ރަޝިޔާ-ޔޫކްރެއިން ހަނގުރާމަ ހުއްޓުމަކަށް ގެނައުމާ ގުޅޭ މަޝްވަރާތައް ވިލަރެސް ކުރުމަށް ޗައިނާގެ ރައީސް ޝީ ޖިންޕިންގް ޢައްޔަންކުރެއްވި ޚާއްޞަ މަންދޫބު ލީ ހުއީ ޔޫކްރެއިންގެ ޚާރިޖީ ވަޒީރު ޑްމިޓްރޯ ކުލެބާއާ ބައްދަލުކުރައްވައިފިއެވެ. ޚާރިޖީ ދާއިރާގައި ގިނަ ދުވަހު ޚިދުމަތް ކުރައްވާފައި ލީ ޔޫކްރެއިންގެ ވެރިރަށް ކީވަށް ވަޑައިގަންނަވާފައި ވަނީ ޗައިނާގެ ޚާރިޖީ ދާއިރާގެ އިސް ބޭފުޅުން ހިމެނޭ ވަފުދަކާ އެކުގައެވެ.
ލީއާ އެކު ބޭއްވެވި ބައްދަލުވުމުގައި ވާހަކަފުޅު ދައްކަވަމުން ކުލެބާ ވިދާޅުވީ، ޔޫކްރެއިންގެ ބިމުން އެންމެ ކައިވަތެއް ވެސް ދޫކޮށްލަން ރައީސް ވޮލޮޑޮމީރް ޒެލެންސްކީ އެއްބަސްވެ ވަޑައިނުގަންނަވާނެ ކަމުގައެވެ. އަދި، ޔޫކްރެއިންގެ ބިން ގެއްލޭނެ ގޮތަކަށް އެ ޤައުމުން ރަޝިޔާއާ އެކު އެއްވެސް މަޝްވަރާއެއް ނުކުރާނެ ކަމުގައެވެ.
މި ބައްދަލުވުމުގައި ހަނގުރާމަ ހުއްޓުމަކަށް ގެންނާނެ ގޮތްތަކާ ގުޅޭ ގޮތުން ދެ ބޭފުޅުން މަޝްވަރާ ކުރައްވާފައިވާ ކަމަށް ޔޫކްރެއިންގެ ޚާރިޖީ ވުޒާރާއިން ބުނެއެވެ. އަދި، ޔޫކްރެއިންގެ މިނިވަންކަން ދިފާޢުކޮށް ސިޔާދަތު ހިމާޔަތް ކުރުމަކީ އެ ޤައުމަށް ލިބިފައިވާ ހައްޤެއް ކަމަށާއި، އެ ހައްޤަށް ހުރިހާ ފަރާތަކުން އިޙުތިރާމުކުރަން ޖެހޭނެ ކަމަށް ކުލެބާ ވިދާޅުވެފައިވާ ކަމުގައި ވެސް އެ ޤައުމުގެ ޚާރިޖީ ވުޒާރާއިން ބުނެއެވެ.
ރަޝިޔާ-ޔޫކްރެއިން ހަނގުރާމަ ނިމުމަކަށް ގެނައުމަށް ޗައިނާއިން ވަނީ ފެބުރުވަރީ މަހުގެ ތެރޭގައި ހުށަހެޅުންތަކެއް ހުށަހަޅާފައެވެ. ލީ ކީވަށް ވަޑައިގަންނަވާފައި މި ވަނީ، ޝީގެ ހުށަހެޅުންތަކާ މެދު ޔޫކްރެއިނުން ދެކޭ ގޮތް ބެއްލެވުމަށެވެ. އަދި، އެ ހުށަހެޅުންތަކަށް ޒެލެންސްކީ އެއްބަސްކުރުވޭތޯ މަސައްކަތް ކުރުމަށެވެ. ނަމަވެސް، ޝީގެ ހުށަހެޅުންތަކަކީ ރަޝިޔާއަށް ފައިދާވާނެ ގޮތަށް އެކުލަވައިލާފައިވާ ހުށަހެޅުންތަކެއް ކަމަށް މަސްރަޙު ދިރާސާ ކުރާ ފަރާތްތަކުން ގަބޫލުކުރެއެވެ.
ލީއަކީ 2022 ވަނަ އަހަރު ފެބުރުވަރީ މަހުގެ 24 ވަނަ ދުވަހު ޔޫކްރެއިންގައި ހަނގުރާމަ ފެށި ފަހުން އެ ޤައުމަށް ވަޑައިގަންނަވާފައިވާ ޗައިނާ ސަރުކާރުގެ އެންމެ އިސް މަންދޫބެވެ. އޭނާ ކީވަށް ވަޑައިގަންނަވާފައި މި ވަނީ، ޝީއާއި ޒެލެންސްކީއާ ދެމެދު ފޯނުން ގުޅުއްވައި ބޭއްވެވި މަޝްވަރާތަކަށް ފަހު ތިން ހަފުތާ ފަހުންނެވެ. އެ މަޝްވަރާތަކަށް ފަހު ޒެލެންސްކީ ވެސް ވަނީ ޗައިނާއަށް ސަފީރެއް ކަނޑައަޅުއްވާފައެވެ.
ކީވަށް ކުރެއްވި ދަތުރުފުޅަށް ފަހު ލީ ދެން ވަޑައިގަންނަވާނީ ރަޝިޔާއަށެވެ. އެއަށްފަހު، ޕޮލެންޑާއި، ޖަރުމަނުވިލާތާއި ފަރަންސޭސިވިލާތަށް ވަޑައިގަންނަވައި، ހަނގުރާމައަށް ނިމުމެއް ގެނައުމުގައި އެ ޤައުމުތަކުގެ އެހީތެރިކަން ހޯދުމާ ގުޅޭ ގޮތުން ލީ މަޝްވަރާ ކުރައްވާނެ ކަމުގައި ޗައިނާގެ ޚާރިޖީ ވުޒާރާއިން ބުނެއެވެ.
މާރިޗު މަހުގެ ތެރޭގައި ޝީ ވަނީ މޮސްކޯއަށް ދަތުރުފުޅެއް ކުރައްވައި، ރަޝިޔާގެ ރައީސް ވްލަޑިމިޔަރ ޕުޓިންއާ ބައްދަލު ކުރައްވާފައެވެ. މި ހަނގުރާމައިގައި ޗައިނާއިން އަމަލު ކުރަނީ މެދުމިނުގެ ސިޔާސަތަކަށް ކަމުގައި އެ ޤައުމުން ބުނެއެވެ. ނަމަވެސް، ޗައިނާއިން ހަނގުރާމަ ކުށްވެރިކޮށްފައި ނެތުމުން، އެ ޤައުމަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ. އަދި، ޗައިނާއިން ދަނީ ރަޝިޔާއަށް ސިޔާސީ ގޮތުން އެހީތެރިކަން ފޯރުކޮށްދެމުންނެވެ.
2009 ވަނަ އަހަރުން ފެށިގެން 2019 ވަނަ އަހަރާ ދެމެދު ލީ ހުންނެވީ ޗައިނާއިން ރަޝިޔާއަށް ކަނޑައަޅާފައި ހުންނެވި ސަފީރުގެ މަގާމުގައެވެ. ޗައިނާގެ ވަފްދުގެ އިސްވެރިއެއްގެ ގޮތުގައި އޭނާ ހަމަޖެއްސުމުން ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ. އެއް ސަބަބަކީ، ޗައިނާގެ ސަފީރުގެ ހައިސިއްޔަތުން އޭނާ ޕުޓިންއާ އެކު ބާއްވަވާފައިވާ ގާތް ގުޅުމެވެ. ލީއަކީ ވަރަށް ގާތް ރަޙުމަތްތެރިއެއްގެ ގޮތުގައި ޕުޓިން ވެސް ދެކެވަޑައިގަންނަވައެވެ. އަދި، ޕުޓިން ވަނީ ލީއަށް "އޯޑަރ އޮފް ފްރެންޑްޝިޕް މެޑަލް" ވެސް އަރުވާފައެވެ.