މިއަހަރު ދިވެހިރާއްޖޭގެ އެންމެ އަލިގަދަ ތަރީގެ ފަޚުރުވެރި މަޤާމު ޙާޞިލްކުރި ށ. ފޯކައިދޫ އާދަމް ނަސީމަށް އެރަށުން ހޫނު މަރުޙަބާއެއް ކިޔައިފިއެވެ. އާދަމް ނަސީމަށް ފޯކައިދޫ ރައްޔިތުން ކިޔާފައިވަނީ ރަތްދޫލައިގެ މަރުޙަބާއެކެވެ. img:http://s1.psmnews.mv/images/660x400/14677971393572.jpg|އެންމެ އަލިގަދަ ތަރީގެ ޝަރަފް ހޯދި ށ.ފޯކައިދޫ އާދަމް ނަސީމާއި އިނާމް ހަވާލުކޮށްދެއްވަނީ - ފައިލް ފޮޓޯ: ރައީސް އޮފީސް
ދިވެހިރާއްޖޭގެ އަލިގަދަ ތަރިއަކީ، ރާއްޖޭގެ ހުރިހާ ސަރަޙައްދަކަށް ޢާންމުކޮށް ހުޅުވާލައިގެން ޒުވާނުންނާއި އޭގެ މަތީ ޢުމުރުފުރާތަކުގެ މީހުންނަށް ބާއްވާ ޤުރުއާން މުބާރާތެކެވެ. މި މުބާރާތް ބާއްވަނީ ކޮންމެ އަހަރެއްގެވެސް ރަމަޟާންމަހާ ދިމާކޮށެވެ. ނިމިގެންދިޔަ ރަމަޟާން މަހު ބޭއްވީ ދިވެހިރާއްޖޭގެ އެންމެ އަލިގަދަ ތަރީގެ 4 ވަނަ މުބާރާތެވެ. ރާއްޖޭގެ ހުރިހާ އަތޮޅުތަކެއް ހިމެނޭ ގޮތަށް އެކި ސަރަޙައްދުތަކަށް ޕީއެސްއެމްގެ ޓީމުތައް، ފަނޑިޔާރުންވެސް ހިމެނިވަޑައިގަންނަވާގޮތުން ޒިޔާރަތްކޮށް، ބާއްވާ އޮޑިޝަންތަކުން ހޮވޭ 12 ބައިވެރިޔަކު މުބާރާތުގައި ވާދަކުރެއެވެ. ހަފުތާއަކު ދެބައިވެރިން އުނިކުރަމުން ގޮސް ގްރޭންޑް ފިނާލޭ ބާއްވަނީ އެންމެ މޮޅު 3 ބައިވެރިންގެ މެދުގައެވެ. img:http://s1.psmnews.mv/images/660x400/14680532100621.jpg|އަލިގަދަތަރި އާދަމް ނަސީމަށް މަރުޙަބާ ދެންނެވުން
މި މުބާރާތް އެއް އަހަރުން އަނެއް އަހަރަށް ފެންވަރު މަތިކޮށް ތަފާތު އައު ބައިތައް ހިމަނައި މުބާރާތުގެ ވާދަވެރިކަން އިތުރުކުރުމަށް ޕީއެސްއެމްއިން ދަނީ މަސައްކަތް ކުރަމުންނެވެ. މިއީ، ޤުރުއާން ކިޔެވުމުގެ ހުނަރާއި، ޤުރާއާނާމެދު މުޖުތަމަޢުގައި އޮންނަ ޤަދަރު މަތިކޮށް، ޤުރުއާނާމެދު ޢާންމުންގެ ހިތްތަކުގައި ލޯބިޖެއްސުމުގެ ގޮތުން ޕަބްލިކް ސަރވިސް މީޑިއާއިން ވަރަށް އިސްކަންދީގެން ބާއްވަމުން އަންނަ މުބާރާތެކެވެ. އަދި މުބާރާތަށް ދިވެހި ސަރުކާރާއި ރައްޔިތުންގެ ތަރުޙީބާއި އެއްބާރުލުން ލިބޭކަން ޕީއެސްއެމްއިން ފާހަގަކުރެއެވެ. ޚާއްޞަކޮށް ރާއްޖޭގެ ވިޔަފާރިވެރިންނާއި ފޯރުންތެރި ބޭފުޅުންގެ މި މުބާރާތް ބޭއްވުމަށް ދެއްވާ އެއްބާރުލެއްވުން ޕީއެސްއެމުން ފާހަގަކުރެއެވެ. img:http://s1.psmnews.mv/images/660x400/14647996481499.jpg|އަލިގަދަ ތަރި އޮޑިޝަންގައި ބައިވެރިވުމަށް އައި ބަޔަކު ކިއުގައި މަޑުކޮށްލައިގެން- ފޮޓޯ: ޕީއެސްއެމް
މި މުބާރުން މިއަހަރު އެއްވަނަ ހޯދައި، ދިވެހިރާއްޖޭގެ އެންމެ އަލިގަދަ ތަރީގެ މަޤާމު ހޯދީ ށ. ފޯކައިދޫ އާދަމް ނަސީމެވެ. އޭނާ މި ފަޚުރުވެރި މަޤާމު ހޯދައިގެން އިއްޔެ ވަނީ އޭނާގެ ރަށަށް ގޮސްފައެވެ. އޭނާއަށް އެރަށު ރައްޔިތުންވަނީ ހޫނު މަރުޙަބާއެއް ކިޔާފައެވެ. އާދަމް ނަސީމަށް ފޯކައިދޫ ރައްޔިތުން ކިޔާފައިވަނީ ރަތްދޫލައިގެ މަރުޙަބާއެކެވެ. img:http://s3.psmnews.mv/images/660x400/14680531289400.jpg|އަލިގަދަތަރި އަލްޙާފިޡް ޢަބްދުއްރަޝީދު (ކ) އަލްޤާރީ އާދަމް ނަސީމް (މ) އަލްޤާރީ އަލްޙާފިޡް އިބްރާހީމް ޢަލީ (ވ)
މިއަހަރުވެސް ށ. އަތޮޅުގެ ޤާރީއަކު ދިވެހިރާއްޖޭގެ އެންމެ އަލިގަދަ ތަރީގެ މަޤާމު ހޯދިއިރު، ވޭތުވެދިޔަ ދެއަހަރުވެސް އަލިގަދަ ތަރީގެ މަޤާމު ހޯދާފައިވަނީ އެއަތޮޅުގެ ޤާރީންނެވެ. އެއީ، ށ. ޅައިމަގަށްް ނިސްބަތްވާ އަލްޤާރީ އަލްހާފިޒް އިބްރާހީމް ޢަލީ އާއި ށ. ފޭދޫ ވަވަތި އަލްޙާފިޡް ޢަބްދުއްރަޝީދުއެވެ. އަލްހާފިޒް އިބްރާހީމް ޢަލީ ދިވެހިރާއްޖޭގެ އެންމެ އަލިގަދަ ތަރީގެ މަޤާމު ހޯއްދެވީ މިދިޔަ 1436 ވަނަ އަހަރުއެވެ. އަދި 1435 ގައި މި މަޤާމު ހޯއްދެވީ ށ. ފޭދޫ ވަވަތި އަލްޙާފިޡް ޢަބްދުއްރަޝީދުއެވެ. އޭނާއަކީ ލޯފަން ބޭކަލެކެވެ.
މި ދެޤާރީން ފޯކައިދުއަށް ގޮސް، މިއަހަރު ދިވެހިރާއްޖޭގެ އެންމެ އަލިގަދަ ތަރީގެ މަޤާމު ހޯދި ފޯކައިދޫ އާދަމް ނަސީމަށް މަރުޙަބާ ކިޔައި، އަދި އޭނާގެ ދެފަރާތުގައި ތިބެ ބޭއްވި ރަސްމިއްޔާތެއްގައި އޭނާއަށް މަރުޙަބާ ކިޔާފައިވެއެވެ. ދިވެހިރާއްޖޭގެ އެންމެ އަލިގަދަ ތަރީގެ މަޤާމު 3 ފަހަރެއްގެ މަތިން ށ. އަތޮޅަށް ނިސްބަތްވާ ޤާރީން ހޯދުމުން، އެއަތޮޅު ރައްޔިތުން ގެންދަނީ އެކަމަށް އުފާކުރަމުންނެވެ. ޚާއްޞަކޮށް މިއަހަރު މިމަޤާމު ލިބުނީ ފޯކައިދޫގެ ޤާރީއެއް ކަމަށްވުމާއެކު އެރަށުގެ ރައްޔިތުން މިކަމާ ފަޚުރުވެރިވެ، އުފާފާޅުކުރަމުން އެބަގެންދެއެވެ. ޕީއެސްއެމްގެ އެކި ކަންކަމުގައި އެކި ޓީމްތައް ފަހުގެ ތާރީޚްގައި ފޯކައިދުއަށް ކުރެވިފައިވާ ދަތުރުތަކުން ފާހަގަކުރެވިފައިވާ ގޮތުން ފޯކައިދުއަކީ، މެހުމާނުންނަށް މަރުޙަބާކިޔުމާއި ރަށުގެ ޓީމްތަކާއި ފަރުދުންގެ މަސައްކަތްތަކަށް ތަރުޙީބުދީ، ކާމީޔާބީއަށް މަރުޙަބާކިޔުމުގައި ފަހަކަށް އައިސް ފާހަގަކުރެވޭ ރަށެކެވެ. img:http://s2.psmnews.mv/images/660x400/14680532721591.jpg|އަލިގަދަތަރި އާދަމް ނަސީމަށް މަރުޙަބާ ދެންނެވުން
ދިވެހިރާއްޖޭގެ އެންމެ އަލިގަދަ ތަރީގެ މަޤާމު ހޯއްދެވުމަށްފަހު ފޯކައިދުއަށް އާދަމް ނަސީމް ދިއުމުން އެރަށުގެ ގިނަބަޔަކު ވަނީ ޚާއްޞަ ސައިކަލް ބުރެއްވެސް ބާއްވާފައެވެ. އަދި ފުލުހުންގެ ފަރާތުން ވަނީ ހަނދާނީ ފިލައެއް އޭނާއަށް ދެއްވާފައެވެ. މީގެ އިތުރުން ފޯކައިދޫ ކައުންސިލް އިދާރާއިން ރޭ ވަނީ ވޭތިވެދިޔަ 3 އަހަރުގެ އަލިގަދަ ތަރިންގެ ޝަރަފްގައި ޚާއްޞަ ޙަފްލާއެއް ބާއްވަވާފައެވެ. މި ޙަފްލާގައި ކައުންސިލުން ވަނީ ކުރިޔަށް އޮތް ތާންގައިވެސް ށ. އަތޮޅުއަށް މި ޝަރަފް ހޯދުމަށް ހުރިހާ ފަރާތްތަކެއް ގުޅިގެން މަސައްކަތްކުރުމަށް ގޮވާލާފައެވެ. އަދި ކުރިޔަށް އޮތްތާންގައި އަލިގަދަތަރިއަކަށް ފޯކައިދޫ ރައްޔިތެއް ހޮވިއްޖެނަމަ ޢުމުރާ ދަތުރެއް ދެއްވާނެކަން އިއުލާންކޮށްފައިވެއެވެ. މީގެ އިތުރަށް ށ. އަތޮޅަށް މި މަޤާމު ލިބިއްޖެނަމަ ފައިސާގެ އިނާމެއް ދޭނެކަންވެސް އިއުލާންކޮށްފައިވެއެވެ. މި ޙަފްލާގައި ވަނީ މިފަހަރު ދިވެހިރާއްޖޭގެ އެންމެ އަލިގަދަ ތަރީގެ މަޤާމު ހޯދި އާދަމް ނަސީމަށްވެސް ކައުންސިލްގެ ފަރާތުން ފައިސާގެ އިނާމެއް ދޭނެކަން އިއުލާންކުރައްވާފައެވެ. ރޭގެ ޙަފްލާގައި ށ. އަތޮޅުގެ އަލިގަދަތަރިންނަށް އެކަމުގެ ހަނދާނީ ފިލައެއް ކައުންސިލްގެ ފަރާތުން ހަވާލުކޮށްފައިވެއެވެ.