ޔަހޫދީ ފައުޖުން ލުބްނާންގެ ވެރިރަށް ބައިރޫތުގެ ދެކުނުގެ ސަރަޙައްދުތަކަށް ނުރައްކާތެރި ޙަމަލާތަކެއް ދީފިއެވެ. އެއީ, ޒަޔަނިސްޓު ދައުލަތުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ ދިރިއުޅޭ ގެއަށް ލުބްނާންގެ މުޖާހިދުންގެ ޖަމާޢަތް, ޙިޒްބުاللهން ޑްރޯން ޙަމަލާއެއް ދިނުމާ ގުޅިގެން އެ ކަމުގެ ބަދަލު ހިފުމުގެ ގޮތުން ދީފައިވާ ޙަމަލާތަކެކެވެ. ޒަޔަނިސްޓު ދައުލަތުގެ ވެރިރަށް ތެލް އަވީވުގެ ރަށްބޭރުގައި އޮންނަ ޤަޔިޞަރިއްޔާގައި ހުންނަ ނަތަންޔާހޫ ދިރިއުޅޭ ގެއަށް ޙިޒްބުاللهން ޑްރޯން ޙަމަލާ ދިން ވަގުތު އޭނާ އެ ތަނުގައި ނެތެވެ.
ނަތަންޔާހޫގެ ތަރުޖަމާނު ބުނީ, ޤަޔިޞަރިއްޔާއަށް ދީފައިވާ ޙަމަލާއަކީ ނަތަންޔާހޫ މަރައިލުމަށް އީރާނުން ފަހަތުގައި އޮވެގެން ދީފައިވާ ޙަމަލާއެއް ކަމަށް ދެކޭ ކަމުގައެވެ. އީރާނުން ވާގިވެރިވާ އެކްސިސް އޮފް ރެސިސްޓެންސްގައި ހިމެނޭ ޙިޒްބުاللهން ޤަޔިޞަރިއްޔާއަށް ޙަމަލާ ދީފައި ވަނީ, ޔަހޫދީ ފައުޖުން އީރާނަށް ނިރުބަވެރި ޙަމަލާތަކެއް ދިނުމަށް ތައްޔާރުވަމުންދާ ދަނޑިވަޅެއްގައެވެ. ޤަޔިޞަރިއްޔާގެ އިތުރުން ޒަޔަނިސްޓުންގެ މުހިންމު ރަށެއް ކަމުގައިވާ ޚައިފާއަށް ވެސް ޙިޒްބުاللهން ނުރައްކާތެރި ރޮކެޓު ޙަމަލާތަކެއް ދިނެވެ. އެ ޙަމަލާތަކުގައި އެކަކު މަރައިލައި, އިތުރު ނުވަ މީހުން ޒަޚަމު ކޮށްލިއެވެ.
ފަލަސްޠީނާއި ލުބްނާންގެ ރައްޔިތުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތަކާއި, ޖުލައި 31ވަނަ ދުވަހު އީރާނުގެ ވެރިރަށް ތަހްރާނަށް ދިން ނިރުބަވެރި ޙަމަލާގެ ބަދަލު ހިފުމަށް އީރާނުން ވެސް ވަނީ ދާދި ފަހުން ޔަހޫދީންނަށް އަމާޒުކޮށް ނުރައްކާތެރި ޙަމަލާތަކެއް ދީފައެވެ. އީރާނުގެ ބާރުގަދަ އިސްލާމީ އިންޤިލާބީ ލަޝްކަރު (އައިއާރްޖީސީ)ން އޮކްޓޫބަރު 1ވަނަ ދުވަހު 180އެއްހާ ބެލިސްޓިކް މިސައިލް ބޭނުން ކޮށްގެން ދިން ޙަމަލާތަކުގައި ޔަހޫދީންގެ ރަށްތަކަށް ބޮޑެތި ގެއްލުންތަކެއް ލިބުނެވެ. ޔަހޫދީން މި ވަގުތު ތައްޔާރުވަމުން ދަނީ އެ ޙަމަލާތަކުގެ ބަދަލު ހިފުމަށެވެ.
ބައިރޫތަށް ޙަމަލާ ދީފައި ވަނީ, ލުބްނާންގެ މުސްލިމުން ޝަހީދުކޮށް ނެތިކޮށްލަން ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުންނެވެ. ލުބްނާން ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 2,400އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 10,000އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.
ބައިރޫތުގެ އިތުރުން ފަލަސްޠީނުގެ ޣައްޒާއަށް ވެސް ޔަހޫދީ ފައުޖުން ވަނީ ރަޙުމު ކުޑަ ޙަމަލާތަކެއް ދީފައެވެ. ފާއިތުވި 24ވަރަކަށް ގަޑިއިރުގެ ތެރޭގައި ޣައްޒާއަށް ދީފައިވާ ޙަމަލާތަކުގައި 100އެއްހާ މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޚީ ޚިދުމަތްތެރިން ހާމަކުރިއެވެ. އޭގެ ތެރެއިން އެއް ޙަމަލާ އަމާޒު ކޮށްފައި ވަނީ ޣައްޒާގެ އުތުރުގައި އޮންނަ ބަޔިތު ލާޙިޔާގައި އެތަކެއް ސަތޭކަ ބަޔަކު ދިރިއުޅެމުން ދިޔަ އިމާރާތަކަށެވެ. އެ ޙަމަލާގައި 73 މީހުން ޝަހީދު ކޮށްލައި, ގިނަ އަދަދެއްގެ ބަޔަކު ޒަޚަމު ކޮށްލިއެވެ. އޭގެ ތެރޭގައި ގިނަ ޢަދަދެއްގެ ކުޑަކުދިން ހިމެނެއެވެ. ޣައްޒާގެ އޮފިޝަލުން ބުނީ, ބަޔިތު ލާޙިޔާއަށް ދިން ނިރުބަވެރި ޙަމަލާތަކުގައި ސުންނާފަތި ކޮށްލާފައިވާ އިމާރާތްތަކުގެ ދަށުގައި ގިނަ ޢަދަދެއްގެ ބަޔަކު ތާށިވެފައިވާ ކަމުގައެވެ. އަދި, ޝަހީދު ކޮށްލާފައިވާ މީހުންގެ އަދަދު އިތުރުވާނެ ކަމަށް ބެލެވޭ ކަމުގައެވެ.
އޮކްޓޫބަރު 17ވަނަ ދުވަހު ޣައްޒާގެ އެންމެ ދެކުނުގައި އޮތް ރަފަޙުގައި ޔަހޫދީ ފައުޖުން ހިންގި ޤަތުލުޢާންމުތަކުގެ ތެރެއިން ޣައްޒާގައި ވެރިކަން ކުރާ ޙަމާސްގެ ސިޔާސީ ގޮފީގެ ވެރިޔާ ޔަޙްޔާ އަލް-ސިންވާރު ޝަހީދު ކޮށްލިއެވެ. އޭނާ ޝަހީދު ކޮށްލުމާ ގުޅިގެން ޣައްޒާ ޢުދުވާނަށް ސުލްޙަވެރި ނިމުމެއް ގެނައުމަށް ކުރަމުންދާ މަސައްކަތްތަކަށް ވަނީ ހުރަސް އެޅިފައެވެ.
ހައްދުފަހަނަ އެޅި ނަތަންޔާހޫ ބުނީ ޣައްޒާގެ މުސްލިމުން ޝަހީދު ކުރަން ފަށާފައިވާ ޖަރީމާތައް ހުއްޓައިލުމުގެ ވިސްނުމެއް ނެތް ކަމުގައެވެ. އަދި, ޙަމާސުން ވެސް ވަނީ ޔަހޫދީންނާ ދެކޮޅަށް ޖިހާދު ކުރުމުގައި ދެމިއޮންނާނެ ކަމުގެ އިންޒާރު ދީފައެވެ. މަސްރަޙު ދިރާސާ ކުރާ ފަރާތްތަކުން ބުނީ, އެމެރިކާގެ ރިޔާސީ އިންތިޚާބު ބޯމަތިވެފައިވާ ދަނޑިވަޅެއްގައި, ޣައްޒާއިން ވީހާވެސް ގިނަ ޢަދަދެއްގެ ބަޔަކު ޝަހީދު ކޮށްލަން ނިރުބަވެރި ނަތަންުޔާހޫ އަމާޒު ހިފާފައިވާ ކަމުގައެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 42,519އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 99,637 މީހުން ޒަޚަމު ކޮށްލާފައެވެ.
ޔަހޫދީންގެ އެންމެ ބޮޑު މަދަދުގާރު, އެމެރިކާއިން ބުނީ އަސްކަރީ ހަރަކާތްތައް މަދު ކުރުމަށް ޔަހޫދީންގެ ކިބައިން އެދިފައިވާނެ ކަމުގައެވެ. އަދި, އެމެރިކާގެ ދިފާޢީ ވަޒީރު ލޮއިޑް އޮސްޓިން ވަނީ ބައިރޫތާއި އެ ރަށާ އިންވެގެން އޮތް ސަރަޙައްދުތަކަށް ޔަހޫދީ ފައުޖުން ދެމުންދާ ނިރުބަވެރި ޙަމަލާތަކުގެ އަދަދު މަދު ކުރަން ގޮވައިލައްވާފައެވެ. ނަމަވެސް, ޣައްޒާއާއި ލުބްނާންގެ މުސްލިމުންނާ ދެކޮޅަށް ޔަހޫދީ ފައުޖުން ދެމުންދާ ޙަމަލާތައް މެދުކެނޑުނަ ނުދިނުމަށް ވެސް އެމެރިކާއިން ދަނީ މަސައްކަތް ކުރަމުންނެވެ. ލާއިންސާނީ ޖަރީމާތަކުގައި ޔަހޫދީ ފައުޖުން ބޭނުން ކުރަމުންދާ ގިނަ އަދަދެއްގެ ނުރައްކާތެރި އަދި ފަނާކުރަނިވި ބޮންތަކާއި މިސައިލްތައް ފޯރުކޮށްދެމުން ދަނީ އެމެރިކާއިންނެވެ.