ކަރަންޓަކީ އަސާސީ ޙައްގެކެވެ. އެހެންނަމަވެސް މީގެ ވިއްސަކަށް އަހަރުކުރިއާ ޖެހެންދެންވެސް ރާއްޖޭގެ ބައެއް ރަށްރަށުގައި އަސާސީ މި ޙައްގު 24 ގަޑިއިރު ލިބޭކަށް ނެތެވެ. އެކި ދުވަސްވަރު އެކި ގޮތްގޮތަށް ޚިދުމަތް ދޭ ގަޑިތަކަށް ބަދަލު އައިނަމަވެސް އިންޖީނުގެއަކީ ސީދާ ރައްޔިތުން ހިންގަމުން އައި "ރައްޔިތުންގެ އިންޖީނުގެ"އެވެ. މިޙައްގު ކަށަވަރުކޮށްދޭން އެކި ސަރުކާރުތަކުން މަސައްކަތް ކުރިނަމަވެސް މީގެ ކުރިން އެކަން ކަށަވަރުކުރެވޭގޮތް އޮތީ ނުވެފައެވެ. މިއަދު މިވަނީ އެއީ މާޒީއަށްވެ ރަށްރަށުގައި ހުރި ހުރިހާ އިންޖީނުގެއަކީ ސަރުކާރުން ހިންގާ ބަލަހައްޓާ ތަންތަނަށް ބަދަލުވެގެން ގޮސްފައެވެ.
ރަށްރަށުގައި ޤާއިމުކޮށްފައިވާ އިންޖީނުގެތަކުގެ ތެރެއިން އެންމެ ފަހުން ސަރުކާރާ ޙަވާލުކޮށްފައިވަނީ ރ.އުނގޫފާރު އިންޖީނުގެއެވެ. ރ.އުނގޫފާރުގައި ބޭއްވި ޚާއްސަ ރަސްމިއްޔާތެއްގައި އުނގޫފާރުގައި ޒަމާނުއްސުރެ ބޭނުންކުރަމުންދިޔަ ރައްޔިތުންގެ އިންޖީނުގެ ފެނަކަ ކޯޕަރޭޝަނާއި ޙަވާލުކޮށްފައިވަނީ އުނގޫފާރު ކައުންސިލްގެ ރައީސް ޢަބްދުﷲ ރަޝީދެވެ. ފެނަކައިގެ ފަރާތުން އިންޖީނުގެއާއި ޙަވާލުވީ މެނޭޖިންގ ޑިރެކްޓަރ އަޙްމަދު ސައީދު މުޙައްމަދެވެ. މިއާއެކު މިގޮތަށް ޤާއިމުކޮށްފައިވާ ހުރިހާ ރައްޔިތުންގެ އިންޖީނުގެތައް ސަރުކާރުގެ ބެލުމުގެ ދަށަށް ބަދަލުކޮށް ނިމުނީއެވެ. މިއީ އެމްޑީޕީގެ ސަރުކާރުގައި 2008 ވަނަ އަހަރު ފަށާފައިވާ ކޮންސެޕްޓެއް ނަމަވެސް ސަރުކާރު ބަދަލުވުމާއެކު ހުއްޓިފައި އޮތް މަޝްރޫޢެއްކަމަށް ސަރުކާރުން ވިދާޅުވެއެވެ. އެހެންނަމަވެސް 2018 ވަނަ އަހަރު އަލުން މިމަޝްރޫޢުގެ މަސައްކަތް ފަށާ ވޭތުވެގެންދިޔަ 4 އަހަރުގެތެރޭގައި ހުރިހާ ރަށެއްގެ އިންޖީނުގެތައްވަނީ ފެނަކައިގެ އިތުރުން ސްޓެލްކޯގެ ބެލުމުގެ ދަށަށް ބަދަލުކުރެވިފައެވެ.
ރ.އުނގޫފާރު ރައްޔިތުންގެ އިންޖީނުގެ ފެނަކައިގެ ދަށަށް ބަދަލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އެންވަޔަރަމަންޓް މިނިސްޓަރ އާމިނަތު ޝައުނާ ވިދާޅުވީ ފެނަކައިގެ ދަށަށް އިނޖީނުގެ ބަދަލުވުމަކީ ޚިދުމަތް އިތުރަށް ފުރިހަމަވެގެންދާނެކަމެއްކަމަށެވެ. މީގެ އިތުރުން ސަރުކާރުން އިޔާދަކުރަނިވި ހަކަތައަށް ބަދަލުވުމަށް ކުރަމުންދާ މަސައްކަތް އިތުރަށް ހަލުއިވެގެންދާނެކަމެއްގެ ގޮތުގައި މިނިސްޓަރ ފާހަގަކުރެއްވިއެވެ. މީގެ ސަބަބުން މުޅި ދައުލަތުން ހަކަތަ އުފެއްދުމަށް ތެލަށް ކުރާ ހޭދަ ވަރަށް ބޮޑަށް ކުޑަކުރެވިގެންދާނެ ކަމަށްވެސް މިނިސްޓަރ ޝައުނާ ވިދާޅުވިއެވެ.
"އިޔާދަކުރަނިވި ހަކަތައަށް ބަދަލުކުރުމުން ދައުލަތުން އުފުލާ މާލީ ބުރަ ވަރަށް ބޮޑަށް އެބަ ކުޑަކޮށްދޭ. އެފައިސާއަކީ އަޅުގަނޑުމެންގެ ސިއްޙަތަށާއި ތަޢުލީމީ ދާއިރާއަށް ޚަރަދުކުރެވޭނެ ފައިސާ. އެހެންވީމަ ހަކަތައަކީ ސީދާ ތަރައްޤީއާއި ގުޅިފައިވާކަމެއް." މިނިސްޓަރ ޝައުނާ ވިދާޅުވިއެވެ.
މިރަސްމިއްޔާތުގައި ވާހަކަފުޅު ދައްކަވަމުން އުނގޫފާރު ކައުންސިލްގެ ރައީސް ޢަބްދުﷲ ރަޝީދު ވިދާޅުވީ ރައްޔިތުންގެ އިންޖީނުގެ ބެލެހެއްޓުމުގައި މީގެކުރިން ދަތިތަކެއް ނެތްނަމަވެސް ބޭރުގެ ބޮޑެތި ޤައުމުތަކުގައި ހިނގަމުންދާ ހަމަނުޖެހުންތަކުގެ ސަބަބުން ތެލަށް ކުރާ ހޭދަ ބޮޑުވެ ކައުންސިލަށް ކުޅަދާނަވާ މިންވަރަށްވުރެ ޚަރަދު ބޮޑުވެ ދެކޮޅު ނުޖެހޭކަމަށެވެ.
"ރަޝިޔާއާއި ޔޫކްރެއިންގެ ހަނގުރާމައިގެ ސަބަބުން ތެލުގެ އަގު މައްޗަށްވަނީ ގޮސްފައި. މީގެ ކުރިން 10 ރުފިޔާއަށް އިންޖީނުގެއިން ގަތް ތެޔޮއް ލީޓަރެއް މިހާރު މިލިބެނީ 22 ރުފިޔާއަށް. މިއީ ކައުންސިލަށް އުފުލޭނެ ބުރައެއް ނޫން. އަޅުގަނޑުމެން މަސައްކަތްކުރިން ކައުންސިލްއަށް ސަބްސިޑީ އެއް ދީގެން މިކަން ކުރެވޭތޯ. އެކަމަކު އުސޫލު އޮތީ އެހެން ނޫންވީމަ މިއަދު މިޚިދުމަތް ރައްޔިތުންނަށް ދޭން މިޖެހެނީ ފެނަކައާއި ހަވާލުކުރަން." ކައުންސިލްގެ ރައީސް ވިދާޅުވިއެވެ.
އުނގޫފާރުގައި އެންމެ ފުރަތަމަ އިންޖީނުގޭގެ ޚިދުމަތް ފެށިއިރު ޚިދުމަތް ދެމުން އައީ 2 ގަޑިއިރަށެވެ. އޭގެފަހުން 12 ގަޑިއިރަށް ޚިދުމަތް ދެމުން އައުމަށްފަހުން 24 ގަޑިއިރަށް ޚިދުމަތް ބަދަލުވީ 2006 ވަނަ އަހަރުއެވެ. އެގެފަހުން ޚިދުމަތް ދެމުން އައީ ރައްޔިތުންގެ އިންޖީނުގޭގެ ނަމުގައި ކައުންސިލުންނެވެ. 21 މުވައްޒަފުންނާއެކު ޚިދުމަތް ދެމުން އައުމަށްފަހު ޚިދުމަތް ފެނަކަ ކޯޕަރޭޝަނަށް މިހާރު މިވަނީ ބަދަލުވެފައެވެ. ޚިދުމަތް ބަދަލުވުމާއެކު މުވައްޒަފުންނަށްވަނީ ފެނައިގެ ވަޒީފާއަށް ބަދަލުވި ކަމުގެ ލިޔުން ޙަވާލުކޮށްފައެވެ.
ފެނަކައާއި އިންޖީނުގެ ހަވާލުވިއިރު އުނގޫފާރުގެ އިންޖީނުގޭގެ ކެޕޭސިޓީއަކީ 4 ޖަނަރޭޓަރު ސެޓުން އުފައްދާ 2.9 މެގަވޮޓެވެ. ޚިދުމަތް ބަދަލުވުމާއެކު ފެނަކައިންވަނީ ބުދަދުވަހު އުނގޫފާރަށް އިތުރު 800 މެގަވޮޓުގެ ޖެނަރޭޓަރު ސެޓެއް ގެނެސްފައެވެ. މިއާއެކު އުނގޫފާރުގެ ކަރަންޓު ކެޕޭސިޓީއަކީ 3.7 މެގަވޮޓެވެ. އަލަށް ގެނެވުނު ޖަނެރޭޓަރު ސެޓު ބެހެއްޓުމާއި ނެޓްވޯކް އަޕްގްރޭޑުކުރުމަށް 55 މިލިއަން ޚަރަދުކުރުމަށް ހަމަޖެހިފައިވާ ކަމަށް ފެނަކައިން ވިދާޅުވެއެވެ.