ޔޫކްރެއިންގެ އިރުއުތުރުގައި އޮންނަ ސޫމީ ސަރަޙައްދަށް ރަޝިޔާއިން ދިން ޑްރޯން ޙަމަލާތަކެއްގައި ޢާންމުންގެ ދެ މީހުން މަރުވެއްޖެއެވެ. ސޫމީގެ އޮފިޝަލުން ބުނީ ރަޝިޔާގެ އަސްކަރިއްޔާއިން ޑްރޯން ޙަމަލާތައް އަމާޒު ކޮށްފައި ވަނީ އެޕާޓްމަންޓް އިމާރާތްތަކަކަށް ކަމުގައެވެ. އަދި، އެ ޙަމަލާތަކުގައި އިތުރު 12 މީހުން ޒަޚަމުވި ކަމުގައެވެ.
ރަޝިޔާގެ ޙަމަލާތަކުގައި އާންމުން ދިރިއުޅޭ 12 އެޕާޓްމަންޓެއްގެ އިތުރުން، ފަސް ގެއަކާއި، ފިހާރައަކާއި ގިނަ އަދަދެއްގެ އެއްގަމު އުޅަނދަށް ގެއްލުންވި ކަމުގައި ސޫމީގެ ކަމާގުޅޭ އިދާރާތަކުން ބުންޏެވެ. އެ ސަރަޙައްދުތަކަށް ޙަަމަލާ ދިނުމަށް ރަޝިޔާއިން ތިން އަސްކަރީ ޑްރޯން ބޭނުން ކޮށްފައިވެއެވެ.
ހުސްވި ހަފުތާއިން ފެށިގެން ރަޝިޔާއިން ދަނީ ސޫމީގެ އެކި ސަރަޙައްދުތަކަށް ޙަމަލާތައް އަމާޒު ކުރަމުންނެވެ. އޭގެ ތެރެއިން އެންމެ ގިނަ ޙަމަލާތައް ދީފައި ވަނީ ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކާއި ވިއުގައަށެވެ. އޭގެ ތެރެއިން ހޫޝިވް ކިޔާ ރަށަކަށް އަމާޒުކޮށް ދީފައިވާ ޙަމަލާތަކެއްގައި ޢާންމުންގެ 12 މީހުން މަރުވިއެވެ. އޭގެ ތެރޭގައި ކުޑަ ކުއްޖަކު ހިމެނޭ ކަމުގައި ވެސް އެ ރަށުގެ އޮފިޝަލުން ހާމަކުރިއެވެ. އަދި، ސޫމީއަށް ދިން އެހެން ޙަމަލާތަކެއްގައި ޢާންމުންގެ 11 މީހުން މަރުވެ، އިތުރު 89 މީހުން ޒަޚަމުވިއެވެ.
ރަޝިޔާއިން ސޫމީއަށް ޙަމަލާތަކެއް ދީފައި މި ވަނީ، ޔޫކްރެއިނުން ވެސް ރަޝިޔާގެ ރަށްތަކަށް އަމާޒުކޮށް ނުރައްކާތެރި ޙަމަލާތަކެއް ދޭން ފަށާފައިވާ ދަނޑިވަޅެއްގައެވެ. އެ ޙަމަލާތަކުގައި ޔޫކްރެއިނުން ދަނީ އެމެރިކާއިން ފޯރުކޮށްމުންދާ ދުރު-ރާސްތާގެ މިސައިލްތައް ބޭނުން ކުރަމުންނެވެ. އެ ފަދަ ހަތިޔާރު ބޭނުން ކުރުމުގެ ހުއްދަ އެމެރިކާގެ ރައީސް ޖޯ ބައިޑަން ޔޫކްރެއިނަށް ދީފައި ވަނީ ހުސްވި ހަފުތާގައެވެ.
ރަޝިޔާއިން ބުނީ، އެ ޤައުމުގެ ބްރިޔަންސްކް ސަރަޙައްދަށް ޙަމަލާ ދިނުމަށް ހަ މިސައިލް ބޭނުން ކޮށްފައިވާ ކަމުގައެވެ. އަދި، އޭގެ ތެރެއިން ފަސް މިސައިލް ދިފާޢުކޮށް ވައްޓައިލާފައިވާނެ ކަމުގައެވެ. އޭގެ ތެރެއިން އެއް މިސައިލުގެ ބައިތަކެއް ވެއްޓި، ރަޝިޔާގެ އަސްކަރީ މަރުކަޒެއްގައި އަލިފާނުގެ ހާދިސާއެއް ހިނގިއެވެ. ނަމަވެސް، އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ރަޝިޔާއިން ބުންޏެވެ.
ރަޝިޔާއާ ދެކޮޅަށް ޔޫކްރެއިނުން ކުރަމުންދާ ހަނގުރާމައިގައި ޔޫކްރެއިންގެ އެންމެ ބޮޑު މަދަދުގާރަކީ އެމެރިކާއެވެ. މިއީ، 'ޕްރޮކްސީ'އެއް ނުވަތަ މެދުވެރިއެއްގެ ގޮތުގައި ޔޫކްރެއިން ބޭނުން ކޮށްގެން، އެމެެރިކާއާއި ހުޅަނގުގެ ދިފާޢީ އިއްތިޙާދު (ނޭޓޯ)ން ރަޝިޔާއާ ދެކޮޅަށް ކުރަމުންދާ ހަނގުރާމައެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަ ކުރެއެވެ. ޔޫކްރެއިނުން ބޭނުން ކުރަމުންދާ ޒަމާނީ ހަތިިޔާރުތަކަކީ އެމެރިކާއާއި ނޭޓޯއިން މެދުކެނޑުމެއް ނެތި ފޯރުކޮށްދެމުންދާ ތަކެއްޗެވެ.
2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ހަނގުރާމައިގެ ތެރެއިން ރަޝިޔާގެ ފައުޖުތަކުން ވަނީ ޔޫކްރެއިންގެ ބިމުން %18ށް އަތްގަދަ ކޮށްފައެވެ. އޭގެ ތެރޭގައި, އިރުމަތީ ދޮންބާސްގެ %80އާއި, ދެކުނުގައި އޮތް ޒަޕޮރީޜިޔާއާއި ޚަރްސަންގެ %70 ހިމެނެއެވެ. ޔޫކްރެއިންގެ އެންމެ ދެކުނުން އޮތް ކްރައިމިޔާއަށް ރަޝިޔާއިން އަތްގަދަ ކޮށްފައި ވަނީ 2014ވަނަ އަހަރުއެވެ. ރަޝިޔާގެ ހުޅަނގުގައި އޮތް ކޫރްސްކް ސަރަޙައްދަށް އަރައިގަނެ، ޔޫކްރެއިންގެ ސިފައިން ވެސް ވަނީ ރަޝިޔާގެ ބިންތަކަށް ވެރިވެގަންނަވަމުންނެވެ.