ސޫރިޔާގެ ވެރިރަށް ދިމިޝްޤާއި އެ ޤައުމުގެ ހުޅަނގުގައި އޮންނަ ޙުއްމުޞަށް ޔަހޫދީ ފައުޖުން ނިރުބަވެރި ޙަމަލާތަކެއް ދީފިއެވެ. ސޫރިޔާގެ ދިފާޢީ ވުޒާރާއިން ބުނީ, ޙުއްމުޞަށް ދީފައިވާ ޙަމަލާތައް އަމާޒު ކޮށްފައި ވަނީ އަސްކަރީ މަރުކަޒަކަށް ކަމުގައެވެ. ސޫރިޔާގެ ސިޔާދަތީ މިނިވަންކަމާއި އިސްތިޤުލާލަށް ބެލުމެއް ނެތި ޔަހޫދީ ފައުޖުން ނިރުބަވެރި ޙަމަލާތަކެއް ދީފައި ވަނީ, ޔަހޫދީންގެ އެ ފަދަ ޖަރީމާތަކާ ގުޅިގެން ހޫނުވެފައިވާ މެދުއިރުމަތީގެ މަސްރަޙު ފިނި ކުރުމަށް އެމެރިކާގެ ޚާރިޖީ ވަޒީރު އެންތަނީ ބްލިންކަން އެ ސަރަޙައްދުގެ ބަައެއް ޤައުމުތަކަށް ދަތުރުފުޅެއް ފަށްޓަވާފައިވާ ދަނޑިވަޅެއްގައެވެ.
ދިމިޝްޤަށް ޔަހޫދީ ފައުޖުން ދިން ޙަމަލާތައް އަމާޒު ކޮށްފައި ވަނީ ކަފަރުން ސޫސާއަށެވެ. ދިމިޝްޤުގެ އިތުރުން ޙުއްމުޞަށް ދީފައިވާ ޙަމަލާތަކުގައި ސޫރިޔާގެ އަސްކަރިއްޔާގެ ސިފައިންގެ މީހަކު ޝަހީދު ކޮށްލާފައިވާ ކަމަށާއި, އިތުރު ހަތް ސިފައިން ޒަޚަމު ކޮށްލާފައިވާ ކަމުގައި އެ ޤައުމުގެ ދިފާޢީ ވުޒާރާއިން ހާމަކުރިއެވެ. ޙަމަލާތަކުގައި ބޮޑެތި ގެއްލުންތަކެެއް ލިބުނު ކަމުގައި ވެސް އެ ވުޒާރާއިން ބުންޏެވެ.
ސޫރިޔާގެ ރަށްތަކަށް އަމާޒުކޮށް ދެމުންދާ އެ ފަދަ ނިރުބަވެރި ޙަމަލާތަކާ ގުޅޭ ގޮތުން އެއްޗެއް ހާމަކުރަން, އަދި އެ ޙަމަލާތަކުގެ ޒިންމާ އުފުލަން ވެސް ޔަހޫދީން ދަނީ ދެކޮޅު ހަދަމުންނެވެ. ނަމަވެސް, މީގެ އަހަރެއްހާ ދުވަސް ކުރިން ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ލާއިންސާނީ ޢުދުވާނެއް ފެށި ފަހުން, ޔަހޫދީ ފައުޖުން ސޫރިޔާއަށް ދޭ އެ ފަދަ ނިރުބަވެރި ޙަމަލާތައް އިތުރު ކޮށްފައިވެއެވެ.
ޣައްޒާގެ އިތުރުން ލުބްނާންގެ މުސްލިމުން ޝަހީދު ކޮށްލުމަށް ވެސް ޔަހޫދީ ފައުޖުން މި ވަގުތު ދަނީ ލާއިންސާނީ ޖަރީމާތަކެއް ހިންގަމުންނެވެ. ލުބްނާންގެ ވެރިރަށް ބައިރޫތާއި, އެ ޤައުމުގެ ދެކުނުގެ ސަރަޙައްދުތަކުގައި އިތުރުން އަލް-ބިޤާޢު ވާދީގެ ސަރަޙައްދުތަކަށް ޔަހޫދީ ފައުޖުން ބޮން އަޅަން ފަށާފައި ވަނީ ސެޕްޓެންބަރު 23ވަނަ ދުވަހުއެވެ. އެއަށް ފަހު, އޮކްޓޫބަރު 1ވަނަ ދުވަހު ޔަހޫދީ ފައުޖުގެ ހައްދުފަހަނަ އެޅި ސިފައިން ވަނީ ބަރުހަތިޔާރާއި އަސްކަރީ ޓޭންކުފަހަރާ އެކު ލުބްނާންގެ ދެކުނުގެ ރަށްތަކަށް އަރައިގަނެ, ޤަތުލުޢާންމުތައް އިތުރު ކޮށްފައެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ބައިރޫތުގެ ދެކުނުގެ ސަރަޙައްދުތަކަށް 17 ފަހަރު ނުރައްކާތެރި ޙަމަލާތަކެއް ދީފައިވާ ކަމުގައި އެ ޤައުމުގެ ޞިއްޙަތާ ބެހޭ ވުޒާރާއިން ހާމަކުރިއެވެ. އެ ޙަމަލާތަކުގައި އެކަކު ޝަހީދުކޮށްލައި, އިތުރު ފަސް މީހުން ޒަޚަމު ކޮށްލިއެވެ. ޒަޚަމު ކޮށްލާފައިވާ މީހުންގެ ތެރޭގައި ކުޑަ ކުއްޖަކު ވެސް ހިމެނެއެވެ. އެ ޙަމަލާތަކުގައި ޢާންމުން ދިރިއުޅޭ ހަ އިމާރާތެއް ސުންނާފަތިކޮށް ބިމާ ހަމަކޮށްލާފައިވާ ކަމުގައި ވެސް އެ ވުޒާރާއިން ބުންޏެވެ.
އޭގެ އިތުރުން, ދެކުނުގައި އޮތް ބިންތު ޖުބަޔިލަށް ދިން ޙަމަލާތަކެއްގައި އިތުރު ތިން މީހުން ޝަހީދު ކޮށްލާފައިވާއިރު, އޭގެ ތެރޭގައި ލުބްނާންގެ އަސްކަރިއްޔާގެ ސިފައިންގެ މީހަކު ވެސް ހިމެނެއެވެ. އަދި, ޔާތީރަށް ދިން ޙަމަލާއެއްގައި ލުބްނާންގެ ސިފައިން ތިން މީހަކު ޝަހީދު ކޮށްލައި, އިތުރު މީހަކު ޒަޚަމު ކޮށްލިއެވެ.
ޔަހޫދީންގެ ޙަމަލާތަކުގެ ރައްދުގައި ލުބްނާންގެ މުޖާހިދުންގެ ޖަމާޢަތް, ޙިޒްބުاللهން ވެސް ދަނީ ޒަޔަނިސްޓު ދައުލަތުގެ ރަށްތަކަށް ދެމުންދާ ޙަމަލާތައް އިތުރުކޮށް, ވަރުގަދަ ކުރަމުންނެވެ. އެ ޖަމާޢަތުން ބުނީ, ޔަހޫދީ ފައުޖުގެ އަމާޒުތަކަށް ދެމުންދާ ޙަމަލާތަކުގައި ޕްރިސިޝަން މިސައިލް ފަދަ ނުރައްކާތެރި ހަތިޔާރު ބޭނުން ކުރަން ފަށާފައިވާނެ ކަމުގައެވެ. އޭގެ އިތުރުން, އައު ވައްތަރެއްގެ އަސްކަރީ ޑްރޯނެއް ބޭނުން ކުރަން ފަށާފައިވާނެ ކަން ވެސް އެ ޖަމާޢަތުން ހާމަކުރިއެވެ. ފާއިތުވި 24 ގަޑިއިރުގެ ތެރޭގައި ޙިޒްބުاللهން ހަތަރު މިސައިލެއް ބޭނުން ކޮށްފައިވާ ކަން ޔަހޫދީ ފައުޖުން ކަށަވަރު ކޮށްދިނެވެ. އޭގެ ތެރެއިން ދެ މިސައިލް ދިފާޢު ވައްޓައިލި ނަމަވެސް, އަނެއް ދެ މިސައިލްގެ ސަބަބުން ބޮޑެތި ގެއްލުންތަކެއް ލިބުނެވެ.
ލުބްނާންގެ މުސްލިމުންނާ ދެކޮޅަށް ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 2,483އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 11,628އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.3 މިލިޔަނަށް ވަނީ އުފުލިފައެވެ. އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުމަތީގައި ކަމުގައެވެ.