ރާއްޖެއަކީ އިސްލާމިކް ފައިނޭންސްގެ ހަބަކަށް ހެދުމުގެ މަސައްކަތްދަނީ ކުރެވެމުން: މާލީ ވަޒީރު
-
އިސްލާމިކް ފައިނޭންސްގެ ހަބަކަށް ރާއްޖެ ހެދުމަކީ މިސަރުކާރުގެ މުހިންމު ތަސައްވަރެއް
ރާއްޖެއަކީ އިސްލާމިކް ފައިނޭންސްގެ ހަބަކަށް ހެދުމަށްޓަކައި މަސައްކަތްކުރަމުންދާ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
ވަޒީރު މިހެން ވިދާޅުވީ ޕީއެސްއެމް ނިއުސްއިން ގެނެސްދޭ "ހަފްތާ 52" އަށް ދެއްވި ޚާއްސަ އިންޓަވިއުގައެވެ.
ރާއްޖެއަކީ މިސަރަހައްދުގެ އިސްލާމިކް ފައިސޭންސް ހަބަކަށް ހެދުމަކީ މިސަރުކާރުގެ މުހިންމު ތަސައްވުރެކެވެ. މިކަމާ ގުޅޭ މައުލޫމާތު ހިއްސާކުރައްވަމުން މާލީ ވަޒީރު މޫސާ ޒަމީރު ވިދާޅުވީ މާލީ ވުޒާރާގެތެރޭގައި މިކަމަށް ވަކި ޑިޕާޓްމަންޓެއް ހަދާފައިވާ ކަމަށެވެ.
އަދި އުސޫލުތަކާއި އެއްގޮތަށް ޝަރީޢާ އެޑްވައިޒަރީ ކޮމެޓީއެއް ގާއިމްކޮށްފައިވާ ކަމަށާއި އިސްލާމިކް ޓީބިލް ވަސީލަތްތައްވެސް ފުޅާކުރުމަށް މަސައްކަތްކުރަމުންދާ ކަމަށް ވަޒީރު ވިދާޅުވިއެވެ.
މީގެއިތުރުން ސަރުކާރުގެ ފުރަތަމަ ސުކޫކު އިޝޫކުރުމަށްވެސް ތައްޔާރުވަމުންދާ ކަމަށް ވިދާޅުވިއެވެ.
"ލިސްޓުކުރާ އަދި ސަރުކާރު ނިސްބަތްވާ ފުރަތަމަ ސުކޫކު، ސީއެމްޑީއޭ، މޯލްޑިވްސް ސްޓޮކް އެކްސްޗޭންޖުން ހުއްދަ ނަގައިގެން، މިހާރު ތައްޔާރުވެފައިވަނީ އެ ސުކޫކު އިޝޫކުރުމަށް، އަދި އިސްލާމިކް އުސޫލުތަކުގެތެރެއިން ފަންޑުތައް ގާއިމްކުރުމަށްވެސް ދަނީ މަސައްކަތްކުރަމުން،" ވަޒީރު ޒަމީރު ވިދާޅުވިއެވެ.
މާލީ ވަޒީރު ޒަމީރު ވިދާޅުވީ އިސްލާމިކް ފައިނޭންސާއި ގުޅޭ ގޮތުން އާއްމުންގެ ހޭލުންތެރިކަން އިތުރުކުރުމަށްވެސް މުހިންމު މަސައްކަތްތަކެއް ކުރެވެމުންދާ ކަމަށެވެ. އަދި މިކަމުގެ ނަތީޖާ ކައިރި މުސްތަގްބަލެއްގައި ފެންނާނެ ކަމަށް ވަޒީރު ވިދާޅުވިއެވެ.