔެވުމަށް ލޯނެއް ނަގަވާފައިވާނަމަ މައްސަލައެއް ނުޖެހި އެ ލޯނެއް ޤަވާއިދުން ދައްކަމުންގެންދާ މީހެއްކަމުގައި ވުން ހިމެނެއެވެ. އަދި ހަމައެއާއެކު ބައިވެރިވާ ކޯހާއި އެއް ފެންވަރެއްގެ ކޯހެއް ދައުލަތުގެ ޚަރަދުގައި މިހާރު ފުރިހަމަ ކުރަމުންގެންދާ މީހެއްކަމުގައި ނުވުމުގެ އިތުރުން ބައިވެރިވާ ކޯހަކީ މިހާރު ފުރިހަމަކޮށްފައިވާ ކޯހަށްވުރެ މަތީ ފެންވަރުގެ ކޯހަކަށްވުންވެސް ހިމެނެއެވެ.
މިފުރުޞަތުތަކަށް މީހުން ހޮވުމުގައި މިނިސްޓްރީން އެންމެ ފުރަތަމަ އިސްކަންދޭނީ ކުރިމަތިލާފައިވާ ހޮސްޕިޓަލްގައި މަސައްކަތްކުރާ ޑޮކްޓަރުންނަށް ނަމަވެސް އެހޮސްޕިޓަލަށް ހުޅުވާލާފައިވާ ފުރުޞަތުގެ ޢަދަދަށްވުރެ ގިނަ ފަރާތްތަކުން ކުރިމަތިލާފައިވާނަމަ ދެން އިސްކަންދެވޭނީ، އެފަރާތަކުން އެމް.ބީ.ބީ.އެސް ހެދުމަށްފަހު އެ ހޮސްޕިޓަލްގައި ޚިދުމަތް ކޮށްފައިވާ މުއްދަތަށް ބަލާފައިކަމަށް މިނިސްޓްރީން ވިދާޅުވެއެވެ. އަދި ޚިދުމަތުގެ މުއްދަތު އެއްވަރުވެއްޖެނަމަ ކެންޑިޑޭޓުން ހޮވާނީ އެކަޑަމިކް މެރިޓަށް ޕޮއިންޓްދީގެން އެންމެ މަތިން ޕޮއިންޓް ލިބޭ ތަރުތީބުންކަމަށްވެސް މިނިސްޓްރީން ވިދާޅުވެއެވެ.
ސްކޮލަރޝިޕްތަކުގައި ކިޔެވުމަށް ހިނގާ ހުރިހާ ޚަރަދެއް ދިވެހި ސަރުކާރުގެ ފަރާތުންކުރާގޮތަށް ވަނީ ހަމަޖެހިފައެވެ. އޭގެ ތެރޭގައި ދެކޮޅު ޓިކެޓް، ސްޓައިޕެންޑް، ބުކް އެލަވަންސް، ކޯސް ފީ، އެސްޓަބްލިޝްމަންޓް އެލަވަންސް، ޑިޕާޗަރ އެލަވަންސް އަދި އިންޝުއަރެންސްގެ އިތުރުން ވިސާ ޚަރަދުވެސް ހިމެނެއެވެ.
މި ސްކޮލަރޝިޕްގެ ފުރުޞަތުތަކަށް ހޮވޭ މީހުން ހޮވޭކަން އަންގާ ތާރީޚުން ފެށިގެން 10 މަސް ދުވަހުގެ ތެރޭގައި ކިޔެވުން ފަށަން ޖެހެއެވެ. އެ މުއްދަތުގައި ކިޔެވުން ނުފަށައިފިނަމަ ސްކޮލަރޝިޕް ކެންސަލް ކުރުމުގެ އިޚްތިޔާރު މިނިސްޓްރީއަށް ލިބިގެންވެއެވެ. އަދި އެ މުއްދަތުގެ ތެރޭގައި ޕްލޭސްމަންޓް ހޯދަން އެކަށީގެންވާ މަސައްކަތެއް ނުކުރާނަމަ ސްކޮލަރޝިޕް އަމިއްލައަށް ދޫކޮށްލީކަމަށް ބެލެވޭނެއެވެ. އަދި ކޯސް ފުރިހަމަ ނުކުރާނަމަ ކޯހަށް ކޮށްފައިވާ ޚަރަދު މިނިސްޓްރީއިން ކަނޑައަޅާ ގޮތެއްގެ މަތީން އަނބުރާ ދައްކަންޖެހޭނެއެވެ.
ކޯހަށް ހޮވިއްޖެކަން މިނިސްޓްރީން އަންގާފަހުން ކޯސް ދޫކޮށްލައިފިނަމަ، "މަތީތަޢުލީމާއި ތަމްރީނު ހާސިލުކުރުމަށް ލިބޭ ފުރުޞަތުގެ ބޭނުން ނުހިފައި ދޫކޮށްލާ ފަރާތްތަކާ މެދުގައްޔާއި ޚިދުމަތް ނުކުރާ ފަރާތްތަކާމެދު ޢަމަލުކުރާނެ ގޮތުގެ އުޞޫލު" ގައިވާ ގޮތުގެ މަތިން ފިޔަވަޅު އަޅާނެއެވެ.
ސްކޮލަރޝިޕަށް އެދި ހުށަހެޅުމުގެ ސުންގަޑިއަކީ 7 އޭޕްރީލް 2022 ވާ ބުރާސްފަތި ދުވަހުގެ 12:30ގެ ކުރިންނެވެ. އެޕްލިކޭޝަން ހުށަހަޅުއްވާނީ ޕޯޓަލް މެދުވެރިކޮށެވެ.