ޣައްޒާ ހަނގުރާމަ ހުއްޓާލުމަށް ގޮވާލާ ހުށަހެޅި ގަރާރެއް އަނެއްކާވެސް އެމެރިކާއިން ވީޓޯ ކޮށްފި

ޔަހޫދީ އިސްރާއިލު ދައުލަތުން ފަލަސްތީނުގެ ޣައްޒާއަށް ދެމުންދާ ހަމަލާތައް ހުއްޓާލައި ޣައްޒާގެ ހަނގުރާމަ ހުއްޓާލުމަށް ގޮވާލާ އދގެ ސަލާމަތީ މަޖިލީހުން ހުށަހެޅި ގަރާރެއް އަނެއްކާވެސް އެމެރިކާއިން ވީޓޯ ކޮށްފިއެވެ. ބުދަ ދުވަހު ހުށަހެޅި އެ ގަރާރާ ދެކޮޅަށް ވޯޓު ދީފައި ވަނީ ހަމަ އެކަނި އެމެރިކާއިންނެވެ. އެމެރިކާއިން ވަނީ ސަލާމަތީ މަޖިލީހުގެ ދާއިމީ މެމްބަރެއްގެ ގޮތުގައި އެގައުމަށް ލިބިފައިވާ ބާރު ބޭނުންކޮށް، ގަރާރު ފާސް ކުރުރުމަށް ހުރަސް އަޅާފައެވެ.

ސަލާމަތީ މަޖިލީހަށް، އެ ގަރާރު ހުށަ ހަޅާފައި ވަނީ އެ މަޖިލީހުގައި ހިމެނޭ ދާއިމީ ނޫން 10 މެންބަރު ގައުމުންނެވެ. އެ ގަރާރުގައި ވަނީ 13 މަސް ދުވަހަށްވުރެ ގިނަ ދުވަސްވެފައި ވަނީ ޣައްޒާ ހަނގުރާމަ ވަގުތުން ވަގުތައް، އިތުރު ޝަރުތަކާ ނުލައި ދާއިމީކޮށް އެކީ އެކައްޗަކަށް ހުއްޓާލަން ގޮވާލާފައެވެ. އަދި ހަމާސުން ރަހީނުކޮށްފައިވާ މީހުން ދޫކޮށްލުމަށް އެ 10 ގައުމުން ވަނީ ވަކިން ގޮވާލާފައެވެ. އެމެރިކާއިން ގަރާރު ވީޓޯ ކުރުމާއެކު، ގަރާރު ހުށަހެޅި ގައުމުތައް ކަމަށްވާ އަލްޖީރިއާ، އިކުއެޑޯ، ގަޔާނާ، ޖަޕާން، މަލްޓާ، މޮޒެމްބިކް، ދެކުނު ކޮރެއާ، ސިއެރާ ލިއޯން، ސްލޮވޭނިއާ އަދި ސްވިޒަލޭންޑް އިން ވަނީ އެމެރިކާއަށް ފާޑުކިޔާފައެވެ.

އެމެރިކާއިން އދ. އަށް ކަނޑައަޅުއްވާފައި ހުންނަވާ ޑެޕިއުޓީ އެމްބެސެޑަރ ރޮބަރޓް ވޫޑް ވަނީ ޣައްޒާ ހަނގުރާމަ ހުއްޓާލުމަށް ގޮވާލާއި ހުށަހަޅާ ގަރާރުތަކުގެ ތެރެއިން އެމެރިކާއިން ތާއިދު ކުރާނީ ހުރިހާ ރަހީނުން މިނިވަން ކުރުމަށް ގޮވާލާ އެކަން ހިމަނާފައިވާ ގަރާރަކަށް ކަން އެގައުމުން ވަރަށް ސާފުކޮށް ހާމަކޮށްފައިވާނެ ކަމަށް ވިދާޅުވެފައެވެ. އަދި ހަނގުރާމައަށް ދިގުދެމިގެންދާ ނިމުމެއް ގެންނަން ބޭނުން ނަމަ، ރަހީނުން މިނިވަން ކުރަން ޖެހޭ ކަމަށާއި މިދެކަމަށް ގޮވާލަން ޖެހެނީ އެކުގައި ކަމަށް އޭނާ ވިދާޅުވިއެވެ. އޭނާ ވަނީ މިއީ ވަކިވަކިން ހާސިލު ނުކުރެވޭނެ ދެކަންތައް ކަމަށް ވެސް ވިދާޅުވެފައެވެ.

އެމެރިކާއިން އެ ގަރާރު ވީޓޯ ކުރީ މިސަބަބަށް ކަމަށާއި އެ ފަދަ ގަރާރެއް ފާސްކޮށްފި ނަމަ، ހަމާސަށް އެދެވެނީ ވަރަށް "ނުރައްކާތެރި މެސެޖެއް" ކަމަށްވެސް ވޫޑް ވިދާޅުވިއެވެ. އެނާ ވިދާޅުވީ އެ ގަރާރުން ހަމާސަށް ދޭން ބޭނުންވި މެސެޖަކީ ދެން ހަމާސުން "އެނބުރި މަޝްވަރާގެ މޭޒަށް އަންނަން ނުޖެހޭ" ކަމަށެވެ. އެހެން ކަމުން އެއީ އެމެރިކާއިން އެއްވެސް ގޮތަކަށް ތައީދު ކުރާނެ ގަރާރެއް ނޫންކަމަށް އެނާ ވިދާޅުވިއެވެ.

މިދިޔަ އަހަރުގެ އޮކްޓޫބަރުން މަހުން ފެށިގެން ޔަހޫދީ ދައުލަތުން ޣައްޒާއަށް ދެމުންދާ ހަމަލާތަކުގައި 44،000 އަށް ވުރެ ގިނަ ރައްޔިތުން ވަނީ ޝަހީދުކޮށްލާފައެވެ. މުޅި ޣައްޒާހެން ފުނޑުފުނޑު ކޮށްލާފައިވާ އިރު، ޣައްޒާގެ ރައްޔިތުން ވަނީ ގެދޮރު ގެއްލި ދާނެ އިތުރު ތަނެއް ނެތި ތާށިވެފައެވެ.