މާލެ ސަރަޙައްދާ އަތޮޅުތަކުގެ ކުނި މެނޭޖްކުރުމުގެ މުހިންމު ދެ މަސައްކަތެއް ވެމްކޯއާއި ހަވާލުކޮށްފިއެވެ.
އެގޮތުން ތިލަފުށީގައި ޒަމާނީ ފެންވަރުގެ ރީޖަނަލް ވޭސްޓް މެނޭޖްމަންޓް ސެންޓަރެއް ތަރައްޤީކޮށް "ވޭސްޓް އެކްސެޕްޓަންސް އެންޑް ޕްރީ ޓްރީޓްމަންޓް އޭރިއާ"ގެ މަސައްކަތް ނިމި، މިފެސިލިޓީ ހަވާލުކުރުމުގެ ގޮތުން ވެމްކޯއާއި މިނިސްޓްރީ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާއި ދެމެދު މިވަނީ ސޮއިކޮށްފައެވެ. މިއީ އެންވަޔަރަމަންޓް މިނިސްޓްރީއިން އޭ.ޑީ.ބީ ގެ ހިލޭ އެހީ އާއި އެކު ކުރިއަށްގެންދާ "ގްރޭޓަރ މާލެ އެންވަޔަރަންމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓް"ގެ ދަށުން ކުރިއަށްގެންދިޔަ މަސައްކަތެކެވެ.
ރީޖަނަލް ވޭސްޓް މެނޭޖްމަންޓް ސެންޓަރެއް ތަރައްޤީކޮށް "ވޭސްޓް އެކްސެޕްޓަންސް އެންޑް ޕްރީ ޓްރީޓްމަންޓް އޭރިއާ"ގެ މަސައްކަތް ނިމި، މި ފެސިލިޓީގެ މަސައްކަތަށް ބޭނުންވާ ވެހިކަލް އާއި މެޝިނަރީވެސް ވަނީ މި މަޝްރޫއުގެ ދަށުން ގެނެސް އިންސްޓޯލްކޮށްފައެވެ.
މީގެ ސަބަބުން ތިލަފުއްޓަށް ބާލާ، ކުނި ވަކިކޮށް މެނޭޖްކުރުމުގައި ލުއިފަސޭހަތައް ލިބިގެންދާނެއެވެ.
މީގެއިތުރުން ކ. އަދި ވ. އަތޮޅުގެ ބައެއް ރަށްރަށުގައި ގިނަ ދުވަސްވެ އުކާނުލެވޭ ކުނި، މެނޭޖްކުރުމަށްވެސް ވެމްކޯއާއި މިނިސްޓްރީއާ ދެމެދުވަނީ އެއްބަސްވުމަކަށް އައިސްފައެވެ. މިއީ މިނިސްޓްރީއިން ފަށާފައިވާ "ލެގަސީ ވޭސްޓް ޕްރޮޖެކްޓް"ގެ ދަށުން ޤާއިމުކުރި އެއްބަސްވުމެކެވެ.
ވެމްކޯއާ ހަވާލުކޮށްފައިވަނީ މި ދެ އަތޮޅުގެ 8 ރަށަކުން ކުނި ނެގުމުގެ މަސައްކަތެވެ. އެއީ ކ.ގުރައިދޫ، މާފުށި އަދި ގުޅި މި ތިން ރަށާއި، ވ.ރަކީދޫ، ކެޔޮދޫ، ފެލިދޭ، ތިނަދޫ އަދި ފުލިދޫގެ ކުނި މެނޭޖްކުރުމެވެ. މި އެއްބަސްވުމާއެކީ ވެމްކޯއިން މި ރަށްރަށުން ދެމެހެއްޓެނިވި ގޮތުގައި ދިގު މުއްދަތަކަށް ކުނި މެނޭޖްކުރުން ކުރިއަށްގެންދާނެއެވެ.
މިއެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޯޖީގެ ޑެޕިއުޓީ މިނިސްޓަރ މުހައްމަދް އަންސަރުއެވެ. އަދި ވޭސްޓް މެނޭޖްމަންޓް ކޯޕަރޭޝަން ލިމިޓެޑްގެ ފަރާތުން ސޮއިކުރެއްވީ ޑެޕިއުޓީ މެނޭޖިންގް ޑިރެކްޓަރ ޔޫސުފް ސިރާޖްއެވެ.