ކާބޯތަކެތީގެ ޤާނޫނުގެދަށުން ޚިދުމަތްދޭ ތަންތަނުގެ ލައިސަންސާއި ރަޖިސްޓްރީ އައުކުރަންޖެހޭނެ

ކާބޯތަކެތި ރައްކާތެރިކުރުމުގެ ޤާނޫނުގެދަށުން، އެފަދަ ޚިދުމަތްދޭ ތަންތަން ރަޖިސްޓްރީކުރުމުގެ އިންތިޤާލީ އުސޫލު ކުރިއަށް އޮތް ދެ ހަފްތާގެ ތެރޭގައި އާއްމުކުރައްވާނެކަމަށް ސިއްޙަތާ ބެހޭ ވުޒާރާއިން ވިދާޅުވެއްޖެއެވެ.

ކާބޯތަކެތި ރައްކާތެރިކުރުމުގެ ޤާނޫނު ރައީސުލްޖުމްހޫރިއްޔާ ތަސްދީޤުކުރެއްވީ މޭމަހުގެ 23ވަނަ ދުވަހުއެވެ. މިޤާނޫނަށް މިމަހުގެ 23ވަނަ ދުވަހުން ފެށިގެން ޢަމަލުކުރަން ފަށާނެއެވެ.

ކާބޯތަކެތި ރައްކާތެރިކުރުމުގެ ޤާނޫނަކީ ކާބޯތަކެތީގެ ފެންވަރު ހިފެހެއްޓުމާއި ރައްކާތެރިކަން ކަށަވަރުކުރުމަށް އުސޫލުތަކާއި މިންގަނޑުތައް ކަނޑައެޅުމުގެ ޤާނޫނެވެ. މި ޤާނޫނުގައި ކާބޯތަކެތި ތައްޔާރުކުރުމާއި އިމްޕޯޓް އެކްސްޕޯޓް، ކާބޯތަކެތި ވިއްކާ ޚިދުމަތްދޭ ތަންތަން ހިންގުމުގެ މިންގަނޑާ ރަޖިސްޓްރީކޮށް ލައިސަންސް ހޯދުމުގެ އުސޫލުތައް ކަނޑައަޅާފައިވެއެވެ. އަދި އާއްމު ސިއްޙަތަށް ނުރައްކާވާ ޙާލަތްތަކުގައި އަޅާނެ ފިޔަވަޅުތަކާއި ޖޫރިމަނާ ވަނީ ކަނޑައަޅާފައެވެ.

ޤާނޫނުގައި ބުނާގޮތުން، ކާބޯތަކެތީގެ ޚިދުމަތް ދޭން ފެށުމުގެ ކުރިން، އެފަދަ ތަންތަން މިޤާނޫނުގެ ދަށުން ހަދާ ޤަވާއިދާ އެއްގޮތަށް ލައިސަންސް ހޯދާ ރަޖިސްޓްރީކުރަންޖެހޭނެއެވެ. ނަމަވެސް މީހުން ދިރިއުޅޭ ތަންތަނާއި ކާބޯތަކެތީގެ ޚިދުމަތް ދިނުމަށް ވަގުތީގޮތުން ޤާއިމުކުރާ މާރުކޭޓުތަކާއި އުޅަނދުތަކާއި ސްޓޭންޑްތައް ރަޖިސްޓްރީކުރާކަށް ލާޒިމެއް ނޫނެވެ.

ޤާނޫނަށް ޢަމަލުކުރަން ފެށުމާއެކު، ޤާނޫނުން ބާރު ލިބިގެން ހިންގާ އޮތޯރިޓީއެއްގެ ގޮތުގައި މޯލްޑިވްސް ފުޑް އެންޑް ޑްރަގް އޮތޯރިޓީ ބަދަލުވާނެއެވެ. އަދި މިހާރު ހެލްތު ޕްރޮޓެކްޝަން އެޖެންސީން ދެމުންދާ، ކާބޯތަކެތީ އުފައްދާ ވިއްކާ ވިޔަފާރިކުރުމުގެ ލައިސަންސާއި ރަޖިސްޓްރީކުރުމުގެ މަސައްކަތް އެއޮތޯރިޓީގެ ދަށަށް ބަދަލުވާނެއެވެ.

ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ސިއްޙަތާއި ބެހޭ ވަޒީރުގެ ނައިބު އިސްމާޢީލް ޒާހިރު ވިދާޅުވީ ޤާނޫނުގެ ދަށުން ތަންތަން ރަޖިސްޓްރީކޮށް ލައިސަންސްދިނުމުގެ މަސައްކަތްތައް، ޤާނޫނަށް ޢަމަލުކުރަން ފަށާތާ 6 މަސްތެރޭ ކުރިއަށްގެންދަންޖެހޭކަމަށެވެ.

އެ މަސައްކަތް މިހާރު ޞިއްޙަތާއި ބެހޭ ވުޒާރާއާއި އެމްއެފްޑީއޭ ގުޅިގެން ފަށާފައިވާކަމަށާއި، ލައިސަންސް ދޫކުރުމާއި ރަޖިސްޓްރީކުރުމުގެ އިންތިޤާލީ އުސޫލު އެއްމަސްތެރޭގައި އާއްމުކުރަންޖެހޭކަމަށް އޭނާ ވިދާޅުވިއެވެ. އިސްމާޢީލް ޒާހިރު ވިދާޅުވީ އުސޫލު އެކުލަވާލުމުގެ މަސައްކަތްތައް މިހާރު ނިމުމަކާ ގާތްވެފައިވާކަމަށާއި ކުރިއަށް އޮތް ދެ ހަފްތާތެރޭގައި އިންތިޤާލީ އުސޫލު އެމްއެފްޑީއޭއިން އާއްމުކުރާނެކަމަށެވެ.

މި އުސޫލުގައި، ކާބޯތަކެތި ވިއްކުމުގެ ކުރިން އޮތޯރިޓީގައި ރަޖިސްޓްރިކުރުން ލާޒިމުވާ ބާވަތުގެ ކާބޯތަކެތި ކަނޑައަޅާނެއެވެ. އަދި ކާބޯތަކެތީގެ ޚިދުމަތް ދޭ ތަންތަނާއި އެތަންތަނުން ދޭ ޚިދުމަތްތައް އޮތޯރިޓީން ގިންތި ކުރާނެއެވެ. ގިންތިކުރާނެ ގޮތް، އިންތިޤާލީ އުސޫލުގައި ހިމެނޭނެއެވެ.

ކާބޯތަކެތީގެ ޚިދުމަތްދޭ ތަންތަނަށް ދޫކުރާ ލައިސަންސް ފީ ދައްކަންޖެހޭނީ، އެތަނެއް ގިންތިކުރާ އުސޫލަކުން، އަހަރަކު އެއްފަހަރުއެވެ.

ޤާނޫނު ބުނާގޮތުން ކާބޯތަކެތީގެ ލައިސަންސް ނެތި، އެއްވެސް ބާވަތެއްގެ ކާބޯތަކެތީގެ ޚިދުމަތެއް ދިވެހިރާއްޖޭގައި ދިނުމަކީ މަނާކަމެކެވެ. އެފަދަ ކަމެއް ކޮށްފިނަމަ އެ ތަނެއް ވަގުތުން ބަންދުކުރުމަށް އެންގުމާއި، އެ ތަނެއް ބަންދުކުރުމަށްޓަކައި އަޅަންޖެހޭ ފިޔަވަޅުތައް އެޅުމުގެ އިޚްތިޔާރު އޮތޯރިޓީއަށް ލިބިގެންވެއެވެ. އަދި ހާލަތަށް ބަލާ ލައިސަންސް ބާތިލުކުރުމުގެ ބާރުވެސް ލިބިގެންވެއެވެ.