މާފުށީ ޖަލުގައި ޑިއުޓީކުރަމުންދިޔަ ޖަލު ބަލަހައްޓާ އޮފިސަރަކު ކުއްލިގޮތަކަށް ނިޔާވެއްޖެއެވެ.
ކޮމިޝަނަރ އޮފް ޕްރިޒަންސް އަޙްމަދު މުޙައްމަދު ވިދާޅުވީ ރޭގެ ވަގުތެއްގައި ޑިއުޓީ އަދާކުރަމުންދިޔަ ޕްރިޒަން ޕްރައިވެޓް އާދަމް ނައުޝާދަށް ކުއްލި ސިއްޙީ މައްސަލައެއް ކުރިމަތިވީކަމަށެވެ. އޭނާ ނިޔާވެފައިވަނީ މާފުށީ ސިއްޙީ މަރުކަޒުގައި ފަރުވާދެމުން ދަނިކޮށްކަމަށްކަމަށް ކޮމިޝަނަރ އޮފް ޕްރިޒަންސް ވިދާޅުވިއެވެ. ނައުޝާދަށް ކުރިމަތިވި ސިއްޙީ މައްސަލައާގުޅޭ އިތުރު މަޢުލޫމާތެއް ކޮމިޝަނަރ އޮފް ޕްރިޒަންސް ހާމައެއްނުކުރައްވައެވެ.
މާފުށީ ޖަލުގައި މިރޭ ޑިޔުޓީ ކުރަމުން ދިޔަ ޕްރިޒަން ޕްރައިވެޓް އާދަމް ނައުޝާދަށް ކުއްލިއަކަށް ދިމާވި ސިއްހީ މައްސަލައަކާ ގުޅިގެން މާފުށީ ސިއްހީ މަރުކަޒުގައި ފަރުވާ ދެމުންދަނިކޮށް ވަނީ ނިޔާވެފައި. މަރުހޫމްގެ ފުރާނައަށް ހެޔޮ ރަޙުމަތް ލައްވައި، ޢާއިލާއަށް ކެތްތެރިކަން ދެއްވާށި!އާމީން pic.twitter.com/xmQSXYo6wd
— Ahmed Mohamed (@ahumadhumohamed) September 29, 2022
ޕްރިޒަން ޕްރައިވެޓް އާދަމް ނައުޝާދު ނިޔާވިއިރު އޭނާގެ ޢުމުރަކީ 32 އަހަރެވެ. އޭނާ މޯލްޑިވްސް ކަރެކްޝަނަލް ސަރވިސްގެ ޚިދުމަތާ ގުޅިފައިވަނީ 2014ވަނަ އަހަރުގެ ފެބްރުއަރީ މަހުގެ 3ވަނަ ދުވަހުއެވެ. ޚިދުމަތުގައި ހޭދަކޮށްފައިވާ 8 އަހަރާއި 7 މަހާއި 26 ދުވަހުގެ ތެރޭގައި އޭނާވަނީ މާފުށީ ޖަލުގެ އެކި ޔުނިޓުތަކުގައި ޚިދުމަތްކޮށްފައިކަމަށް ކަރެކްޝަންސްއިން ވިދާޅުވެއެވެ.