އަނޫރާގް ބާސޫ ޑައިރެކްޓުކޮށް 2007 ވަނަ އަހަރު ރިލީޒްކޮށްފައިވާ ފިލްމު "ލައިފް އިން އެ މެޓްރޯ" ގެ ދެވަނަ ބައެއް އުފައްދާ ވާހަކަތައް އަޑުއިވޭތާ ދުވަސްގަނޑެއް ވެއްޖެއެވެ.
އެވާހަކަތަކަށްފަހު މިދިޔަ ނޮވެމްބަރު މަސް ނިމެނިކޮށް މި ފިލްމަށް އެކްޓަރު އަލީ ފަޒަލް ސޮއިކުރި ކަމަށް މީޑިއާތަކުން ރިޕޯޓުކުރިއެވެ.
އޭގެފަހުން އަނެއްކާވެސް މި ވަނީ ފިލްމުގެ އެހެން އަޕްޑޭޓެއް ލިބިފައެވެ. މި ފިލްމު ޕްރޮޑިއުސްކުރާނީ ބޫޝަން ކުމާރު ކަމަށާއި، ޑައިރެކްޓުކުރާނީ އޮރިޖިނަލް ފިލްމުގެ ޑައިރެކްޓަރު އަނޫރާގް ބާސޫ ކަމަށް މީޑިއާތަކުން ވަނީ ރިޕޯޓުކޮށްފައެވެ. އަދި ސީކުއަލް އަށް ކިޔަނީ "މެޓްރޯ އިންދިނޯ" ކަމަށްވެސް މީޑިއާތަކުން ވަނީ ރިޕޯޓުކޮށްފައެވެ.
މީގެ މިއުޒިކް ޕްރިތަމް ހަދާއިރު، ފިލްމުގައި ބޮޑު ކާސްޓެއްވެސް ހިމެނެއެވެ. އޭގެ ތެރޭގައި އަލީ ފަޒަލްގެ އިތުރުން އަދިތްޔާ ރޯއީ ކަޕޫރު، ސާރާ އަލީ ޚާން، އަނޫޕަމް ޚޭރް، ނީނާ ގުޕްތާ، ޕަންކާޖް ޓްރިޕާތީ، ކޮންކޯނާ ސެން ޝަރްމާ، އަދި ފާތިމާ ސަނާ ޝައިޚް ހިމެނެއެވެ.
ޓީ-ސީރީޒް އާއި އަނޫރާގް ބާސޫ ޕްރޮޑަކްޝަންސް އިން ޕްރޮޑިއުސްކުރާ "މެޓްރޯ އިންދިނޯ" ގައި ދައްކާނީ މި ޒަމާނުގައި އެކަކު އަނެކަކާއި ދެމެދު އާންމުކޮށް އޮންނަ ގުޅުންތަކެވެ. މި ފިލްމުން ބެލުންތެރިންނަށް ތާޒާ ސްޓޯރީލައިނެއް ތަޖުރިބާ ކުރެވޭނެއެވެ. އަދި މި ފިލްމަކީ ސާރާ އާއި އަދިތްޔާ އެކުގައި ފެންނަ ފުރަތަމަ ފިލްމެވެ. އެހެންކަމުން މި ދެ ތަރިންގެ ކެމިސްޓްރީވެސް ބެލުންތެރިންނަށް މި ފިލްމުން ތަޖުރިބާ ކޮށްލެވޭނެއެވެ.
މި ފިލްމު އުފައްދަން އަނޫރާގު މާކުރިންވެސް ވިސްނަމުން އައި ކަމަށާއި، ނަމަވެސް މީގެ ވާހަކަ ފުރަތަމަ ލިޔުނީ ކޯވިޑުގެ ބަލިމަޑުކަމުގެ ދުވަސްވަރު ކަމަށް ޕްރޮޑްކަޝަން ޓީމާއި ގާތް މަސްދަރަކާއި ހަވާލާދީ މީޑިއާތަކުން ރިޕޯޓުކުރެއެވެ.
މީގެ 15 އަހަރު ކުރިން ރިލީޒްކުރި އޮރިޖިނަލް ފިލްމުގައި ދައްކަނީ އިންޑިއާގެ މުމްބާއީގައި ދިރިއުޅޭ ތަފާތު 9 މީހެއްގެ ދިރިއުޅުމެވެ. 2007 ވަނަ އަހަރުގެ ފިލްމުގައި މުހިއްމު ރޯލުތަކުން ފެނުން ތަރިންގެ ތެރޭގައި އިރްފާން ޚާން، ރަންޖީތު ކަޕޫރު، އާކާޝް ޝަރުމާ، ކޮންކޮނާ ސެން ޝަރުމާ، ޝިލްޕާ ޝެޓީ އަދި ކަންގަނާ ރަނައުޓް ހިމެނެއެވެ.