ރަޝިޔާގެ ރަށްތަކަށް ޔޫކްރެއިނުން ދެމުންދާ ޙަމަލާތަކުގައި އެމެރިކާއިން ފޮނުވާ ނުރައްކާތެރި ހަތިޔާރުތައް ބޭނުން ކުރުމުގެ ހުއްދަ ދީފައިވާ ކަން ހާމަވެއްޖެއެވެ. 2022 ވަނަ އަހަރު ފެށި ރަޝިޔާ-ޔޫކްރެއިން ހަނގުރާމައިގައި ޔޫކްރެއިންގެ އެންމެ ބޮޑު މަދަދުގާރަކީ އެމެރިކާއާއި ހުޅަނގުގެ ސަލާމަތީ އިއްތިޙާދު (ނޭޓޯ)އެވެ. ޔޫކްރެއިނަށް އެންމެ ގިނަ އަދަދެއްގެ ހަތިޔާރު ފޯރުކޮށްދެމުން ދަނީ އެމެރިކާއިންނެވެ.
ހަނގުރާމަ ނިމުމަކަށް ގެނެވޭނެ އެންމެ އަވަސް ގޮތަކީ، ސަރަޙައްދީ ރޮނގު ހުރަސްކޮށް ރަޝިޔާގެ ރަށްތަކަށް ދެމުންދާ ޙަމަލާތައް އިތުރު ކުރުން ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންްސްކީ ޤަބޫލު ކުރައްވައެވެ. ޔޫކްރެއިނުން މިހާރު ވެސް ދަނީ ޑްރޯން ފަދަ ހަތިޔާރު ބޭނުން ކޮށްގެން ރަޝިޔާގެ ރަށްތަކަށް ޙަމަލާ ދެމުންނެވެ. އަދި، އެ ޙަމަލާތަކުގައި އެމެރިކާއިން ފޯރުކޮށްދެމުންދާ ދުރު-ރާސްތާ މިސައިލް ފަދަ ހަތިޔާރު ބޭނުން ކުރުމުގެ ހުއްދަ ހޯދުމަށް ޒެލެންސްކީ ގެންދަވަނީ އާދޭސް ދަންނަވަމުންނެވެ.
ނަން ހާމަކޮށްފައި ނުވާ އެމެރިކާ ސަރުކާރުގެ ދެ އޮފިޝަލަކާއި އިތުރު މަޞްދަރަކުން ވަނީ، އެމެރިކާއިން ފޮނުވަމުންދާ ހަތިޔާރު ބޭނުންކޮށްގެން ރަޝިޔާއަށް ޙަމަލާ ދިނުމުގެ ހުއްދަ ޔޫކްރެއިންގެ އަސްކަރިއްޔާއަށް ދީފައިވާ ކަން ހާމަކޮށްފައެވެ. އަދި، ކުރިއަށް އޮތް ދުވަސްތަކުގައި އެމެރިކާއިން ފޮނުވަމުންދާ ދުރު-ރާސްތާ މިސައިލް ފަދަ ހަތިޔާރު ބޭނުން ކޮށްގެން ރަޝިޔާގެ ރަށްތަކަށް ޙަމަލާ ދޭން ފަށާނެ ކަމުގައި ވެސް އެ މަޞްދަރުތަކުން ބުންޏެވެ.
މި ކަމުގެ ހުއްދަ، އެމެރިކާގެ ރައީސް ޖޯ ބައިޑަން ޔޫކްރެއިނަށް ދީފައި މި ވަނީ، އޭނާގެ ވެރިކަން ނިމުމަކާ ގާތްވެފައިވާ ދަނޑިވަޅެއްގައެވެ. ނޮވެންބަރު 5ވަނަ ދުވަހު އެމެރިކާގައި ބޭއްވި ރިޔާސީ އިންތިޚާބު ކާމިޔާބު ކުރައްވާފައި ވަނީ އިދިކޮޅު ރިޕަބްލިކަން ޕާޓީގެ ކެނޑިޑޭޓު، ކުރީގެ ރައީސް ޑޮނަލްޑް ޓްރަމްޕެވެ. އޭނާއަކީ ރަޝިޔާ-ޔޫކްރެއިން ހަނގުރާމައިގެ އިތުރުން އެމެރިކާއިން ޔޫކްރެއިނަށް ހަތިޔާރު ފޯރުކޮށްދިނުމާ ދެކޮޅު ބޭފުޅެކެވެ. އަދި، އޭނާގެ ވެރިކަމުގައި ޔޫކްރެއިނަށް ހަތިޔާރު ފޯރުކޮށްދިނުން ހުއްޓައިލުން، ނުވަތަ ހަތިޔާރު ފޮނުވާ މިންވަރު މަދު ކުރުމަކީ އެކަށީގެންވާ ކަމެއް ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
މީގެ ކުރިން އެމެރިކާއިން ޔޫކްރެއިނަށް ހަތިޔާރު ފޯރުކޮށްދެމުން ގޮސްފައި ވަނީ ޝަރުޠުތަކަކާ އެކުގައެވެ. އޭގެ ތެރޭގައި، ސަރަޙައްދީ ރޮނގު ހުރަސްކޮށް ރަޝިޔާގެ ރަށްތަކަށް ދޭ ޙަމަލާތަކުގައި އެމެރިކާއިން ފޯރުކޮށްދީފައިވާ ހަތިޔާރު ބޭނުން ނުކުރުން ހިމެނެއެވެ. ނަމަވެސް، ބައިޑަންގެ އެ ސިޔާސަތު ބަދަލު ކުރައްވާފައި މި ވަނީ، އުތުރު ކޮރެޔާ (ޑީޕީއާރްކޭ)ގެ ސިފައިން ރަޝިޔާއަށް ފޮނުވުމާ ގުޅިގެން ކަމުގައި މަޞްދަރުތަކުން ބުންޏެވެ.
ޑީޕީއާރްކޭގެ ސިފައިން ރަޝިޔާގައި ތިބި ކަމަށް ތުހުމަތު ކުރަމުންދާ ޤައުމުތަކުގެ ތެރޭގައި އެމެރިކާއާއި ޔޫކްރެއިންގެ އިތުރުން ދެކުނު ކޮރެޔާ، ވިލާތުގެ އިއްތިޙާދު (އީޔޫ) އަދި ނޭޓޯގެ މެންބަރު ޤައުމުތަކަށް ހިމެނެއެވެ. އެމެރިކާއިން ބުނާ ގޮތުގައި ރަޝިޔާގައި ޑީޕީއާރްކޭގެ 10,000އެއްހާ ސިފައިން ދަނީ ހަރަކާތްތެރިވަމުންނެވެ. އަދި، ޔޫކްރެއިންގެ ޖާސޫސީ އިދާރާއިން ބުނީ، އޭގެ ތެރެއިން ގިނަ ސިފައިން ތިބީ، ރަޝިޔާގެ ހުޅަނގުގައި އޮތް ކޫރްސްކް ސަރަޙައްދުގައި ކަމުގައެވެ. ކޫރްސްކަކީ އޮގަސްޓް 6ވަނަ ދުވަހު ޔޫކްރެއިންގެ ސިފައިން އަރައިގަނެފައިވާ ރަޝިޔާގެ ސަރަޙައްދެކެވެ. އެ ސަރަޙައްދުގެ ބައެއް ރަށްތަކާއި އަވަށްތައް މި ވަގުތު އޮތީ ޔޫކްރެއިންގެ ބާރުގެ ދަށުގައެވެ.
"މިއަދު، މީޑިޔާތަކުން ރިޕޯޓު ކުރަމުން އެ ދަނީ އަޅުގަނޑުމެންނަށް އެކަށީގެންވާ ފިޔަވަޅުތައް އެޅުމުގެ ހުއްދަ ލިިބިފައިވާ ކަމަށް. ނަމަވެސް، ޙަމަލާތައް ދޭނީ ބަހަކުން ނޫން. އެއީ، އިޢުލާނު ކުރެވޭނެ ކަމެއް ނޫން،" ޒެލެންސްކީ ވިދާޅުވިއެވެ. މި ކަމާ ގުޅޭ ގޮތުން ވަކި އެއްޗެއް ހާމަކުރަން ވައިޓް ހައުސުންނާއި އެމެރިކާގެ ޚާރިޖީ ވުޒާރާއިން ވަނީ ދެކޮޅު ހަދާފައެވެ. މި ކަމާ ގުޅޭ ގޮތުން ރަޝިޔާއިން ވެސް ވަކި އެއްޗެއް ހާމަކޮށްފައެއް ނެތެވެ.
ނަމަވެސް، މިއީ ވަރަށް ނުރައްކާތެރި ނިންމުމެއްގެ ގޮތުގައި ރަޝިޔާގެ ޤާނޫނު ހަދާ މަޖިލީހުގެ މެންބަރެއް ކަމުގައިވާ ވްލަޑިނިޔަރ ޖްރަބާރަފް ސިފަ ކުރެއްވިއެވެ. އަދި، ވޮޝިންގޓަނުގެ ނިންމުމާ އެކު ތިންވަނަ ބޮޑު ހަނގުރާމަ ފެށުމުގެ ނުރައްކާތެރިކަން އޮތް ކަމުގައި ވެސް އޭނާ ވިދާޅުވިއެވެ.
ރަޝިޔާގެ ރަށްތަކަށް ދެމުންދާ ޙަމަލާތަކުގައި އެމެރިކާގެ ހަތިޔާރު ބޭނުން ކުރުމުގެ ހުއްދަ ދީފައި މި ވަނީ، ރަޝިޔާ-ޔޫކްރެއިން ހަނގުރާމަ ހުއްޓުމަކަށް ގެނައުމަށް އެމެރިކާގެ އިންތިޚާބީ-ރައީސް ޓްރަމްޕް އިސްވެ ފަށްޓަވާ ސުލްޙައިގެ މަޝްވަރާތަކުގައި ބައިވެރިވާން ތައްޔާރަށް އޮތް ކަން ރަޝިޔާއިން ހާމަކޮށްފައިވާ ދަނޑިވަޅެއްގައެވެ. މި ކަން ހާމަކުރައްވާފައި ވަނީ ޖެނީވާގައި ހުންނަ އދގެ އޮފީހަށް ކަނޑައަޅާފައި ހުންނަވާ ރަޝިޔާގެ ސަފީރު ގިނާޑީ ގަތިލޮފެވެ. އޭނާ ވިދާޅުވީ، ހަނގުރާމައިގެ މައިދާނުގައި ރަޝިޔާއިން ހޯދާފައިވާ ކުރިއެރުންތަކަށް ޓްރަމްޕް ފަށްޓަވާ މަޝްވަރާތަކުގައި ރިއާޔަތް ކުރަން ޖެހޭނެ ކަމުގައެވެ.
އަދި، ސުލްޙައިގެ މަޝްވަރާތަކުގައި ރަޝިޔާއިން ބައިވެރިވާނީ، ހަނގުރާމައިގެ މައިދާނުގެ ޙަޤީޤަތްތަކަށް ބިނާކޮށް ކަމުގައެވެ. މީގެ އިތުރުން، ދެ އަހަރާއި ހަ މަހަށް ދެމިގެން ގޮސްފައިވާ ހަނގުރާމައިގައި ޔޫކްރެއިންގެ ސިފައިން ފަހަތަށް ޖެހެމުންދާ ކަމުގައި ވެސް އޭނާ ވިދާޅުވިއެވެ. މި އަހަރުގެ ތެރޭގައި ރަޝިޔާގެ ސިފައިން ދަނީ ބޮޑެތި ކުރިއެރުންތަކެއް ހޯދަމުންނެވެ. އަދި، ޔޫކްރެއިންގެ ބިމުގެ ފަސްބައިކުޅަ އެއްބައި މި ވަގުތު އޮތީ ރަޝިޔާގެ ކޮންޓުރޯލުގެ ދަށުގައެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ހަނގުރާމައިގެ ތެރެއިން ރަޝިޔާގެ ފައުޖުތަކުން ވަނީ ޔޫކްރެއިންގެ ބިމުން %18ށް އަތްގަދަ ކޮށްފައެވެ. އޭގެ ތެރޭގައި, އިރުމަތީ ދޮންބާސްގެ %80އާއި, ދެކުނުގައި އޮތް ޒަޕޮރީޜިޔާއާއި ޚަރްސަންގެ %70 ހިމެނެއެވެ. ޔޫކްރެއިންގެ އެންމެ ދެކުނުން އޮތް ކްރައިމިޔާއަށް ރަޝިޔާއިން އަތްގަދަ ކޮށްފައި ވަނީ 2014ވަނަ އަހަރުއެވެ.