މޫސުމުގެ ސަބަބުން ދިމާވާ ގެއްލުންތަކަށް އަމާޒުކޮށް ސަމާލު ނެރޭ ނިޒާމެއް ޤާއިމްކުރަނީ

މޫސުމުގެ ސަބަބުން ރަށަކަށް ދިމާވެދާނެ ގެއްލުންތައް ދެނެގަނެ، އެ ގެއްލުންތަކުން ސަމާލުވުމަށް އެ ރަށަކަށް ވަކިން އެލަރޓު ނެރޭ ނިޒާމެއް ޤާއިމްކުރުމުގެ މަސައްކަތް ކުރަމުންދާކަމަށް ދިވެހިރާއްޖޭގެ މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގުރާމުގައި ވާހަކަދައްކަވަމުން މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާގެ ސްޓޭޓް މިނިސްޓަރ އިބްރާހިމް މިމްރާހް ވިދާޅުވީ، މޫސުމުން ރަށްރަށަށް ދިމާވެދާނެ ގެއްލުންތަކަށް ރިޢާޔަތްކުރުމަށްފަހު ވަކިވަކި ރަށްރަށަށް ސަމާލު ނެރެވޭ ނިޒާމެއް ޤާއިމްކުރުމުގެ މަސައްކަތް މިހާރު ފަށާފައިވާ ކަމަށެވެ.

އެގޮތުން އިމްޕެކްޓް ބޭސްޑް ފޯކާސްޓްގެ ނަމުގައި ތަޢާރަފްކުރެވޭ މި ނިޒާމާއެކު، މޫސުމުގެ ސަބަބުން ދިމާވެދާނެ ގެއްލުމެއް ލަފާކޮށް ވަކިވަކި ރަށްރަށަށް ސަމާލު ނެރެވޭނެކަމަށް މިމްރާހް ވިދާޅުވިއެވެ.

"މި ނިޒާމުން ދެނެގަންނާނެ ކޮން ރަށަކަށް މޫސުމުގެ ސަބަބުން ކޮން ގެއްލުމެއްކަން ވާނީ. އޭރުން އެ ރަށަކަށް ސީދާ އެވާ ގެއްލުމަކަށް ސަމާލުވުމަށް އެލަރޓު ނެރެވޭނެ. މީގެ ޕައިލޮޓް ޕްރޮގުރާމެއް މިހާރު ފުވައްމުލަކުގައި ކުރިއަށް ގެންގޮސްފިން." މިމްރާހް ވިދާޅުވިއެވެ.

މިމްރާހް ވިދާޅުވީ، ރަށްރަށަށް ވަކިން ސަމާލު ނެރެވޭ ނިޒާމެއްގެ އިތުރުން، ހޮނުއެޅިކަން އެނގޭނެ ނިޒާމެއްވެސް މޫސުމާބެހޭ ޤައުމީ އިދާރާގައި މިދިޔަ ހަފްތާގެ ތެރޭގައި ޤާއިމްކޮށްފައިވާ ކަމަށެވެ. މި ނިޒާމްގެ ސަބަބުން ރާއްޖޭގެ އެކި ސަރަހައްދުތަކަށް ހޮނު އެޅުމުން ވަގުތުން އެކަން އެނގޭނެކަމަށް އޭނާ ވިދާޅުވިއެވެ.

މީގެ އިތުރުން ހުޅުލޭގައި ހުރި މޫސުމާބެހޭ ޤައުމީ އިދާރާއާ އެއްފެންވަރުގެ ޢިމާރާތެއް އައްޑޫސިޓީގައި އެޅުމުގެ ޢަމަލީ މަސައްކަތް ވަރަށް އަވަހަށް ފަށާނެކަމަށްވެސް މިމްރާހް ވިދާޅުވިއެވެ. އަދި އެތަނުގައި ޒަމާނީ ވަޞީލަތްތައް ޤާއިމްކޮށް ރާއްޖޭގެ ދެކުނުގެ މޫސުން ލަފާކުރުމުގެ މަސައްކަތަށް އައު އޮފީސް ޢިމާރާތާއެކު އިތުރު ކުރިއެރުމެއް ލިބޭނެކަން މިމްރާހް ފާހަގަކުރެއްވިއެވެ.

މޫސުމާބެހޭ ޤައުމީ އިދާރާއަށް މިމަހުގެ ފުރަތަމަ ދުވަހު ވަނީ 50 އަހަރު ފުރިފައެވެ. މޫސުމާބެހޭ ޤައުމީ އިދާރާ އުފެދުނީ 1974 ވަނަ އަހަރުގެ އޮގަސްޓު މަހުގެ 1 ވަނަ ދުވަހުއެވެ. ރަސްމީގޮތުން މި އިދާރާ އުފެދި މޫސުން ލަފާކުރުމުގެ ދާއިރާގައި ގިނަ ކުރިއެރުންތަކެއް ހޯދާފައިވެއެވެ.

އެގޮތުން މީގެ ކުރިން 4 ގަޑިއިރު މޫސުން ލަފާކުރަމުން އައި މި އިދާރާ މިހާރު 24 ގަޑިއިރު މޫސުން ލަފާކުރެއެވެ. ހަމައެއާއެކު މޫސުމާބެހޭ ޤައުމީ އިދާރާގެ ގޮފިތައް ރާއްޖޭގެ 5 ސަރަޙައްދެއްގައި މިހާރު ވަނީ ޤާއިމްކޮށްފައެވެ.