ސްކޫލްތަކުގައި ޤައުމީ ދުވަސް ކުލަގަދަކޮށް ފާހަގަކޮށްފި

މިއަހަރުގެ ޤައުމީ ދުވަސް ފާހަގަކުރުމަށް މާލެއާއި އަތޮޅުތަކުގެ ސްކޫލްތަކުގައި ގިނަ ހަރަކާތްތަކެއް ކުރިއަށް ގެންގޮސްފިއެވެ.

ޤައުމީ ދުވަސް ކޮންމެ އަހަރަކުވެސް ރާއްޖޭގައި ފާހަގަކުރަނީ ރަބީޢުލް އައްވަލްމަހުގެ 1 ވަނަ ދުވަހުއެވެ. އެ ދުވަސް މިއަހަރު ދިމާވަނީ އަންނަ ބުދަ ދުވަހާއެވެ.

ޤައުމީ ދުވަހަކީ ސަރުކާރު ބަންދު ދުވަހަކަށްވާތީ ގިނަ ސްކޫލްތަކުގައި ޤައުމީ ދުވަސް ފާހަގަކުރުމަށް ނިންމާފައިވަނީ މިއަދުއެވެ. މިގޮތުން މާލެއާއި އަތޮޅުތަކުގެ ގިނަ ސްކޫލްތަކުގައި ޤައުމީ ދުވަސް ވަރަށް ކުލަގަދަކޮށް ފާހަގަކޮށްފައިވެއެވެ.

ޤައުމީ ދުވަސް ކުލަގަދަކޮށް ފާހަގަކުރި އެއް ސްކޫލަކީ މާލޭގައި ހުންނަ ޢިމާދުއްދީން ސްކޫލެވެ. ޤައުމީ ދުވަހާ ގުޅިގެން ޢިމާދުއްދީން ސްކޫލްގައި ޚާއްސަ އެސެންބްލީއެއްވަނީ ބާއްވާފައެވެ. އަދި ޤައުމީ ދުވަހުގެ ބަޠަލު އައްސުލްޠާން އަލްޣާޒީ މުޙައްމަދު ތަކުރުފާނު އަލްއަޢުޡަމް ނުވަތަ ބޮޑުތަކުރުފާނުގެ ޖިހާދު ދައްކުވައިދޭ ޑްރާމާއެއް ދަރިވަރުންވަނީ ކުޅެފައެވެ.

ޢިމާދުއްދީން ސްކޫލްގެ އިތުރުން މާލޭގައި ހުންނަ ޢިއްޒުއްދީން ސްކޫލްގައިވެސް ޤައުމީ ދުވަސް ކުލަގަދަކޮށް ފާހަގަކޮށްފައިވެއެވެ. އެގޮތުން ޤައުމީ ދުވަހަށް ޚާއްސަކޮށްގެން އެސެންބްލީއެއްވަނީ ބާއްވާފައެވެ.

މި އެސެންބްލީގައި ޅެން ހުށައެޅުން ހިމެނޭހެން ތަފާތު އަދަބީ ހަރަކާތްތަކެއް ވަނީ ކުރިއަށް ގެންގޮސްފައެވެ. އަދި ތިމާގެ ޤައުމަށް ކޮށްދެވޭނެ ކަންކަމުގެ މައްޗަށް އަލިއަޅުވާލާ ބައެއް ދަރިވަރުންވަނީ އެސެންބްލީގައި ތަޤުރީރުކޮށްފައެވެ.

އަތޮޅުތަކުން ބ. އޭދަފުށީގައި ހުންނަ ބ. އަތޮޅު ތަޢުލީމީ މަރުކަޒުގައިވެސް ޚާއްސަ ހަރަކާތްތަކެއް ކުރިއަށް ގެންގޮސްފައިވެއެވެ. އެގޮތުން ދުވަހުގެ ޚާއްސަ އެސެންބްލީއެއް ބާއްވާ، އެސެންބްލީގައި ޤައުމީ ދުވަހާއި އެ ދުވަހުގެ ބަޠަލާ ބެހޭގޮތުން މަޢުލޫމާތު ދީފައިވެއެވެ. އަދި މި އެސެންބްލީގައި ސަގާފީ ބޮޑުބެރުގެ ހަރަކާތަކާއި ޤައުމީ ދުވަހާ ގުޅޭގޮތުން ޑުރާމާއެއްވަނީ ހުށައަޅައިދީފައެވެ.

މީގެ އިތުރުން ޤައުމިއްޔަތު މާއްދާ ކިޔަވާ ދަރިވަރުންނަށް ޚާއްސަކޮށްގެން ސްކޫލްގެ ގޯތި ތެރޭގައި "އަދަބީ ކާނިވާ"ގެ ނަމުގައި ސްޓޯލްތަކެއްވެސް ވަނީ ހަދާފައެވެ. މި ސްޓޯލްގައި ޤައުމިއްޔަތުގެ ބަހާތަކާބެހޭ ޑިސްޕްލޭތައް ބަހައްޓާފައިވެއެވެ. އެގޮތުން ރާއްޖޭގައި ފާހަގަކުރާ ދުވަސްތަކާއި ޤައުމީ އެކި ބަހާތަކާބެހޭ މަޢުލޫމާތު ސްޓޯލްތަކުން ފެނެއެވެ.

ބ އަތޮޅު ތަޢުލީމީ މަރުކަޒުގެ އިތުރުން ބ. ދަރަވަންދޫގައި ހުންނަ ބ.އަތޮޅު މަދަރުސާގައިވެސް ޤައުމީ ދުވަސް ފާހަގަކުރުމަށް ގިނަ ހަރަކާތްތަކެއް ބޭއްވިއެވެ.

އެގޮތުން ޚާއްސަ އެސެންބްލީއެއް ބާއްވާ، ދުވަހުގެ ބަޠަލު މުޙައްމަދު ތަކުރުފާނާ ބެހޭގޮތުން މަޢުލޫމާތު ދީފައިވެއެވެ. އަދި ދިވެހި ގަޑިތަކުގައި ދަރިވަރުންވަނީ ޤައުމީ ދުވަހާ ބެހޭގޮތުން ސުވާލާއި ޖަވާބު ހިމެނޭހެން ކަރުދާހެއް ތައްޔާރުކޮށްފައެވެ.

ޤައުމީ ދުވަސް ފާހަގަކުރަނީ ޕޯޗުގީޒުންގެ އަޅުވެތިކަމުގެ ދަށުން ރާއްޖެ މިނިވަންވި ދުވަހާ ގުޅިގެންނެވެ.

ޕޯޗުގީޒުންގެ ކިބައިން ރާއްޖެ މިނިވަންވީ 1573 ވަނަ އަހަރު، އައްސުލްޠާން އަލްޣާޒީ މުޙައްމަދު ތަކުރުފާނު އަލްއަޢުޡަމާއި އިތުރު 5 ބޭކަލަކު އިސްވެކުރެއްވި ހިތްވަރުގަދަ ޖިހާދުގެ ސަބަބުންނެވެ. އެ ދުވަހަކީ 1573 ވަނަ އަހަރުގެ ރަބީޢުލް އައްވަލްމަހުގެ 1 ވަނަ ދުވަހެވެ.