ސަޢޫދީ ޢަރަބިއްޔާގެ ޖިއްދާގައި ބާއްވާ ޢަރަބި ލީގުގެ ސަމިޓުގައި ބައިވެރިވެ ވަޑައިގެންނެވުމަށް ސޫރިޔާގެ ރައީސް ބައްޝާރް ހާފިޛް އަލް-އަސަދާއި ޔޫކްރެއިންގެ ރައީސް ވޮލޮޑޮމީރް ޒެލެންސްކީ އެ ޤައުމަށް ވަޑައިގަންނަވައިފިއެވެ. މިއީ، 2011 ވަނަ އަހަރު ސޫރިޔާގެ ދާޚިލީ ހަނގުރާމަ ފެށި ފަހުން އަސަދު އެ ޤައުމަށް ވަޑައިގަންނަވާ ފުރަތަމަ ފަހަރެވެ. އަދި، ޢަރަބި ލީގުގެ ސަމިޓެއްގައި ބައިވެރިވެ ވަޑައިގަންނަވާ ވެސް ފުރަތަމަ ފަހަރެވެ.
މިއީ، ރަޝިޔާ ސިފައިން 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ޔޫކްރެއިނަށް އަރައި ހަނގުރާމަ ފެށިފަހުން ޒެލެންސްކީ ވެސް މެދިއިރުމައްޗަށް ކުރައްވާ ފުރަތަމަ ދަތުރުފުޅެވެ. މި ހަނގުރާމައާ މެދު މެދުއިރުމަތީގެ ގިނަ ޤައުމުތަކުން ގެންގުޅެނީ މެދުމިނުގެ ސިޔާސަތެކެވެ. ނަމަވެސް، އަސަދަކީ ރަޝިޔާގެ ރައީސް ވްލަޑިމިޔަރ ޕުޓިންއާ ގާތް ގުޅުމެއް ބާއްވަމުން ގެންދަވާ ބޭފުޅެކެވެ.
މި ދަތުރުފުޅުގައި މެދުއިރުމަތީގެ ޤައުމުތަކުގެ ތާޢީދާއި އެހީތެރިކަން ހޯއްދަވަން ޒެލެންސްކީ މަސައްކަތް ކުރައްވާނެއެވެ. ޒެލެންސްކީ ވަނީ ސަޢޫދީ ޢަރަބިއްޔާގެ ވަލީއަޙުދު މުޙައްމަދު ބިން ސަލްމާނާ ބައްދަލު ކުރައްވައި މި ކަމާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރައްވާފައެވެ. ޢަރަބި ލީގުގެ ސަމިޓުގައި ބައިވެރިވުމުގެ ދަޢުވަތު ޒެލެންސްކީއަށް އަރުވާފައި ވަނީ ސަޢޫދީ ޢަރަބިއްޔާއިންނެވެ. ނަމަވެސް، ސަޢޫދީ ސަރުކާރުން އެ ކަން ކަށަވަރުކޮށްދީފައެއް ނުވެއެވެ.
ސޫރިޔާގެ ދާޚިލީ ހަނގުރާމައާ ގުޅިގެން އެ ޤައުމު ޢަރަބި ލީގުން ވަކިކޮށްފައިވީ ނަމަވެސް، އެ އިއްތިހާދާ އަލުން ގުޅުމުގެ ފުރުޞަތު އެ ޤައުމަށް މިހާރު ވަނީ ދީފައެވެ. އަދި، ހަނގުރާމައާ ގުޅިގެން އަސަދުގެ ސަރުކާރާ ގުޅުން ކަނޑައިލި ޢަރަބި ދުނިޔޭގެ ޤައުމުތަކުން މިހާރު ދަނީ އެ ޤައުމާ އަލުން ގުޅުން ގާއިމުކުރަން މަސައްކަތް ކުރަމުންނެވެ.
އަސަދުގެ ސަރުކާރާ އަލުން ގުޅުން ގާއިމުކޮށްފައިވާ ޤައުމުތަކުގެ ތެރޭގައި ސަޢޫދީ ޢަރަބިއްޔާއާއި އެކުވެރި ޢަރަބި ޢިމާރާތް (ޔޫ.އޭ.އީ) ހިމެނެއެވެ. އަސަދާ ގުޅުން ބަދަހިކުރަން ފާޅުގައި ދެކޮޅު ހަދަމުންދާ ޤައުމުތަކުގެ ތެރޭގައި ޤަޠަރު ހިމެނެއެވެ.