ހުޅަނގުގެ ދިފާޢީ އިއްތިޙާދު (ނޭޓޯ)ގެ ވެރިޔާ މާކް ރުތޭ، އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕާ ބައްދަލުކުރައްވައިފިއެވެ. ރުތޭ ޓްރަމްޕާ ބައްދަލު ކުރައްވާފައި ވަނީ، އެމެރިކާގެ ފްލޮރިޑާއަށް ކުރެއްވި ދަތުރުފުޅެއްގައެވެ. އެ ބައްދަލުވުމުގައި ދެ ބޭފުޅުން މަޝްވަރާ ކުރައްވާފައިވާ ކަންކަމާ ގުޅޭ އިތުރު ތަފުސީލު ނޭޓޯއިން ހާމަކޮށްފައެއް ނެތެވެ.
"ދެ ބޭފުޅުން ވަނީ ވަރަށް ގިނަ ކަންކަމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައި، އޭގެ ތެރޭގައި އިއްތިޙާދަށް [ނޭޓޯއަށް] ކުރިމަތިވެފައިވާ ގޮންޖެހުންތައް ހިމެނޭ،" ނޭޓޯގެ ތަރުޖަމާނު ފަރަޙަ ދަޚަލަالله ވިދާޅުވިއެވެ. ނޭޓޯއިން ބުނީ، ރުތޭގެ ދަތުރުފުޅުގައި އެމެރިކާގެ ކޮންގްރެސްގެ މެންބަރެއް ކަމުގައިވާ މައިކް ވޮލްޓްޒާ ވެސް އޭނާ ބައްދަލު ކުރެއްވި ކަމުގައެވެ. ޓްރަމްޕްގެ އައު ސަރުކާރުގައި ޤައުމީ ސަލާމަތާ ބެހޭ މުޝީރުގެ މަޤާމު ފުރުއްވާނީ ވޮލްޓްޒެވެ. ވޮލްޓްޒްގެ އިތުރުން ޓްރަމްޕްގެ ޤައުމީ ސަލާމަތާ ބެހޭ މަޖިލީހުގައި ހިމެނިވަޑައިގަންނަވާނެ އެހެން ބޭފުޅުންނާ ރުތޭ ބައްދަލު ކުރައްވާފައިވާ ކަމުގައި ވެސް ނޭޓޯން ބުންޏެވެ.
ނެދަރލެންޑްސްގެ ބޮޑުވަޒީރު ކަމުގެ މަޤާމު ފުރުއްވާފައިވާ ރުތޭ ނޭޓޯގެ ވެރިޔާގެ މަޤާމާ ޙަވާލުވެ ވަޑައިގަތީ ހުސްވި މަހުއެވެ. އޭނާއަކީ، ޓްރަމްޕްގެ ވެރިކަމުގެ ފުރަތަމަ ދައުރުގައި އޭނާއާ ގާތް ގުޅުންތަކެއް ބޭއްވެވި ބޭފުޅެކެވެ. އަދި، 2017ން 2021ށް ހިނގި ޓްރަމްޕްގެ ދައުރުގައި، އޭނާއާ އެންމެ ގާތް ގުޅުންތަކެއް ބާއްވަވާފައިވާ ވިލާތުގެ ޤައުމެއްގެ ވެރިޔާއެވެ.
ރުތޭ ޓްރަމްޕާ ބައްދަލު ކުރައްވާފައި މި ވަނީ، އެމެރިކާއާއި ނޭޓޯގެ އިއްތިޙާދާ އެކު ގޮތް ގުޅުމަށް ޓްރަމްޕްގެ ވެރިކަމުގައި ބޮޑެތި ބަދަލުތަކެއް ގެންނަވާނެ ކަމަށް މަސްރަޙު ދިރާސާ ކުރާ ފަރާތްތަކުން ބުނަމުންދާ ދަނޑިވަޅެއްގައެވެ. ނޭޓޯއިން މި ވަގުތު ދަނީ، ޕްރޮކްސީއެއް ނުވަތަ މެދުވެރިއެއްގެ ގޮތުގައި ޔޫކްރެއިން ބޭނުން ކޮށްގެން ރަޝިޔާއާ ދެކޮޅަށް ނުރައްކާތެރި ހަނގުރާމައެއް ކުރަމުންނެވެ. އެ ކަމުގެ އަޑީގައި އޮތީ އެމެރިކާ ކަމަށް މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
2022ވަނަ އަހަރު ރަޝިޔާއިން ޔޫކްރެއިނަށް ޙަމަލާ ދީފައި ވަނީ، ޔޫކްރެއިނުން ނޭޓޯގެ މެންބަރު ކަން ހޯދަން ކުރަމުން ދިޔަ މަސައްކަތްތައް ހުއްޓައިނުލުމުންނެވެ. ރަޝިޔާއިން ޤަބޫލު ކުރާ ގޮތުގައި، ދިފާޢީ އިއްތިޙާދެއްގެ ނަމުގައި އެކުލަވައިލާފައިވާ ނޭޓޯން ދަނީ އެ ޤައުމުގެ ސިޔާދަތީ މިނިވަންކަމާއި އިސްތިޤުލާލަށް ނުރައްކާ ކުރަމުންނެވެ. އަދި، ޔޫކްރެއިނަށް ނޭޓޯގެ މެންބަރު ކަން ދިނުމަކީ ރަޝިޔާގެ ދެމިއޮތުމަށް އޮތް ނުރައްކަލަކަށް ވާނެ ކަމުގައި ވެސް ރަޝިޔާއިން ޤަބޫލު ކުރެއެވެ.
ރަޝިޔާއާ ދެކޮޅަށް ޔޫކްރެއިނުން ކުރަމުންދާ ހަނގުރާމައިގައި ޔޫކްރެއިނަށް ހަތިޔާރު ފޯރުކޮށްދީ، އަސްކަރީ ގޮތުން އެހީތެރިކަން ފޯރުކޮށްދެމުން ދަނީ އެމެރިކާއާއި ނޭޓޯންނެވެ. ނަމަވެސް، ޓްރަމްޕަކީ ރަޝިޔާ-ޔޫކްރެއިން ހަނގުރާމައާ ދެކޮޅު ބޭފުޅެކެވެ. އަދި، އޭނާގެ ވެރިކަމުގައި ޔޫކްރެއިނަށް އެމެރިކާއިން ފޯރުކޮށްދެމުންދާ ހަތިޔާރުގެ އަދަދު މަދު ކުރާނެ ކަމުގައި، ނުވަތަ ހަތިޔާރު ފޮނުވުން ހުއްޓައިލާނެ ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ. ވެރިކަމުގެ ފުރަތަމަ ދުވަހު އެ ހަނގުރާމަ ނިމުމަކަށް ގެންނަވާނެ ކަމުގައި ވެސް ޓްރަމްޕް ވިދާޅުވެފައިވެއެވެ. ނަމަވެސް، އެ ކަން ކުރައްވާނެ ގޮތް ހާމަކުރައްވާފައެއް ނެތެވެ.
އެމެރިކާގެ އެހީތެރިކަމާ ނުލައި ޔޫކްރެއިިނަށް އަސްކަރީ އެހީތެރިކަން ފޯރުކޮށްދޭން ނޭޓޯން ކުރަމުންދާ މަސައްކަތްތަކަށް ވަރަށް ބޮޑަށް ހިޔަނި އެޅޭނެ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. އަދި، ނޭޓޯއިން ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުން މެދުކަނޑައިލައިފި ނަމަ، ނުވަތަ ހަތިޔާރު ފޯރުކޮށްދެމުންދާ މިންވަރު މަދުކޮށްފި ނަމަ، ރަޝިޔާއާ ދެކޮޅަށް ކުރަމުންދާ ހަނގުރާމަ ކާމިޔާބު ކުރުމަށް ބޮޑެތި ގޮންޖެހުންތަކެއް ކުރިމަތިވާނެ ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ޤަބޫލު ކުރައްވައެވެ.
ޔޫކްރެއިނުން މިހާރު ވެސް ދަނީ، އެމެރިކާއާއި އިނގިރޭސިވިލާތުން ފޯރުކޮށްދެމުންދާ ދުރު-ރާސްތާ މިސައިލްތައް ބޭނުން ކޮށްގެން ރަޝިޔާގެ ރަށްތަކަށް ނުރައްކާތެރި ޙަމަލާތަކެއް ދެމުންނެވެ. އެމެރިކާއިން ފޯރުކޮށްދެމުންދާ ހަތިޔާރު ބޭނުން ކޮށްގެން ރަޝިޔާގެ ރަށްތަކަށް ޙަމަލާ ދިނުމުގެ ހުއްދަ ރައީސް ޖޯ ބައިޑަން ޔޫކްރެއިނަށް ދެއްވާފައި ވަނީ ހުސްވި ހަފުތާގައެވެ.
ރަޝިޔާއިން ވަނީ އެ ކަމާ ދެކޮޅަށް އިންޒާރު ދިނުމުގެ ގޮތުން އަޑަށްވުރެ ބާރަށް ދަތުރު ކުރާ ހައިޕަރސޮނިކް މިސައިލެއް ބޭނުން ކޮށްގެން ޔޫކްރެއިނަށް ޙަމަލާދީ، ޑްރޯން ފަދަ ހަތިޔާރުތައް ބޭނުން ކޮށްގެން ދެމުންދާ ޙަމަލާތައް އިތުރު ކޮށްފައެވެ. އެމެރިކާއާާއި އިނގިރޭސިވިލާތުން ފޯރުކޮށްދޭ ހަތިޔާރު ބޭނުން ކޮށްގެން ރަޝިޔާއަށް ޙަމަލާ ދިނުމަކީ، އެ ދެ ޤައުމުން ރަޝިޔާއާ ދެކޮޅަށް ހަނގުރާމަ އިޢުލާނު ކުރުމާ އެއްފަދަ އަމަލެއްގެ ގޮތުގައި ރަޝިޔާއިން ދެކެއެވެ. އަދި، އެއާ އެކު އެމެރިކާއާއި އިނގިރޭސިވިލާތުގެ އަސްކަރީ އަމާޒުތަކަށް ޙަމަލާ ދިނުމުގެ ޙައްޤު ރަޝިޔާއަށް ލިބިގެން ގޮސްފައިވާ ކަމުގައި ވެސް ރަޝިޔާއިން ޤަބޫލު ކުރެއެވެ.
ރަޝިޔާއިން ހައިޕަރސޮނިކް މިސައިލެއް ބޭނުން ކޮށްގެން ޔޫކްރެއިނަށް ޙަމަލާ ދީފައި މި ވަނީ، ރަޝިޔާއިން އެ ޤައުމުގެ ނިއުކްލިޔަރ ހަތިޔާރު ބޭނުން ކުރުމުގެ އުސޫލަށް ބަދަލު ގެނެސްފައިވާ ދަނޑިވަޅެއްގައެވެ. ޕުޓިން އެ ގޮތަށް އަމަލު ކުރައްވާފައި ވަނީ، ރަޝިޔާއަށް ޙަމަލާ ދިނުމަށް އެމެރިކާގެ ހަތިޔާރު ބޭނުން ކުރުމުގެ ހުއްދަ ޔޫކްރެއިނަށް ދިނުމާ ގުޅިގެންނެވެ.
އެ އުސޫލަށް ރައީސް ވްލަޑިމިޔަރ ޕުޓިން ގެންނަވާފައިވާ ބަދަލުތަކާ އެކު، ނިއުކްލިޔަރ ބާރަކުން ޔޫކްރެއިނަށް ފޯރުކޮށްދޭ ހަތިޔާރު ބޭނުން ކޮށްގެން ރަޝިޔާގެ ރަށްތަކަށް ޙަމަލާ ދިނުމަކީ، އޭގެ ރައްދުގައި ނިއުކްލިިޔަރ ހަތިޔާރު ބޭނުން ކުރެވިދާނެ އަމަލެއްގެ ގޮތުގައި ބަޔާންކޮށްފައިވެއެވެ. މީގެ އިތުރުން، ދިފާޢީ އިއްތިޙާދެއްގެ މެންބަރު ޤައުމަކުން ރަޝިޔާއަށް ޙަމަލާއެއް ދިނުމަކީ، އެ އިއްތިޙާދެއްގައި ހިމެނޭ ހުރިހާ މެންބަރު ޤައުމަކުން ރަޝިޔާއާ ދެކޮޅަށް ހަނގުރާމަ އިޢުލާނު ކުރުމާ އެއްފަދަ އަމަލެއްގެ ގޮތުގައި ބަލާނެ ކަމުގައި ވެސް އައު އުސޫލުގައި ބަޔާންކޮށްފައިވެއެވެ.