މަހުގެ އަގު 25 ރުފިޔާއަށް ޖެއްސުމުން އަމިއްލަ ވިޔަފާރިތައް ހުއްޓިގެން ދިޔަ: ވަޒީރު ޝިޔާމް

މަހުގެ އަގަށް ނިމިދިޔަ ސަރުކާރުން ގެނައި ބަދަލާއެކު ކުދި ވިޔަފާރިތަކާއި ސިނާޢަތުގައި ހިންގަމުން ދިޔަ އަމިއްލަ ވިޔަފާރިތައް ހުއްޓުމަކަށްއައި ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެެވެ. ވަޒީރު މިހެން ވިދާޅުވީ، ޕީއެސްއެމްގެ ރާއްޖެ މިއަދު ޕްރޮގްރާމުގައެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު ވަނީ މަހުގެ އަގަށް ނިމިދިޔަ ސަރުކާރުން ރިޔާސީ އިންތިޚާބުގެ މެދުތެރޭގައި ގެނައި ބަދަލަކީ ސިޔާސީ މަންފާއެއް ހާސިލް ކުރުމަށް ގެނައި ބަދަލެއް ކަމަށް ވިދާޅުވެފައެވެ. އެގޮތުން މަހުގެ އަގު 25 ރުފިޔާއަށް އޭރު ބަދަލު ކުރުމުގެ ސަބަބުން ސަރުކާރުން ބޮޑު ޚަރަދެއް ކުރަން ޖެހޭކަން ފާހަގަކޮށް ވަޒީރު ވިދާޅުވީ، މިކަމުގެ ސަބަބުން މިފްކޯގެ ތަރައްޤީއަށް ކުރަން ޖެހޭ އެއްވެސް ކަމެއް ނުކުރެވޭ ކަމަށެވެ.

މިފްކޯއަށް މަސް ގަތުމާއި ގުޅޭގޮތުން އިތުރު ތަފްސީލު ދެއްވަމުން މަސްވެރިކަމާ ބެހޭ ވަޒީރު ޝިޔާމް ވިދާޅުވީ، މިފްކޯ މެދުވެރި ކަނޑުމަސް ރާއްޖެއިން އެވްރެޖްކޮށް ކިލޯއެއް ބޭރު ކުރެވެނީ 12 ރުފިޔާގައި ކަމަށެވެ. އަދި މިއީ ހުރިހާ ސަރުކާރަކުންވެސް ޤަބޫލު ކުރާ އަދަދެއްކަން ފާހަގަކުރައްވާ، ވަޒީރު ވިދާޅުވީ، 25 ރުފިޔާއަށް މަސް ކިލޯއެއް ވިއްކާ ކަމަށްވަންޏާ އެއަށް އިތުރުވާ 13 ރުފިޔާ ސަރުކާރުން ސަބްސިޑައިޒްކޮށްދޭން ޖެހޭ ކަމަށެވެ.

70،000 މެޓްރިކް ޓަން އަހަރެއްގެ މައްޗަށް ބޭނޭއިރު 1.1 ބިލިޔަން ރުފިޔާ މިގޮތަށް ދައުލަތުގެ ބަޖެޓުން ޚަރަދުވާކަމަށް ވަޒީރު ވިދާޅުވިއެވެ.

"ޕްރޮސެސިން ކެޕޭސިޓީ ނެތިގެން އުޅޭއިރު މިއީ ގާތްގަނޑަކަށް ދެ ފެކްޓަރީ އެޅޭ ވަރުގެ ލާރި އަހަރަކަށް މި ހޭދަވަނީ 25ރ. ބަހައްޓައިފި ނަމަ." ވަޒީރު ޝިޔާމް ވިދާޅުވިއެވެ.

މަހުގެ އަގުބޮޑުކުރުމުން މިފްކޯއަށް އިންތިހާ ބޮޑެތި ގެއްލުންތަކެއްވިއިރު، ވަޒީރު ޝިޔާމް ފާހަގަކުރެއްވި ގޮތުގައި މިކަމުން އެންމެ ބޮޑު ގެއްލުމެއް ލިބިގެންދިޔައީ އަމިއްލަ ވިޔަފާރިތަކަށެވެ. އެގޮތުން އަމިއްލަ ގޮތުން މަސް ޕްރޮސެސް ކުރަމުން ދިޔަ ދެ ވިޔަފާރިއެއް ހުއްޓުމަކަށް އައިސް ގިނަ ބައެއްގެ ވަޒީފާ ގެއްލިގެން ދިޔަކަމަށް ވަޒީރު ވިދާޅުވިއެވެ.

"މަހުގެ އަގު 25ރ. އަށް ހެދުމާއެކު ޕްރައިވެޓް ސެކްޓަރ ކުންފުނިތައް ދިޔައީ ހުއްޓުމަކަށް. ގާތުން ހުޅުމާލޭގައި 200 ކަނބަލުން މަސައްކަތް ކުރި. ލ. މާންދޫގައި 50 އިންސައްތަ އޮޕަރޭޝަން ކުޑަކުރީ." ވަޒީރު ޝިޔާމް ވިދާޅުވިއެވެ.

މަސްވެރިކަމުގެ ސިނާޢަތުގައި ހަރަކާތްތެރިވާ ގިނަ ވިޔަފާރިތަކަށް ބޮޑު ގެއްލުންތަކެއްވިއިރު ނިމިދިޔަ ސަރުކާރުން މަހުގެ އަގު 25ރ. އަށް ބޮޑުކުރީ ރިޔާސީ އިންތިޙާބުގެ ފުރަތަމަ ބުރަށް ފަހުގައެވެ. އޭރު ސަރުކާރުން އެކަން ކުރީ ޔޫރަޕަށް މަސް ބޭރު ކުރުމަށް، ނަގާ ޑިއުޓީ ބޮޑުކޮށްފައިވާ ކަމަށް ބުނެއެވެ.