ޔަހޫދީ ފައުޖުތަކާއި ޣައްޒާގެ ވެރިކަން ކުރާ ޙަމާސް ޖަމާޢަތާ ދެމެދު އޮކްޓޫބަރު ހަތް ވަނަ ދުވަހުން ފެށިގެން ހިނގަމުންދާ ހަނގުރާމައިގައި ޙަމަލާތައް އަނެއްކާވެސް މެދުކަނޑައިލުމުގެ އެއްބަސްވުމަކަށް ހިނގައިދާނެކަމުގެ އިޝާރާތެއް ޔަހޫދީ ދަޢުލަތުގެ ވެރިޔާ ބުންޔާމީން ނަތަންޔާހޫ ދެއްވައިފިއެވެ.
އެ ގޮތުން ޙަމާސްގެ ބެލުމުގެ ދަށުގައި ތިބި ޔަހޫދީ ރަހީނުން ދޫކޮށްލުމާ ބެހޭ މަޝްވަރާތައް ޤަޠަރާއެކު ކުރިއަށްދާ ކަމަށް ނަތަންޔާހޫ ކަށަވަރުކޮށްދެއްވިއެވެ. ނަތަންޔާހޫ އެކަން ކަށަވަރުކޮށްދެއްވީ މަޝްވަރާތަކުގައި އިސްކޮށް އުޅުއްވައި ޑޭވިޑް ބާރނިޔާއާއި ޤަތަރުގެ ބޮޑުވަޒީރު ޝެއިޚް މުޙައްމަދު ބިން ޢަބްދުއްރަޙްމާން އަލް ޘާނީއާއި ބައްދަލުކުރައްވާފައިވާ ދަނޑިވަޅެއްގައެވެ. މިއީ ނޮވެމްބަރު މަހު ޙަމަލާތައް މެދުކަނޑާލި ފަހުން ބާރނިޔާއާއި އަލް ޘާނީ ބައްދަލުކުރެއްވި ފުރަތަމަ ފަހަރެވެ.
މަޝްވަރާތައް އަލުން ފަށާނެ ކަމުގެ އިޝާރާތެއް ޔަހޫދީން ދީފައި ވަނީ ޔަހޫދީ ފައުޖުތަކަށް އޮޅިގެން ދިން ހަމަލާއެއްގައި ޙަމާސްގެ ބެލުމުގެ ދަށުގައި ތިބި ތިން އަސީރުން މަރުވެފައިވަނިކޮށެވެ. ނޮވެމްބަރު މަހު ފަހުކޮޅު ދެ ފަރާތުން އެއްބަސްވެގެން ހަފުތާއެއްހާ ދުވަހުގެ މުއްދަތަށް ޙަމަލާތައް މެދުކަނޑައިލައިފައިވަނީ ޤަޠަރާއި މިޞްރު މެދުވެރިވެގެންނެވެ. އެ މުއްދަތުގައި ޙަމާސުން ވަނީ އެ ޖަމާޢަތުގެ ބެލުމުގެ ދަށުގައި ތިބި 100އަށްވުރެ ގިނަ އަސީރުން މިނިވަންކޮށްފައެވެ. ބަދަލުގައި ޔަހޫދީންގެ ޖަލުތަކުގައި ތިބި 240 ފަލަސްޠީނު ޤައިދީން ވަނީ މިނިވަންކޮށްފައެވެ.