ޔަހޫދީ ފައުޖުގެ ނިރުބަވެރި ސިފައިން ސޫރިޔާގެ ވެރިރަށް ދިމިޝްޤަށް ނިރުބަވެރި ޙަމަލާތަކެއްދީ، ޢާންމުންގެ ހަތް މީހުން ޝަހީދުކޮށްލައިފިއެވެ. ސޫރިޔާގެ ދިފާޢީ ވުޒާރާއިން ބުނީ، ޔަހޫދީ ފައުޖުގެ ވައިގެ ޙަމަލާތައް އަމާޒު ކޮށްފައި ވަނީ ދިމިޝްޤުގެ އަލް-ސައްޔިދާ ޒަޔިނަބު ޑިސްޓްރިކްޓުގައި ހުރި ޢާންމުން ދިރިއުޅޭ އިމާރާތަކަށް ކަމުގައެވެ. މިއީ، ފާއިތުވި ދެ ހަފުތާއެއްހާ ދުވަހުގެ ތެރޭގައި ޔަހޫދީ ފައުޖުން ދިމިޝްޤުގައި ޢާންމުން ދިރިއުޅޭ ސަރަޙައްދުތަކަށް ރަޙުމު ކުޑަ ޙަމަލާތަކެއް ދީފައިވާ ދެވަނަ ފަހަރެވެ.
ސޫރިޔާގެ ދިފާޢީ ވުޒާރާއިން ބުނީ، ޔަހޫދީންގެ ޙަމަލާގައި ޝަހީދު ކޮށްލާފައިވާ މީހުންގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭ ކަމުގައެވެ. އަދި، 20 ވަރަކަށް މީހުން ޒަޚަމު ކޮށްލާފައިވާ ކަމުގައެވެ. ދިމިޝްޤަށް ދިން ޙަމަލާގެ ޒިންމާ އުފުލަން ޔަހޫދީން ވަނީ ދެކޮޅު ހަދާފައެވެ. އެއީ، ސޫރިޔާއަށް ދޭ ޙަމަލާތަކާ މެދު ޔަހޫދީން އަބަދު ވެސް އަމަލު ކުރަމުންދާ ގޮތެވެ.
މިއީ، އަލް-ސައްޔިދާ ޒަޔިނަބު ޑިސްޓްރިކްޓަށް ޔަހޫދީ ފައުޖުގެ ނިރުބަވެރި ސިފައިން ޙަމަލާ ދީފައިވާ ފުރަތަމަ ފަހަރެއް ނޫނެވެ. އެއީ، ލުބްނާންގެ މުޖާހިދުންގެ ޖަމާޢަތް، ޙިޒްބުاللهގެ ގިނަ އަދަދެއްގެ މުޖާހިދުންގެ ހަރަކާތްތެރިވާ ކަމަށް ބެލެވޭ ސަރަޙައްދެކެވެ. ޙިޒްބުاللهއަކީ ސޫރިޔާގެ ރައީސް ބައްޝާރު ހާފިޛް އަލް-އަސަދުގެ ސަރުކާރަށް ވެސް ވާގިވެރިވާ ޖަމާޢަތެކެވެ.
2023 ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު، ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފެށުމުން، ޙިޒްބުاللهން ޒަޔަނިސްޓު އިސްރާއީލުގެ ރަށްތަކަށް ޙަމަލާ ދޭން ފެށިއެވެ. އަދި، އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީ ފައުޖުން ވެސް ޙިޒްބުاللهގެ އަމާޒުތަކަށް ޙަމަލާ ދޭން ފެށިއެވެ.
އެއަށްފަހު، ސެޕްޓެންބަރު 23ވަނަ ދުވަހު ޙިޒްބުالله ނައްތައިލުމުގެ ނަމުގައި ޔަހޫދީ ފައުޖުން ވަނީ ލުބްނާންގެ ރަށްތަކަށް ބޮންއަޅަން ފަށާފައެވެ. އެ ޙަމަލާތައް އަމާޒު ކުރަމުން ދަނީ ވެރިރަށް ބައިރޫތާއި، ދެކުނުގެ ރަށްތަކުގެ އިތުރުން އަލް-ބިޤާޢު ވާދީގެ ސަރަޙައްދުތަކަށެވެ. އަދި، އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން ވަނީ ބަރުހަތިޔާރާ އެކު ލުބްނާންގެ ދެކުނުގެ ރަށްތަކަށް އަރައިގަނެ، ޤަތުލުޢާންމު އިތުރުކޮށް، ފުޅާކޮށްފައެވެ.
ލުބްނާނަށް އެންމެ ފަހުން ދީފައިވާ ޙަމަލާތައް އަމާޒު ކޮށްފައި ވަނީ އަލް-ބިޤާޢު ވާދީގެ މީދޫނަށެވެ. އެ ރަށުގައި ޢާންމުން ދިރިއުޅޭ ގެއަކަށް އަމާޒުކޮށް ދިން ޙަމަލާތަކުގައި ތިން މީހުން ޝަހީދު ކޮށްލިއެވެ. އަދި، އެ ގެ ސުންނާފަތިކޮށް ބިމާ ހަމަކޮށްލިއެވެ. މީގެ އިތުރުން، ލުބްނާންގެ ދެކުނުގައި އޮތް އިޠާރަށާއި، އަލް-ނަބަޠިއްޔަތުގެ އިތުރުން ޝިމިޝްތާރާއި އިރުމަތީގައި އޮތް ބަޢަލަބަކައަށް ވެސް ޔަހޫދީ ފައުޖުން ބޮންއެޅިއެވެ. އެ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު ސާފެެއް ނޫނެވެ.
ލުބްނާންގެ އުތުރުގައި އޮތް ޢައިން ޔަޢުޤޫބަށް ވެސް ޔަހޫދީ ފައުޖުން ވަނީ ނިރުބަވެރި ޙަމަލާތަކެއްދީ، ޢާންމުންގެ 14 މީހުން ޝަހީދު ކޮށްލާފައެވެ. ލުބްނާންގެ ޞިއްޙަތާ ބެހޭ ވުޒާރާއިން ބުނީ، ފާއިތުވި 24 ގަޑިއިރުގެ ތެރޭގައި ޔަހޫދީ ފައުޖުން ދީފައިވާ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 54އަށް އުފުލިފައިވާ ކަމުގައެވެ.
ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,243އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 14,134އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.