'ފަސްގަނޑު'ގެ ނަމުގައި ކުނި މެނޭޖްކުރުމުގެ ގައުމީ ކެމްޕޭނެއް ފެށުމަށް އެންވަޔަރަމަންޓް މިނިސްޓްރީން ނިންމައިފިއެވެ. މިކެމްޕެއިން އިފްތިތާޙުކުރުން އޮންނާނީ މާދަމާ، އެކަމަށްޓަކާ ބާއްވާ ޚާއްސަ ރަސްމިއްޔާތެއްގައެވެ.
މިކެމްޕެއިނަކީ ދެމެހެއްޓެނިވިގޮތުގައި ކުނި މެނޭޖްކުރުމާގުޅޭ ހޭލުންތެރިކަން އިތުރުކުރުމަށް މުޅި ރާއްޖެ ހިމެނޭހެން ޤައުމީ ފެންވަރުގައި ކުރިއަށްގެންދަން ނިންމާފައިވާ މަސައްކަތެކެވެ.
އެންވަޔަރަމަންޓް މިނިސްޓްރީން ވިދާޅުވީ ދިވެހިރާއްޖޭގެ ރަށްތަކަށް މިވަގުތު ދިމާވެފައިވާ ތިމާވެށީގެ އެންމެ ބޮޑު މައްސަލައަކީ ރަށްތަކުގައި އުފެދޭ ކުނި އެކަށީގެންވާ ގޮތެއްގައި މެނޭޖްކުރުމަށް ދިމާވާ ދަތިތަކުގެ މައްސަލަކަމަށެވެ. ގުދުރަތީގޮތުން ރާއްޖެ އުފެދިފައި އޮތް ގޮތުގެ ސަބަބުން، ކުނި މެނޭޖްކުރުމަށް ގިނަ ގޮންޖެހުންތަކެއް ރަށްރަށަށް ކުރިމަތިވަމުންދާކަމަށް އެމިނިސްޓްރީން ވިދާޅުވެއެވެ.
މި ކެމްޕެއިންގެ ދަށުން ދެމެހެއްޓެނިވި ގޮތެއްގައި ކުންޏާއި ވަޞީލަތްތައް މޭނޭޖްކުރުމާއި، މި މުހިންމު މަސައްކަތް ރާވާ ހިންގުން އިތުރަށް ހަރުދަނާކުރުމަށް ދިރާސާކުރެވޭނެއެވެ. އަދި ޢާންމު ރައްޔިތުންނަށް އަމާޒުކުރެވިގެން ކެމްޕެއިން ފަރުމާކޮށް، ޕްލޭންތަކެއް އެކުލަވާލެވި، މި ކެމްޕެއިން ތަންފީޒުކުރުމަށް ބޭނުންވާ "ފަސްގަނޑު" ނުވަތަ ޓޫލްކިޓްވެސް މިހާރު ވަނީ މިނިސްޓްރީގެ ފަރާތުން ތައްޔާރުކޮށްފައެވެ.
ހޯމަދުވަހު އިފްތިތާޙު ކުރެވޭ 'ފަސްގަނޑު' ގައުމީ ކެމްޕޭނަކީ ފަރުދީ ފެންވަރުން ފެށިގެން ރަށު ފެންވަރުގައި، ސަރަޙައްދީ އަދި ގައުމީ ފެންވަރުގައި ކުންޏާއި ވަޞީލަތްތައް މެނޭޖްކުރުން މިހާރަށްވުރެ ހަރުދަނާކުރުމަށް ކުރިއަށް ގެންދިއުމަށް ހަމަޖެހިފައިވާ ކެމްޕޭނެކެވެ.
ކުނި މެނޭޖްކުރެވޭނެ ވަސީލަތްތައް ރަށްރަށުގައި ނެތުމާއި، އަދި ކުނި ފަރުބަދަތައް އުފެދި އެ ކުނި ރަށުން ބޭރުކުރެވޭނެ ގޮތެއް ނެތި އޮތް އެތައް ރަށެއް ރާއްޖޭގައި އެބައޮތެވެ.
ސަރުކާރުގެ ވިސްނުން ހުރީ ރަށު ފެންވަރުގައި މެނޭޖްކުރެވޭ ކުނި، ރަށްރަށުގައި މެނޭޖްކޮށް، އަދި ބައެއް ކަހަލަ ބާވަތްތައް ސަރަޙައްދީ މެނޭޖްމަންޓް ފެސިލިޓީތައް ޤާއިމުކޮށް އެތަންތަނުން މެނޭޖްކުރުމެވެ.