ސަރުކާރުގެ އަމާޒު، މަސްވެރިކަމުގެ ސިނާއަތް ސިންދަފާތުކޮށް ބޭރު ފައިސާ ވައްދާ މައި ސިނާއަތަކަށް ހެދުން

މަސްވެރިކަމުގެ ސިނާއަތް ސިންދަފާތުކުރުމަށް ކުރަމުންދާ މަސައްކަތްތަކާއި އެކު، ބޭރު ފައިސާ ރާއްޖޭގެ އިޤްތިސާދަށް ވައްދާނެ މައި ސިނާއަތަކަށް އެ ސިނާއަތު ވެގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމް ވިދާޅުވެއެވެ.

ވަޒީރު ޝިޔާމް މިހެން ވިދާޅުވީ ޕީއެސްއެމް ނިއުސްގެ ހަފްތާ 52 ޕްރޮގްރާމުގައި ވާހަކަދައްކަވަމުންނެވެ.

މަސްވެރިކަމުގެ ސިނާއަތު ކުރިއެރުވުމަށްކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމު ވިދާޅުވީ މަސްވެރިކަމުގެ ސިނާއަތު އެހެން ހަރުފަތަކަށް ގެންދިޔުމަކީ ރައީސުލްޖުމްހުރިއްޔާ ޑރ. މުޙައްމަދު މުޢިއްޒުގެ ވަރަށް ބޮޑު އަމާޒެއް ކަމަށެވެ. އެގޮތުން މިދާއިރާއިން ލިބޭ ނަފާ ފަތުރުވެރިކަމާއި އެއް ހަމައަށް ގެންދިޔުމުގެ މަސައްކަތްތައް މިހާރު ފަށާފައިވާ ކަމަށް ވަޒީރު ވިދާޅުވިއެވެ.

ވަޒީރު ޝިޔާމު ވިދާޅުވީ ރާއްޖޭގެ 99 އިންސައްތައަކީ ކަނޑުގެ ސަރަހައްދުކަމަށްވާއިރު، މަސްވެރިކަމުގެ ސިނާއަތް ކުރިއަރުވާ ސިންދަފާތުކުރުމަށް ގިނަ ފުރުސަތުތަކެއް އެބަހުރިކަމަށެވެ. އެގޮތުން މެރިކަލްޗަރ އާއި ސްޕޯޓްސް ފިޝިންގއާއި ފަރުމަސްވެރިކަމުގެ ދާއިރާ ކުރިއެރުވުމަށް މަސައްކަތްތައްކުރެވެމުންދާކަން ވަޒީރު ފާހަގަކުރެއްވިއެވެ.

ވަޒީރު ޝިޔާމް ވިދާޅުވީ މި ސިނާއަތް ތަރައްޤީކުރުމަށް ކުރަމުންދާ މަސައްކަތްތަކާއި އެކު ކުރިމަގު ވަރަށް އުޖާލާކަމަށެވެ. މަސްވެރިކަމާއި ބެހޭ ވަޒީރު ވިދާޅުވީ ރައީސް ޑރ. މުޢިއްޒުގެވެރިކަމުގެ މި ފުރަތަމަ އަހަރުތެރޭގައި މި ސިނާއަތްކުރިއެރުވުމަށް އުފައްދާފައިވާ މާހައުލާއި އެކު މި ދާއިރާގައި އިންވެސްޓުކުރުމަށް ވިޔަފާރިވެރިންގެ ޝައުގުވެރިކަން އުފެދިފައިވާކަމަށެވެ.

"4 ސަރަހައްދެއް މިވަނީ މެރިކަލްޗަރއަށް ހުޅުވާލާފައި، މެރިކަލްޗަރއާއި މަސްވެރިކަމާއި ގުޅުންހުރި އެހެން ދިމާތަކުގައިވެސް އިންވެސްޓުކުރުމުގެ ޝައުގުވެރިކަން އެބަހުރި" ވަޒީރު ވިދާޅުވިއެވެ.

މަސްވެރިކަމުގެ އެކި އެކި ދާއިރާތަކުން މަޝްރޫޢުތައް ކުރިއަށްގެންދިޔުމަށް ރާވާފައިވާއިރު، މިދާއިރާއަށް ކުރިމަގުގައި ބޮޑެތި ކުރިއެރުންތަކެއް އަންނާނެ ކަމަށް ވަޒީރު ވިދާޅުވިއެވެ.

"މަސްވެރިކަން ސިންދަފާތުވެގެންދާއިރު، ބޭރު ފައިސާ ވައްދާ އެންމެ ބޮޑު ސިނާއަތަށް މި ސިނާއަތްވެގެންދާނެ" ވަޒީރު ވިދާޅޫވިއެވެ.

މަސްވެރިކަމުގެ ސިނާއަތު ފުޅާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، މަސްވެރިކަމާއި ގުޅޭ މަސައްކަތްތައް ކުރުމަށް ހާއްސަ އެޖެންސީއެއްވެސް ސަރުކާރުން ވަނީ ޤާއިމްކޮށްފައެވެ. އަދި ރާއްޖޭގައި އުފައްދާ މަސްވެރިކަމާއި ގުޅޭ ބާވަތްތައް ބައިނަލްއަޤްވާމީ ބާޒާރުގައި އިތުރަށް ޕްރޮމޯޓްކުރުމަށްވެސް ސަރުކާރުން ދަނީ މަސައްކަތްކުރަމުންނެވެ.