ދައުލަތުގެ ބެލުމުގެ ދަށުގައިތިބި 54 ކުދިން ޢާއިލާތަކާ ޙަވާލުކޮށްފި

"ކޮންމެ ކުއްޖަކަށް އާއިލާއެއް" ޕްރޮގްރާމްގެ ދަށުން، ދައުލަތުގެ ބެލުމުގެ ދަށުގައި ތިބި 54 ކުއްޖަކު މިހާތަނަށް އާއިލާއާއި ޙަވާލުކޮށްފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ.ޢާއިޝަތު ޝިހާމް ވިދާޅުވެއްޖެއެވެ. މި ޕްރޮގްރާމަކީ ކޮންމެ ކުއްޖަކީވެސް އާއިލީ ލޯތްބާއި އޯގާތެރިކަމުގެ ތެރެއިން ބޮޑުވާ ކުއްޖަކަށްވުމުގެ ފުރުޞަތު ދިނުމަށް ސަރުކާރުން ގެންގުޅުއްވާ ސިޔާސަތުގެދަށުން ފެއްޓެވި މަސައްކަތެކެވެ.

"ކޮންމެ ކުއްޖަކަށް ޢާއިލާއެއް" ޕްރޮގްރާމްގެދަށުން ދައުލަތުގެ ބެލުމުގެދަށުގައި ތިބި ކުދިން، އެކުދިންގެ އަމިއްލަ އާއިލާއާއި ހަވާލުކުރުމާއި، އަދި ހަވާލުވާނެ އާއިލާއެއް ނެތް ކުދިންނަށް އާއިލާއެއް ހޯދައިދިނުމުގެ މަސައްކަތް ހިމެނެއެވެ.

ސަރުކާރަށް 1 އަހަރު ފުރުމާއި ގުޅިގެން ޕީއެސްއެމް ނިއުސްއިން ގެނެސްދޭ "ހަފްތާ 52"ގެ ޚާއްސަ ޕްރޮގްރާމުގައި ވާހަކަފުޅުދައްކަވަމުން އިޖުތިމާޢީ އަދި ޢާއިލީ ތަރައްޤީއާއި ބެހޭ ވަޒީރު ޑރ.ޢާއިޝަތު ޝިހާމް ވިދާޅުވީ، ދަޢުލަތުގެ ޒިންމާއެއްގެ ގޮތުގައި ދެކެނީ، ކޮންމެ ކުއްޖަކީވެސް ޢާއިލީ ލޯތްބާއި އޯގާތެރިކަން ތަޖުރިބާ ކުރެވި ބޮޑުވާ ކުއްޖަކަށްވުމުގެ ފުރުޞަތު ދިނުންކަމަށެވެ. ދިމާވާ ޙާލަތަކާ ގުޅިގެން ދަޢުލަތުގެ ބެލުމުގެ ދަށަށް ކުޑަކުދިން ނެގިނަމަވެސް، އެންމެ ބޮޑު އަމާޒަކީ ކުދިންނަށް ރަނގަޅު ގޮތްތަކެއް ހޯދައިދީ އެކުންދިން ޢާއިލާއަކާ އަވަހަށް ގުޅުވައިދިނުންކަމަށް ވަޒީރު ވިދާޅުވިއެވެ.

"އެންމެނަށްވެސް އެނގޭ ކުއްޖަކު ޢާއިލީ ލޯބީގެތެރެއިން ބޮޑުވުމުގެ ނަސީބަކީ އެހެން ގޮތަކުން ލިބޭނެ އެއްޗެއް ނޫންކަން. މިދިޔަ 1 އަހަރު ދަޢުލަތުގެ ބެލުމުގެ ދަށުގައި ތިބި 50 އެއްހާ ކުދިންނަށް އާއިލާއެއް ހޯދައިދެވިއްޖެ. މީގެތެރޭގައި ޙާލަތު ރަނގަޅުކޮށް އަމިއްލަ އާއިލާއާއި ހަވާލުކުރި ކުދިން، ދުރުތާ ތިމާގެ މީހުންގެ ބެލެނިވެރިކަމަށް ގެންދިޔަ ކުދިން އަދި ފޯސްޓަރ އާއިލާތަކާވެސް ކުދިން ހަވާލުކުރިން." އިޖުތިމާޢީ އަދި އާއިލީ ތަރައްޤީއާއި ބެހޭ ވަޒީރު ޑރ.އާއިޝަތި ޝިހާމް ވިދާޅުވިއެވެ.

ވަޒީރު ވިދާޅުވީ ޢާއިލީ ގުޅުން ނެތް އާއިލާތަކުން، ފޯސްޓަރ ކުރާ ކުދިން ބެލުމަށް ދަޢުލަތުން އެހީވުމުގެ ގޮތުން، އެފަދަ ކުދިންގެ ޚަރަދުތައް ބެލެހެއްޓުމަށް 5000 ރުފިޔާގެ އެލަވަންސެއްވެސް ދެމުންދާކަމަށެވެ.

ދަޢުލަތުގެ ބެލުމުގެ ދަށަށް ކުދިން ނަގަނީ، ދިމާވާ އެކި މައްސަލަތަކުގެ ސަބަބުން އާއިލާގެ ތެރޭގައި އެވަގުތަށް ބެލެހެއްޓެން ނެތް ކުދިންނެވެ. އެހެންކަމުން ކުދިން އަނބުރާ އާއިލާތަކާ ހަވާލުކުރާއިރު، އާއިލާތެރޭގައި އެފަދަ އަމާން މާހައުލެއް ޤާއިމުކުރުމަށް ބޭނުންވާ އެހީތެރިކަންވެސް ވުޒާރާގެ ތެރެއިން ފޯރުކޮށްދެއެވެ. އަދި ކުދިން ހަވާލުކުރަނީ އެފަދަ މާޙައުލެއް އޮތްކަން ކަށަވަރުކުރުމަށްފަހުގައެވެ.

އަދި ކުދިންގެ ނަފްސާނީ ދުޅަހެޔޮކަމަށް ދޭން ޖެހޭ އެހީތެރިކަން ދިނުމާއި، ކުދިންގެ ހުންނަ ޚާއްސަ ކަންކަމާއި ކުދިން ބެލުމާއި އޯގާތެރިކަން ދިނުމުގައި އާއިލާތަކުން ގެންގުޅެންޖެހޭ އުސޫލުތައްވެސް ވުޒާރާގެ ފަރާތުން ހިންގާ ޚާއްސަ ޕްރޮގްރާމްތަކުގައި ފޯރުކޮށްދެއެވެ.

މީގެއިތުރުން އާއިލާއަކާ ހަވާލުކުރުމަށް ފަހުގައިވެސް އެ ކުދިންގެ ޙާލަތު ބެލުމުގެ މަސައްކަތްތައް ގަވައިދުން ކުރިއަށްގެންދެއެވެ.
އަދި ކުއްޖާގެ ކިޔެވުމުގެ ކަންކަމާއި، ވަކި އުމުރަކަށް ދިއުމުން ކުދިންނަށް މަތީ ތަޢުލީމާއި ހުނަރު ދިނުމުގެ ޕްރޮގްރާތައް ހިންގައި، ވަޒީފާގެ ފުރުޞަތުތައްވެސް ދަނީ ފަހިކޮށްދެމުންނެވެ.

ދަޢުލަތުގެ ބެލުމުގެ ދަށުގައި ތިބޭ ކުދިންގެ ކަންކަން ބެލެހެއްޓުން ހަރުދަނާކުރުމަށް "ސްޓޭޓް ކެއަރ ސަރވިސަސް"ގެ ނަމުގައި ޚާއްސަ ޑިޕާރޓްމަންޓެއްވެސް ވަނީ އުފައްދަވާފައެވެ.