ރާއްޖޭގެ ކަނޑު ފަޅުތައް ބޭނުންކުރާ ގޮތްތައް ދެމެގަތުމަށް ކުރިއަށްގެންދާ "އޯޝަން ޔޫސް ސަރވޭ"އަށް، މިފަދަ ސަރވޭތަކަށް މީގެކުރިން ނުލިބޭފަދަ ބޮޑު ތަރުޚީބެއް ލިބެމުންދާކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.
ދިވެހިރާއްޖޭގެ މެރިން ސްޕޭޝަން ޕްލޭން އެކުލަވާލުމަށް އެހީވުމަށް ކުރިއަށްގެންދާ މި ސަރވޭއަކީ ސީދާ ރައީސުލްޖޫހުއްރިއްޔާގެ އޮފީހުގެ ބެލުމުގެ ދަށުން ކުރިއަށްގެންދާ މިފަދަ ފުރަތަމަ ސަރވޭއެކެވެ. ބައިނަލްއަޤްވާމީ ޖަމިއްޔާއެއްކަމާވާ "ބްލޫ ޕްރޮސްޕެރިޓީ ކޯލިޝަން"އާއި ގުޅިގެން ރާއްޖޭގެ ކަނޑުފަޅުގެ ސަރވޭ ފެށީ 2020ވަނަ އަހަރުއެވެ. މި ސަރވޭގެ ތެރެއިން މިއަހަރު ފަށާފައިވަނީ، ރާއްޖޭގެ ކަނޑު ފަޅާއި އަދި ރަށްރަށުގެ މިފަދަ ސަރަޙައްދުތައް ބޭނުންކުރަމުންދާ ގޮތާއި ގުޅޭ "އޯޝަން ޔޫސް ސަރވޭ"އެވެ.
ރައީސް އޮފީހުން ވިދާޅުވީ މިހާތަނަށް ސަރވޭއަށް ބޮޑުތަރިޚީބެއް ލިބިފައިވާކަމަށެވެ. ވޭތުވެދިޔަ 3 މަސްދުވަހުގެ ތެރޭގައި ނޫ ރާއްޖޭގެ 18 ފެސިލިޓޭޓަރުން ރާއްޖޭގެ އެކި ސަރަޙައްދުތަކުގައި ހަރަކާތްތެރިވިއެވެ. އެގޮތުން ސަރވޭގެ ދެބައިކުޅަ އެއްބަޔާއި ހަމައަށް އައިއިރު 16 އަތޮޅަކުން 7500 މީހުން ރަމްޒުކޮށްދޭ 1900 ގިނަ ފަރާތުން ސަރވޭގައި މަޢުލޫމާތު ހިމަނާފައިވާކަމަށެވެ.
ސާރވޭއިން މަސްވެރިންނާއި، އަމިއްލަ ފަރުދުންނާއި، ފަތުރުވެރިކަމުގެ ދާއިރާއާއި އަދިވެސް އެހެނިހެން ދާއިރާތަކުގައި މަސައްކަތްކުރާ މީހުން ކަނޑުފަޅުގެ ސަރަޙައްދު ބޭނުންކުރާ ގޮތް ދެނެގަންނަމުންދެއެވެ.
މި ސަރވޭގައި އަތޮޅުތަކުގައި ހުރި އެކި ސަރަޙައްދުތަކުގެ ތެރެއިން، މަސްވެރިކަމާއި ފީނުމާއި ޑައިވް ސައިޓްތަކާއި، ދަތުރުދިއުމާއި، ކަނޑުފަޅާއި ގުޅޭ އެހެނިހެން ހަރަކާތްތަކަށް ބޭނުންކުރަމުންދާ ސަރަޙައްދުތައް ފާހަގަކުރުން ހިމެނެއެވެ.
ދިވެހިރާއްޖޭގެ އާބާދީގެ 71 އިންސައްތަ މީހުން އާމްދަނީ ހޯދުމަށް ބަރޯސާވަނީ ރާއްޖޭގެ ކަނޑުފަޅުތަކަށެވެ. ސަރވޭގެ މަޤުޞަދަކީ މުޖުތަމަޢުގެ ބައިވެރިވުމާއެކު ދިވެހިރާއްޖޭގެ މެރިން ސްޕެޝަލް ޕްލޭން އެކުލަވާލައި، ސަރުކާރުގެ ނޫ އިޤްތިސާދުގެ ތެރެއިން ދެމެހެއްޓެނިވި މަސްވެރިކަމާއި ފަތުރުވެރިކަން ކުރިއެރުވުމަށް ކުރާ މަސައްކަތަށް އެހީވުމެވެ. އަދި ރާއްޖޭގެ އިޤްތިޞާދީ ކަނޑުގެ ސަރަހައްދުގެ 20 އިންސައްތައަކީ ހިމާޔަތްކުރެވިފައިވާ ސަރަޙައްދުތަކަކަށް ހެދުމަށް ސަރުކާރުން ކަނޑައަޅާފައިވާ އަމާޒަށް ވާސިލްވުމަށްޓަކައި، ހިމާޔަތް ކުރެވިދާނެ ކަނޑުފަޅުގެ ސަރަހައްދުތައް ދެނެގަތުންވެސް ހިމެނެއެވެ.
މި ސަރވޭގައި ބައިވެރިވުމުގެ ފުރުޞަތު ކޮންމެ މީހަކަށްވެސް ވަނީ ހުޅުވާލާފައެވެ. އެގޮތުން ސަރވޭ ޓީމް މެދުވެރިކޮށްް އަދި އޮންލައިންކޮށް www.nooraajje.org/oceanusesurvey މެދުވެރިކޮށްވެސް ސަރވޭގައި ބައިވެރިވެވޭގޮތަށް ވަނީ ހުޅުވާލާފައެވެ.
ނޫ ރައްޖެއަކީ ސަރުކާރުގެ ވަރަށް ގިނަ މުއައްސަސާތަކެއް ގުޅިގެން ހިންގާ ޕްރޮގްރާމެކެވެ. އެގޮތުން ރައީސުލްޖުމްހޫރިއްޔާގެ އޮފީހާއި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ އިސްނެގުމާއެކު މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މިނިސްޓްރީ އޮފް އިކޮނޮމިކް ޑިވެލޮޕްމަންޓް، މިނިސްޓްރީ އޮފް ޓޫރިޒަމް، އެންވަޔަރަންމަންޓަލް ޕްރޮޓެކްޝަން އޭޖެންސީ، އަދި މޯލްޑިވްސް މެރިން ރިސަރޗް އިންސްޓިޓިއުޓް މި ޕްރޮގްރާމްގައި ބައިވެރިވެއެވެ.