ސަޢޫދީ ޢަރަބިއްޔާގެ ޝޫރާ ކައުންސިލްގެ ރައީސް އައްޝައިޚް، ޑރ. ޢަބްދުﷲ ބިން މުޙައްމަދު އިބްރާހީމް ދިވެހިރާއްޖޭގެ އިސްލާމިކް ޔުނިވަރސިޓީއަށް 100,000 އެމެރިކާ ޑޮލަރުގެ ފައިސާގެ އެހީއެއް ދެއްވައިފިއެވެ. މިއީ ޝޫރާގެ ކައުންސިލް ރައީސްގެ އަމިއްލަފުޅު ޙައިސިއްޔަތުން ދެއްވި އެހީއެއް ކަމަށް އިސްލާމިކް ޔުނިވަރސިޓީން ހާމަކުރައްވައެވެ. އަދި ސަޢޫދީ ސަރުކާރުން އިސްލާމިކް ޔުނިވަރސިޓީއަށް ވެދޭ އެހީއެއް ވަރަށް އަވަހަށް ލިބޭނެކަމަށް ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަހީމް ޢަލީ ސަޢީދު މިއަދު ވިދާޅުވިއެވެ. އިސްލާމިކް ޔުނިވަރސިޓީއަށް އެހީ ހޯއްދެވުމާ ބެހޭގޮތުން، ސަޢޫދީ ޢަރަބިއްޔާގެ އެޑިއުކޭޝަން މިނިސްޓްރީއާ ވާހަކަ ދެއްކެވި، ކޮންމެ އަހަރަކު ސަޢޫދީ ސަރުކާރުގެ މަލީ އެހީއެއް އެ ޔުނިވަރސިޓީއެއް ދިނުމަށް އެއްބަސްވެފައިވާ ކަމަށް އިސްލާމިލް ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވިއެވެ. އަދި ކިޔަވައިދެއްވާނެ ޕްރޮފެސަރުން ފޮނުވައިދެއްވުމަށް މަޝްވަރާ ކުރެވިފައިވާ ކަމަށްވެސް ޑރ. މުޙައްމަދު ޝަހީމް ޢަލީ ސަޢީދު ވިދާޅުވިއެވެ.ސަޢޫދީ ޢަރަބިއްޔާގެ ޝޫރާ ކައުންސިލްގެ ރައީސް އަލްޝައިޚް، ޑރ. ޢަބްދުﷲ ބިން މުޙައްމަދު އިބްރާހީމް ދިވެހިރާއްޖޭގެ އިސްލާމިކް ޔުނިވަރސިޓީއަށް 100,000 އެމެރިކާ ޑޮލަރުގެ ފައިސާގެ އެހީއެއް ދެއްވުމަށް މިއަދު އިސްލާމިކް ޔުނިވަރސިޓީގައި ބޭއްވެވި ރަސްމިއްޔާތުގައި، ޔުނިވަރސިޓީގެ ފަރާތުން މި ފައިސާއާ ޙަވާލުވެވަޑައިގަތީ، ވައިސް ޗާންސެލަރ ޑރ. މުޙައްމަދު ޝަހީމް ޢަލީ ސަޢީދެވެ. ސަޢޫދީ ޝޫރާ ކައުންސިލްގެ ފަރާތްޕުޅުން މި ފައިސާ ޙަވާލުކޮށްދެއްވީ ސަޢޫދީ ޢަރަބިއްޔާއިން ރާއްޖެއަށް ކަނޑައަޅާފައި ހުންނަވާ ސަފީރުގެ ނާއިބު، ޠާރިޤު އަލް ފަޔާޒެވެ.