ހަމަލާތައް ހުއްޓާލަން އެއްބަސްވުމުން ނޫނީ ރަހީނުން މިނިވަންކުރުމުގެ އެއްބަސްވުމަކަށް ނުދާނަން: ޙަމާސް

ޔަހޫދީ ދައުލަތުން ޣައްޒާއަށް ދެމުންދާ ލާއިންސާނީ ހަމަލާތައް ހުއްޓާލަން އެއްބަސްވުމުން ނޫނީ ރަހީނުން މިނިވަންކުރުމުގެ އެއްބަސްވުމަކަށް ނުދާނެކަމަށް ޣައްޒާގެ މިނިވަންކަމަށް ޖިހާދު ކުރާ ޙަމާސް ޖަމާއަތުން ބުނެފިއެވެ. ބުދަ ދުވަހު ޓީވީ މެދުވެރިކޮށް ދެއްވި މެސެޖެއްގައި ޙަމާސްގެ ލީޑަރުކަމާ ވަގުތީގޮތުން ހަވާލުވެވަޑައިގެން ހުންނެވި ޚަލިލް އަލް-ޙައްޔާ ވަނީ އެޖަމާއަތުން ރަހީނުކޮށްފައިވާ ޔަހޫދީ ރައްޔިތުންނާއި ޔަހޫދީ ދައުލަތުން ހައްޔަރުކޮށްފައިވާ ފަލަސްތީނުގެ ރައްޔިތުން މިނިވަންކުރުމަށް، ރަހީނުން ބަދަލުކުރުމުގެ އެއްބަސްވުމަކަށް ދާނީ ޣައްޒާއަށް ދެމުންދާ ހަމަލާތައް ހުއްޓާލުމަށް ޔަހޫދީން އެއްބަސްވުމުން ކަމަށް ވިދާޅުވެފައެވެ.

އޭނާ ވަނީ ޔަހޫދީންގެ ދުވާނީ އަމަލުތައް ނުހުއްޓާނަމަ، އެކަމާ ދެކޮޅަށް ހަމާސުން ކުރަމުންދާ މަސައްކަތްތައްވެސް ނުހުއްޓާނެ ކަމަށް ވިދާޅުވެފައެވެ. އަދި އެހަމަލާތައް ނުހުއްޓާނަމަ، ރަހީނުކޮށްފައިވާ މީހުން ހަމާސުން މިނިވަންކުރާނީ ކީއްވެތޯވެސް އޭނާ ވަނީ ސުވާލު އުފައްދަވާފައެވެ. ހައްޔާ ވަނީ ހަނގުރާމައެއް ކުރިއަށް ދާއިރު، ލިބިފައިވާ ވަރުގަދަ ކާޑެއް، އެނގިހުރި ގެއްލުވާލާނެ އެއްވެސް މީހަކު ނުހުންނާނެ ކަމަށާއި އެފަދަ ކަމެއް ކުރާނީ މޮޔަ މީހަކު ކަމަށްވެސް ވިދާޅުވެފައެވެ.

ޣައްޒާއަށް ދެމުންދާ ހަމަލާތައް ހުއްޓާލުމަށް ކުރަމުންދިޔަ މަޝްވަރާތައް ހުއްޓުމަކަށް އައިސްފައިވާ އިރު، ހަނގުރާމަ ހުއްޓާލުމަށް ގޮވާލާ އދ.ގެ ސަލާމަތީ މަޖިލީހަށް ހުށަހެޅި ގަރާރެއް އެމެރިކާއިން ވަނީ އަނެއްކާވެސް ވީޓޯ ކޮށްފައެވެ. އެމެރިކާއިން އެ ގަރާރު ވީޓޯ ކޮށްފައި ވަނީ ޣައްޒާ ހަނގުރާމަ ހުއްޓާލުމަށް ގޮވާލާއި ހުށަހަޅާ ގަރާރުތަކުގެ ތެރެއިން އެގައުމުން ތާއިދު ކުރާނީ ހުރިހާ ރަހީނުން މިނިވަން ކުރުމަށް ގޮވާލާ އެކަން ހިމަނާފައިވާ ގަރާރަކަށް ކަމަށް ބުނެއެވެ. އަދި ހަނގުރާމައަށް ދިގުދެމިގެންދާ ނިމުމެއް ގެންނަން ބޭނުން ނަމަ، ރަހީނުން މިނިވަން ކުރަން ޖެހޭ ކަމަށާއި މިދެކަމަށް ގޮވާލަން ޖެހެނީ އެކުގައި ކަމަށާއި މިއީ ވަކިވަކިން ހާސިލު ކުރެވޭ ދެކަންތައް ނޫން ކަމަށް އެމެރިކާއިން ބުނެއެވެ.

ޤަތަރާއި މިސްރު މެދުވެރިއެއްގެ ރޯލު އަދާކޮށް ކުރަމުންދާ ސުލްހައިގެ މަޝްވަރާތަކަށް ކުރިއެރުމެއް ނުލިބެނީ ޔަހޫދީ ބޮޑުވަޒީރު ބެންޖަމިން ނަތަންޔާހޫގެ ސަބަބުން ކަމަށް ޙައްޔާ ވަނީ ވިދާޅުވެފައެވެ.

މިދިޔަ އަހަރުގެ އޮކްޓޫބަރުން މަހުން ފެށިގެން ޔަހޫދީ ދައުލަތުން ޣައްޒާއަށް ދެމުންދާ ހަމަލާތަކުގައި 44،000 އަށް ވުރެ ގިނަ ރައްޔިތުން ވަނީ ޝަހީދުކޮށްލާފައެވެ. މުޅި ޣައްޒާހެން ފުނޑުފުނޑު ކޮށްލާފައިވާ އިރު، ޣައްޒާގެ ރައްޔިތުން ވަނީ ގެދޮރު ގެއްލި ދާނެ އިތުރު ތަނެއް ނެތި ތާށިވެފައެވެ.