ކާރިސާތަކުގެ ސަބަބުން ދަނޑުވެރިންނަށް ލިބޭ ގެއްލުންތަކުގެ ބަދަލު ހޯދައިދިނުމަށް ސްކީމެއް

ޤުދުރަތީ ކާރިސާތަކުގެ ސަބަބުން ދަނޑުވެރިންނަށް ލިބޭ ގެއްލުންތަކުގެ ބަދަލު ހޯދައިދިނުމުގެ ގޮތުން އެލައިޑް އިންޝުއަރެންސްއިން ކްރޮޕް ތަކަފުލްގެ ނަމުގައި އައު އިންޝުއަރެންސް ސްކީމެއް ތަޢާރަފްކޮށްފިއެވެ.

ދަނޑުވެރިކަމާބެހޭ ވުޒާރާގައި ބޭއްވި މަޝްވަރާ ބައްދަލުވުމެއްގައި ވާހަކަދައްކަވަމުން ކްރޮޕް ތަކަފުލް އިންޝުއަރެންސް ސްކީމާ ބެހޭގޮތުން ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. ޢާއިޝަތު ރަމީލާ ވިދަޅުވީ، މި ސްކީމަކީ ދަނޑުވެރިންގެ ދިރިއުޅުމަށް ކުރިމަތިވާ ނުރައްކާތަކުން ރައްކާތެރިކަން ހޯދައިދިނުމަށް އެޅޭ މުހިންމު ފިޔަވަޅެއް ކަމަށެވެ.

ޑރ. ރަމީލާ ވިދާޅުވީ ކުރޮޕް ތަކަފުލް ސްކީމުގެ ދަށުން ބޯކޮށް ވިއްސާރަކުރުމާއި ފެންބޮޑުވެ، ވައި ގަދަވުންފަދަ ޤުދުރަތީ ކާރިސާތަކުގެ ސަބަބުން ދަނޑުވެރިންގެ ބިންތަކަށާއި އޭގެ އުފެއްދުންތަކަށް ލިބޭ ގެއްލުންތަކަށް ބަދަލު ލިބިދެވޭނެ ކަމަށެވެ. އަދި މި ސްކީމަކީ ދަނޑުވެރިކަމުގެ ދާއިރާއަށް އިތުރު އިންވެސްޓްމަންޓްތައް ގެނައުމަށް މަގުފަހިވާނެކަމެއްކަމަށްވެސް ވަޒީރު ވިދާޅުވިއެވެ.

ދަނޑުވެރިކަމާބެހޭ ވަޒީރު ވަނީ ކުރޮޕް ސްކީމާ ބެހޭގޮތުން ހޭލުންތެރިކަން އުފެއްދުމަށް ޚާއްސަ މަސައްކަތްތަކެއް ކުރުމަށްވެސް ނިންމާފައިވާކަމަށް ވިދާޅުވެފައެވެ.

ކްރޮޕް ތަކަފުލްގެ ދަށުން ކަވަރުކޮށްދޭނީ ފަޅޯ، ބަށި، ބަޓާނާ ބަރަބޯ، ކަރާ، ބަރަބޯ، ކިޔުކަމްބަރ، މެލަން އަދި ދޮންކެޔޮ ދަނޑުތަކަށް ދިމާވާ ގެއްލުންތަކެވެ. އެލައިޑްއިން ބުނީ މި ތަކަފުލްގެ ދަށުން ލިބޭ ގެއްލުންތަކުގެ ބަދަލު ދޭނީ ދަނޑަށް ގެއްލުންވާތާ 24 ގަޑިއިރުގެ ތެރޭގައި ރިޕޯޓުކޮށްފައިވާނަމަ ކަމަށެވެ. އަދި ދަނޑަށް ގެއްލުންވުމަށްފަހު އެލައިޑުގެ ފަރާތުން ލިބުނު ގެއްލުންތަކުގެ އިންސްޕެކްޝަނެއް ހަދާނެއެވެ. ގެއްލުމުގެ ބަދަލު ލިބޭނީ އިންސްޕެކްޝަނަށްފަހުއެވެ.