ޖަޕާނު ސަރުކާރުގެ ހިލޭ އެހީގެ ދަށުން އއ.ބޮޑުފުޅަދޫ ސިއްޙީ މަރުކަޒުގައި ހެދި އާ ޢިމާރާތާއި އެތަނުގެ ޚިދުމަތް ރަސްމީކޮށް ސިއްޙީ މަރުކަޒާއި ޙަވާލުކޮށްފިއެވެ.
މިމަޝްރޫޢަކީ ބޮޑުފުޅަދޫ ކައުންސިލާއި އެރަށު ޖަމިއްޔާއެއްކަމަށްވާ އެސޯސިއޭޝަން ފޮރ އެވެެއާނެސް، ރެކްރިއޭޝަން އެންޑް ޔުނިޓީ ގުޅިގެން ޖަޕާނު ސަރުކާރުގެ ހިލޭ އެހީގައި ކުރިއަށްގެންދިޔަ މަޝްރޫޢެކެވެ. ބޮޑުފުޅަދޫ ސިއްޙީ މަރުކަޒުން ވިދާޅުވާގޮތުގައި މިމަޝްރޫޢުގެ ދަށުން އެމަރުކަޒުގައިވަނީ އައު ލެބޯޓްރީއާއި، ލޭބަރ ރޫމާއި، ވޯޑެއް އިތުރުކޮށްފައެވެ. އަދި ޢިމާރާތަށް އަލަށް ގެނެވުނު ބަދަލާއެކު ސިއްޙީ މަރުކަޒުގެ ޚިދުމަތްތައް ހަރުދަނާވެ އިތުރަށް ފުޅާވެގެންދާނެކަމަށް އެމަރުކަޒުން ފާހަގަކުރެއެވެ.
ބޮޑުފުޅަދޫ ސިއްޙީ މަރުކަޒުގައި ބޭއްވި ޚާއްސަ ރަސްމިއްޔާތެއްގައި މިނިސްޓަރ އޮފް ސްޓޭޓް ފޮރ ހެލްތް އަޙްމަދު އާދިލާއި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރީވަނީ ބައިވެރިވެވަޑައިގަންނަވާފައެވެ. އަދި އެރަށު ކައުންސިލާއި ސިއްޙީ މަރުކަޒުގެ އިސްބޭފުޅުންވެސް މިރަސްމިއްޔާތުގައިވަނީ ބައިވެރިވެވަޑައިގަންނަވާފައެވެ.
އަތޮޅުތެރޭގެ ސިއްޙީ ޚިދުމަތުގެ ފެންވަރު މަތިކޮށް ހުރިހާ ޚިދުމަތެއް ހޯދުމަށް މާލެއަށް ބަރޯސާވެފައި އޮތް ނިޒާމު ބަދަލުކުރުމަކީ ސަރުކާރުގެ މުހިއްމު ސިޔާސަތެކެވެ. މީގެ ދަށުން އަޅާނުލެވި އެތައް ދުވަހެއްވެފައިވާ ސިއްޙީ މަރުކަޒުތަކާއި ހޮސްޕިޓަލް ޢިމާރާތްތައް ތަރައްްޤީކޮށް އިތުރު ޚިދުމަތްތައް ރަށްރަށުގެ ސިއްޙީ ފަރުވާދޭ ތަންތަނުގައި ޤާއިމުކުރުމަކީ ސަރުކާރުން ޚާއްސަ އިސްކަމެއް ދެއްވައިގެން ކުރިއަށްގެންދަވާ މަސައްކަތެކެވެ. މިގޮތުން ކުރިއަށްގެންދާ އެކިއެކި މަޝްރޫޢުތަކުގައި ރާއްޖެއަށް އެކި ގޮތްގޮތުން އެހީވާ އެއްޤައުމުގެ ގޮތުގައި ޖަޕާން ހިމެނެއެވެ. ޖަޕާނު ސަރުކާރުގެ އެހީ ރާއްޖޭގެ ސިއްޙީ ދާއިރާގެ އިތުރުން ތަޢުލީމީ ދާއިރާ ހަރުދަނާކުރުމާއި ދިފާޢީ ޚިދުމަތް ފުޅާކުރުމަށްވެސް އަންނަނީ ލިބެމުންނެވެ.