ބީސީސީން އެކުލަވާލި، ގޭގައި ކާބޯތަކެތި އުފައްދާ ފަރާތްތައް ދަފުތަރުވުމުގެ އުޞޫލު ބާޠިލުކޮށްފި

ބިޒްނަސް ސެންޓަރ ކޯޕަރޭޝަން، ބީސީސީން އެކުލަވާލި "އާމްދަނީ ހޯދުމުގެ ބޭނުމުގައި ގޭގައި ކާބޯތަކެތި އުފައްދާ ފަރާތްތައް ދަފުތަރުވުމުގެ އުސޫލު" ބާތިލުކޮށްފިއެވެ. މި ދަފްތަރުގައި ރަޖިސްޓްރީވުމަށް ހުޅުވާލާ އެކަމުގެ އުޞޫލު އާންމު ކުރީ މިއަހަރުގެ ފެބްރުއަރީމަހުގައެވެ. އެހެންނަމަވެސް މިހާރު ވަނީ އެ އުޞޫލު ބާތިލުކޮށްފައެވެ.

ބިޒްނަސް ސެންޓަރ ކޯޕަރޭޝަނުން ވިދާޅުވީ އެ އުޞޫލު ބާޠިލްކޮށްފައިވަނީ މޯލްޑިވްސް ފުޑް އެންޑް ޑްރަގް އޮތޯރިޓީއިން "އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކުމުގެ މަސައްކަތުގައި އަމަލު ކުރަންވީގޮތުގެ މިންގަނޑު" އެކުލަވާލުމާ ގުޅިގެންކަމަށެވެ. އަދި އެމްއެފްޑީއޭއިން ވަނީ "އަމިއްލަ ދިރިއުޅުމަށްޓަކައި ކާބޯތަކެތި އުފައްދައި ވިއްކުމުގެ މަސައްކަތްކުރާ ފަރާތްތައް ދަފްތަރުކުރުމުގެ އުސޫލުވެސް އެކުލަވާލުމަކީވެސް އެ އުސޫލުް ބާޠިލުކުރި ސަބަބެއްކަމަށް ބީސީސީން ވިދާޅުވިއެވެ.

އެމްއެފްޑީއޭއިން މިފަދަ މިންގަޑެއް އެކުލަވާލާފައި ވަނީ ފަހަކަށް އައިސް، ގޭގޭގައި ތައްޔާރުކޮށް ވިއްކާ ތަންތަނުގެ ސާފުތާހިރުކަން ކުޑަވުމުގެ ސަބަބުންނެވެ. ޚާއްޞަކޮށް، ބިދޭސީން ގަވާއިދާ ޚިލާފަށް ހިންގާ ވިޔަފާރިތައް ހުއްޓުވާ ސިއްޙީ ރައްކާތެރިކަން ކަށަވަރުކުރުމަށެވެ.

އެމްއެފްޑީއޭއިން އެކުލަވާލި މިންގަނޑުގައި ވަނީ ގޭގައި ކާބޯތަކެތި އުފައްދާ ފަރާތްތަކުން ދަފްތަރުގައި ހިމެނުމަށްޓަކައި، އީފާސް މެދުވެރިކޮށް ކާބޯތަކެތި އުފައްދާ ތަނާއި އުފައްދާ ތަކެއްޗާ ބެހޭ މަޢުލޫމާތު އެމްއެފްޑީއޭގެ "ދިރިތި" ޕޯޓަލަށް ހުށަހަޅަންޖެހޭނެ ކަމަށް އުސޫލުގައި ބަޔާންކޮށްފައިވެއެވެ. މީގެއިތުރުން، އެ އޮތޯރިޓީން ކަނޑައަޅާފައިވާ މިންގަނޑުތަކާ އެއްގޮތަށް ޢަމަލުކުރޭތޯ ބެލުމަށް ތަންތަން ޗެކްކުރާނެކަމަށާއި، ހުށަހަޅަންޖެހޭ ޗެކްލިސްޓާއި އިޤްރާރުތައް އަހަރަކު އެއްފަހަރު އެމްއެފްޑީއޭއަށް ހުށަހަޅަންޖެހޭނެކަމަށްވެސް އައު އުސޫލުގައި ބަޔާންކޮށްފައިވެއެވެ.