ވޯލްޑް ކްލީންއަޕް ޑޭގެ ހަރަކާތުގައި ބައިވެރިވެ، ވެމްކޯގެ މުވައްޒަފުންނާއެކު ޕީއެސްއެމްގެ މުވައްޒަފުން މާލޭގެ ބައެއް ސަރަޙައްދުތައް ސާފުކޮށްފިއެވެ.
ވޯލްޑް ކްލީޕްއަޕް ޑޭއަކީ، ވެށި ސާފުކޮށް ކުންޏާ ދެކޮޅަށް އެންމެން ނިކުމެ މަސައްކަތްކުރާ ދުވަހުގެ ގޮތުގައި ބައިނަލްއަޤްވާމީ ގޮތުން ފާހަގަކުރާ ދުވަހެކެވެ.
ވެށި ސާފުކުރުމުގެ ހަރަކާތްތައް ވަރަށްފޯރިއާއެކު ރާއްޖޭގެ ހުރިހާ ކަންކޮޅުތަކުގައި ވަނީ ކުރިއަށްގެންގޮސްފައެވެ. ސަރުކާރުގެ މުއައްސަސާތަކާއި، ސަރުކާރު ޙިއްސާވާ ކުންފުނިތަކާއި ޖަމްޢިއްޔާތައް ގުޅިގެން، ވެށި ސާފުކުރުމުގެ ގިނަ ޙަރަކާތްތަކެއްވަނީ ބާއްވާފައެވެ.
މިއަހަރުގެ ހަރަކާތުގައި ޕަބްލިކް ސަރވިސް މީޑިއާ، ޕީއެސްއެމްގެ މުވައްޒަފުންވެސް ބައިވެރިވެ، މާލޭގެ ބައެއް ސަރަޙައްދު ވަނީ ސަފުކޮށްފައެވެ. ވެމްކޯގެ މުވައްޒަފުންނާއެކު ނިކުމެ، މާލޭގެ ގާކޮށި ފްލެޓް ސަރަޙައްދާ އަދި ދިވެހިރާއްޖޭގެ އަޑު ކައިރި، ބައެއް ހިސާބުތައްވަނީ ސާފުކޮށްފައެވެ.
މިކަމުގައި ޕީއެސްއެމްގެ މެނޭޖިން ޑިރެކްޓަރ އަލީ ޚާލިދުގެ އިތުރުން ގިނަ އަދަދެއްގެ މުވައްޒަފުން ބައިވެރިވިއެވެ. ހަރާކަތް ކުރިއަށްގެންދިޔައީ، މަގުމަތި ސާފުކުރުމުގެ މަސައްކަތުގައި އުޅޭ ވެމްކޯގެ މުވައްޒަފުންނާ އެކުގައެވެ. އެގޮތުން ބައެއް ހިސާބުތަކުގައި ޖަމާވެފައި ހުރި ކުނި ނަގައި ކުނިކަހާ ސާފުކޮށްފައިވެއެވެ. އަދި ކުނި އުކާލުމުގެ މަސައްކަތުގައިވެސް އެހީތެރިކަން ދިނެވެ.
މި މަސައްކަތް ޕީއެސްއެމްގެ ޓީމުން ކޮށްފައިވަނީ ވަރަށް ފޯރިއާ ޖޯޝާއެކުގައެވެ.
މާލެތެރެ ސާފުކުރުމުގެ މަސައްކަތުގައި ވެށިފާރަވެރިންގެ ގޮތުގައި ގިނަ އަދަދެއްގެ ބަޔަކު އަންނަނީ މަސައްކަތް ކުރަމުންނެވެ. އެމީހުން ފާހަގަކުރިގޮތުގައި، މަގުތައް ހަޑިވާ ސަބަބަކީ އާއްމުންގެ އިހުމާލުން މަގުތަކަށް އަޅާ ކުންޏެކެވެ. ފަތްކުނީގެ ނިސްބަތް މަދެވެ. ނަމަވެސް އާއްމުންކޮށް ކައިބޮއެ އުކާލާ ފުޅިއާ ދަޅާ އަދި ލުއިކާނާ ޕެކެޓުފަދަ ތަކެތި ކޮންމެ ދުވަހަކުވެސް ގިނަ އަދަދަކަށް ނަގަންޖެހެއެވެ. ކޮންމެ ދުވަހަކު މަގުތައް ސާފުކުރާއިރުވެސް، ނަގަންޖެހޭ ކުނީގެ ނިސްބަތަށް މަދު ނުވާކަމަށް އެމީހުން ބުނެއެވެ.
"ޑަސްޓްޕިން ބެހެއްޓިފަވެސް ހުރޭ ގިނަ ސަރަޙައްދުތަކުގައި. އެކަމަކުވެސް ބޯލާފަ އެއްލާލާ ފުޅި ދަޅު، ސިނގިރޭޓި ފޮށިވެސް އޮންނަނީ މަގަށް އެއްލާލާފަ. މިގޮތަށް މިކަން ނުކޮށް، ކުނި ރަނގަޅު ރައްކާތެރިގޮތުގައި އުކާނަމަ، އަޅުގަނޑުމެންގެ މަސައްކަތަށްވެސް ވަރަށް ލުއިވާނެ." މަގުތައް ސާފުކުރުމުގައި މަސައްކަތް ކުރާ މީހުން ފާހަގަކުރެއެވެ.
ބައިނަލްއަޤްވާމީ ވެށި ސާފުކުރުމުގެ ދުވަސް ފާހަގަކުރުމަށް މިގޮތަށް ކުންފުނިތަކާއި، ޖަމިއްޔާތަކުން ނިކުމެ އެހީތެރިވަމުންދާތީ، އެކަން ވަރަށް ބޮޑަށް ބަލައިގަންނަކަން ވެމްކޯއިން ފާހަގަކުރެއެވެ. އަދި ކުރިމަގުގައިވެސް، ކުނި މެނޭޖްކުރުމަށް ކުރަމުންދާ މަސައްކަތުގައި އެންމެ އެކުގައި ގުޅިގެން މަސައްކަތް ކުރުމަކީ އެމީހުންގެ ވަރަށް ބޮޑު އެދުމެވެ.