އިސްލާމީ ޔުނިވަރސިޓީގެ ހުޅުމާލެ ކެމްޕަހުގެ މަސައްކަތް އޮކްޓޫބަރުމަހު ފަށަނީ
-
މިއީ ހުޅުމާލޭގައި ޤާއިމްކުރާ ޔުނިވަރސިޓީއެއްގެ ފުރަތަމަ ކެމްޕަސް
-
މަސައްކަތް ފަށާތާ ދޮޅު އަހަރު ދުވަހުގެ ތެރޭގައި ޢިމާރާތް ނިމޭނެ
-
ޢިމާރާތް އެޅުމަށް 60 މިލިޔަން ރުފިޔާ ޚަރަދުވޭ
ހުޅުމާލޭގައި ޤާއިމްކުރާ ދިވެހިރާއްޖޭގެ އިސްލާމީ ޔުނިވަރސިޓީގެ ކެމްޕަހުގެ މަސައްކަތް އަންނަ އޮކްޓޫބަރުމަހު ފަށާނެކަމަށް އެ ޔުނިވަރސިޓީގެ ޑެޕިޔުޓީ ވައިސް ޗާންސެލަރ އަޙްމަދު އަމީން މުޙައްމަދު ވިދާޅުވެއްޖެއެވެ.
ޑެޕިޔުޓީ ވައިސް ޗާންސެލަރ މިހެން ވިދާޅުވީ ކެންޕަސް އެޅުމުގެ މަސައްކަތާއި ގުޅޭ އެއްބަސްވުމުގައި ސޮއިކުރުމަށް މިއަދު ބޭއްވި ރަސްމިއްޔާތުގައެވެ.
ދިވެހިރާއްޖޭގެ އިސްލާމީ ޔުނިވަރސިޓީގައި ބޭއްވި ރަސްމިއްޔާތުގައި އައިޔޫއެމް ކެމްޕަހުގެ ޢިމާރާތުގެ މަސައްކަތް ފެށުމާއި ގުޅޭ އެއްބަސްވުމުގައި ވަނީ ސޮއިކޮށްފައެވެ.
އެއްބަސްވުމުގައި ސޮއިކޮށްފައިވަނީ ސުކޫކް ވިއްކައިގެން މި މަޝްރޫޢަށް ފައިސާ ހަމަޖެއްސުމުގެ މަސައްކަތް ކޮށްފައިވާ ބީއެމްއެލްއާއި މަސައްކަތުގެ ލީޑް މެނޭޖަރ، ވޯޓަރ ކްރެސް ކެޕިޓަލްއާއި މަސައްކަތުގެ ކޮންޓްރެކްޓަރ، އޯކް ޑިވެލޮޕްމެންޓާއި މަސައްކަތުގެ ކޮންސަލްޓަންޓް ގެޑޯ ކޮންސަލްޓިން ޕްރައިވެޓް ލިމިޓެޑްއާއި ޢިމާރާތް އެޅުމަށް ފަންޑު ހޯދުމުގެ މަސައްކަތް ހަވާލުކޮށްފައިވާ އައިޔޫއެމް ހޯލްޑިންގްސް ޕްރައިވެޓް ލިމިޓެޑްއެވެ.
ސަނަބިލް މަޝްރޫޢުގެ ނަމުގައި ކުރިއަށްގެންދާ ކެމްޕަހުގެ މަސައްކަތަށް 60 މިލިއަން ރުފިޔާ ޚަރަދުވާއިރު، އެ ފައިސާ ހަމަޖައްސާފައިވަނީ އިސްލާމިކް ފައިނޭންސްގެ ސުކޫކް އިސްތިސްނާގެ ދަށުން، ސުކޫކް ވިއްކައިގެން ހޯދާފައިވާ ފައިސާއެވެ. މި ޢިމާރާތް ހަދަނީ 8 ފަންގިފިލާއަށް ހުޅުމާޅޭގެ ސެންޓްރަލް ޕާކު ކައިރީގައެވެ.
އިސްލާމީ ޔުނިވަރސިޓީގެ ޑެޕިޔުޓީ ވައިސް ޗާންސެލަރ އަޙްމަދު އަމީން މުޙައްމަދު ވިދާޅުވީ އައު ކެމްޕަހުގެ ޢަމަލީ މަސައްކަތް، އަންނަ އޮކްޓޫބަރުމަހުގެ ތެރޭގައި ފެށޭނެ ކަމަށާއި މިހާރު ކުރިއަށްދަނީ މަސައްކަތް ފެށުމަށްޓަކައި ހުއްދަތައް ހޯދުމުގެ މަސައްކަތް ކަމަށެވެ.
އަމީން ވިދާޅުވީ ޔުނިވަރސިޓީގެ އަމާޒަކީ ޢިމާރާތުގެ މަސައްކަތް ފަށާތާ، ދޮޅު އަހަރު ދުވަހުގެ ތެރޭގައި ނިންމުން ކަމަށެވެ. އަދި މި އިމާރާތް އަޅާނީ ހުޅުމާލޭގައި ހުންނަ އުރީދޫ ހެޑް އޮފީސް ކައިރީގައިކަމަށް އަމީން ވިދާޅުވިއެވެ.
އަމީން ވިދާޅުވީ ހުޅުމާލޭގައި ޤާއިމްކުރާ ކެމްޕަހާއެކު ޔުނިވަރސިޓީއަށް ދިމާވެފައިވާ ޖާގައިގެ ދަތިކަމަށް ކޮންމެވެސް ވަރެއްގެ ހައްލެއް ލިބޭނެ ކަމަށެވެ. އަދި މާލޭގައި ހުންނަ އިސްލާމީ ޔުނިވަރސިޓީގައި ކިޔަވައިދެމުންދާ ކޯސްތައް އެ ޢިމާރާތުގައިވެސް ކިޔަވައިދެވޭނެކަމަށް އޭނާ ވިދާޅުވިއެވެ.