އުންމީދު

ހުޅެވި ހަނދުގެ ރިހި އަލި ވަނީ ދޫލައެއްހެން މަގުތަކުގައި ފެތުރިފައެވެ. ޖައްވުގެ ހަމަހިމޭންކަމުގެ ތެރެއިން ރުކުގެ ފަން ހެލިލާ އަޑު ދޭތެރެއަކުން އިވިލައެވެ. މަގުގެ ދެކޮޅު ބަލަމުން ހުދާ ކުރިއަށް ހިނގަމުން ދިޔައީ ލުއި ހިނިތުންވުމަކާއި އެކުގައެވެ. ހިމަ ގޯޅިތަކުން ފަރިތަކަމާއިއެކު ހިނގަމުން ގޮސް ގޭގެ ދޮރުމަތީގައި މަޑުކޮށްލިއެވެ. މޫނުމަތީގައި ސުވާލު މާކުގެ ކުލަވަރުތައް އެނބުރެން ފެށީ އެހެން ރޭރޭ ފެންނަ ފައިވާން ދޮރުމަތިން ނުފެނުމުންނެވެ. ހުދާ އަވަހަށް ގޭގެ ދޮރު ހުޅުވާލުމަށްފަހު އެތެރެއަށް ވަދެ ކޮޓަރިވެސް ބަލައިފިއެވެ. އެހެނަސް ޝަރީފުގެ ހިލަމެއް ނުވިއެވެ. ޝަރީފަށް ގުޅުމަށްޓަކައި ދަބަހުން ފޯނު ނަގާ ހުޅުވާލުމަށްފަހު ޝަރީފުއަށް ގުޅާލިއެވެ. އެހެނަސް ޝަރީފު ފޯނު ބިޒީކޮށްލީއެވެ. މަސައްކަތެއްގައި އުޅެނީކަމަށް ނިންމާ ހުދާ އަވަސްވެގަތީ ޝަރީފު އަންނަންވާއިރަށް ތާޒާ ވެލާށެވެ. ވެފާހުރި ވަރުބަލި ކަމާއެކުވެސް ފެން ވަރާ ރީތި ވެގެން ހުދާ ކާމޭޒު ދޮށުގައި އިށީނީ ޝަރީފުގެ އިންތިޒާރުގައެވެ. މާ ލަސްތަކެއް ނުވެ ގޭގެ ދޮރު ހުޅުވާލާފާ ޝަރީފު ވަނެވެ.
"ހާދަ ލަސްވީ މިރޭ؟ އާދޭ އަވަހަށް ކާން" ގޮނޑިން ތެދުވަމުން ހިނިތުންވުމަކާއެކު ހުދާ ބުނެލިއެވެ.
ލަސް ފިޔަވަޅުތަކެއްގައި ގޮސް ޝަރީފު ހުއްޓުނީ ހުދާގެ ކުރިމަތީގައެވެ. ހުދާއާއި ހަތަރު ކަޅި ހަމަކޮށްލުމަށްފަހު ޝަރީފުގެ އަނގައިން ނިކުތް ޖުމްލައަކީ މިދުނިޔެ މަތީގައި ދުވަހަކުވެސް ހުދާ އަޑުއަހަން ބޭނުންވި ޖުމްލައެއް ނޫނެވެ.
"ތިޔަ ހުރީ ވަރިކޮށްފާ"
ޝަރީފުގެ ދެލޮލުން ހުދާއަށް ފެނުނީ ރުޅިވެރިކަމެވެ. ހުދާގެ ސިކުނޑި ކުޑަ ވަގުތުކޮޅެއްގެ ތެރޭގައި އެތައް މޭލަކަށް ދަތުރުކުރި ނަމަވެސް ހުދާ ވަރިކުރަންވީ ސަބަބެއް ނުވިސްނުނެވެ. ދެމީހުންގެ ލޯބީގެ ޞަފްހާތައް ގުނީ އެހާމެ އުފަލުގައެވެ. ކައިވެނީގެ ގޮށް ޖެހީ އެތަކެއް ފޮނި ވަޢުދުތަކާ ހުވަފެންތަކާއި އެކުގައެވެ. މިއަދު މެންދުރު ޝަރީފުއާއި ދިމާވި އިރުގައިވެސް މިކަހަލަ ކަމެއްގެ ހިލަމެއް ނުވެއެވެ.
"ކީކޭ؟ ވަރި އޭ" ޤަބޫލު ނުކުރެވިގެން ހުދާ އަހާލިއެވެ
"އާން... ވަރި..... އަހަރެން ދެން ބޭނުމެއް ނޫން ހުދާއާ އިނދެގެން އުޅޭކަށް" ރުންކުރު ގޮތަކަށް ޝަރީފު ބުންޏެވެ.
"ޝަރީފު ދޮގެއްދޯ؟ ތިކަހަލަ ސަމާސާ ކުރާކަށް ނުވާނޭ... އަހަރުމެން ދެމީހުން ކިހާ ލޯބިން މި އުޅެނީ.... ދެން ކޮން ވަރިއެއް؟ " ޝަރީފުގެ ދެ އަތުގެ މުލަށްދަނޑީގައި ހިފާ ހުދާ ވާހަކަ ދައްކަން ފެށިއެވެ.
މިހެން ބުނުމަށްފަހު ހުދާގެ ދެ އަތުގައި ހިފާ ޝަރީފުއާއި ދުރަށް ޖެއްސިއެވެ. " މަރީ ބަނޑުބޮޑު..."
ޝަރީފުގެ އަޑާއެކު ހުދާގެ ދެލޯ ބޮޑުވިއެވެ. އިރުކޮޅަކު ގާވެ ހުރުމަށް ފަހު ހިނިތުންވުމަކާއެކު ޝަރީފުއާއި ގާތަށް ޖެހިލިއެވެ. " އަސްލު؟ އަލްހަމްދުލިﷲ ހާދަ އުފާވެރި ޙަބަރެކޭ....ޝަރީފު ބައްޕައަކަށް ވަނީ އެއްނުން " ހުދާގެ ލޮލުން އުފަލުގެ ކަރުން ފާއްދާލިއެވެ.
ހިނދުކޮޅަކަށް ނަމަވެސް ޝަރީފުގެ މޫނުމަތިން އުފާވެރިކަން ފެނުނެވެ. މަރީ އަކީ ޝަރީފުގެ ދެވަނަ އަނބިމީހާއެވެ. ހުދާއާއި ޝަރީފުގެ ކައިވެންޏަށް 8 އަހަރުވެގެން ދިޔައިރު އެތައް ފަރުވާއަކަށް ފަހުވެސް ދަރިއެއްގެ ނިޢުމަތް އެ ދެމަފިރިންނަކަށް ނުލިބުނެވެ. މީގެ 1 އަހަރު ކުރިން ޝަރީފު، މަރީއާއި ކައިވެނި ކުރީ ޝަރީފުގެ މައިންބަފައިންގެ އެދުމަށެވެ. ހުދާ ވަރިކުރުމަށް ފަހު އިނުމަށް ބުނުމުންވެސް ހުދާ ދެކެ ވާ ލޯބިން ހުދާ ދޫކޮށްލާކަށް ޝަރީފު ބޭނުމެއް ނުވިއެވެ. އެހެންވެގެން ހުދާގެ އިޒުނައާއިއެކު މަރީއާއި އިނީއެވެ. ޝަރީފު ބައްޕައަކަށްވުމަށް ބޭނުންވެފައިވާ މިންވަރުންވެސްމެއެވެ. ގޭތެރެ ފަޅު ފިލުވާލައިދޭނެ މާމަދަރިއެއް ފެންނާނެ ދުވަހެއްގެ އިންތިޒާރުގައި ތިބި މައިންބަފައިންގެ ހުވަފެނުގައި ކުލަޖައްސައިދިނުމުގެ އުންމީދުގައެވެ.
ޝަރީފުގެ ހިނިތުންވުން ގެއްލިގެން ދިޔައީ މިރޭ މަރީ ދެއްކި ވާހަކަ ހަނދާންވެފައެވެ. ޝަރީފުގެ ދަރިފުޅަށް މަރީ ބަލިވެއިންކަން މީގެ މަހެއްހާ ދުވަސްކުރިން ޝަރީފަށް އެނގުނެވެ. އެހެނަސް މަރީގެ އެދުމަށް އެވާހަކަ އެއްވެސް މީހެއްގެ ގާތުގައި ޝަރީފު ނުބުނެއެވެ. ވޭތުވެދިޔަ މަސް ދުވަސް ތެރޭގައި މަރީ ކައިރީގައި ޝަރީފު ހޭދަ ކުރާ ވަގުތު އިތުރުވިއެވެ. މަސައްކަތުގައި ބިޒީ ވަނީކަމަށް ހުދާ ކައިރި ބުނެ އެތައް ރެއެއް މަރީގެ ޚިދުމަތުގައި ޝަރީފު ހޭދަކުރިއެވެ. މަރީގެ ބަނޑުގައިވާ ޝަރީފުގެ ދަރިފުޅަށްޓަކައެވެ. މި ދުވަސްވަރު މަރީ ދިޔައީ އެކި ގޮތްގޮތުން ޝަރީފުގެ ހިތުގައި ހުދާއާއި މެދު ނަފްރަތު އުފެއްދޭތޯ މަސައްކަތް ކުރަމުންނެވެ. އެހެންނަމަވެސް އެކަން މުޅިން ކާމިޔާބުވާގޮތެއް ނުވިއެވެ. ހުދާ ދެކެވާ ލޯބިން ޝަރީފު އޭނާގެ އަލަތު
އަންހެނުންނަށް ކުރާ އިތުބާރު ހިފެހެއްޓީއެވެ. އެހެންކަމުން މަރީ އޭނާގެ އެންމެ ފަހު ހަތިޔާރު ނެގީއެވެ. ޝަރީފު ހުދާ ވަރިނުކޮށްފިނަމަ މަރީ ވަރިވާން ބޭނުންވާކަމަށާއި ދަރިފުޅު ވިހެއުމުން ނުދައްކާނެކަމަށް ބުނެ ޝަރީފުގެ ވިސްނުން އަނބުރާލީއެވެ. ޝަރީފުގެ މައިންބަފައިންވެސް ބޭނުންވަނީ މިގޮތެވެ. ޝަރީފު ގޮތް ހުސްވީއެވެ. ލިބެން އުޅޭ ދަރިފުޅަށްޓަކައި ލޯބި ޤުރުބާން ކުރަން ޖެހުނީއެވެ.
ޙިޔާލުތަކުގެ ދުނިޔެއިން ޝަރީފުއަށް ނިކުމެވުނީ ހުދާގެ ގިސްލުމުގެ އަޑަށެވެ. ޝަރީފުގެ ފައި ބުޑަށް ވެއްޓި އިނދެ ހުދާ ދޫނުކޮށްލުމަށް އެދި އާދޭސް ކުރަމުން ދިޔައެވެ. އެހެނަސް ޝަރީފުގެ ޒަމީރު މިއަދު ޖެހުނީ ހުދާގެ އާދޭހަށް ބީރު ކަންފަތެއް ދޭށެވެ. ހުދާގެ ހިތް ފުނޑު ފުނޑު ކޮށްލުމަށްފަހު ޝަރީފު އެރޭ އެގެއިން ނިކުތީ އެގޭގައި ހުރި އޭނާގެ އެއްޗެއް ވިއްޔާ ހިފައިގެންނެވެ. އާދުވަހަކަށް އަލި ވިލުނު އިރުވެސް ހުދާގެ ކަރުނައަކަށް ނިމުމެއް ނާދެއެވެ. ވަޒީފާއަށް ސަލާމް ބުނުމަށްފަހު މުޅި ދުވަސް ހުދާ ހޭދަކުރީ އެނދުމަތީގައެވެ. ރުއިމުގައެވެ. ނޫނީ ކޮންމެވެސް ޙިޔާލެއްގެ ތެރެއަށް ގެއްލިފައެވެ. ނޫނީ ޝަރީފަށް ގުޅޭތޯ މަސައްކަތް ކުރަނީއެވެ. އެހެނަސް ޝަރީފު ފޯނެއް ނުނަގައެވެ. ހުދާއާއި ޝަރީފުގެ ހަނދާންތަކުގެ ތެރެއަށް ފީނަން އޮތް ހުދާ ސިއްސައިގެން ދިޔައީ ގޭ ދޮރުގެ ތަޅުގައި މީހަކު ހިފި އަޑު އިވިގެންނެވެ. އަވަހަށް ދުވެފައިގޮސް ދޮރު ހުޅުވާޅީ ޝަރީފު އަނބުރާ އޭނާގެ ގާތަށް އައީ ކަމަށް ކުރެވުނު އުންމީދުގެ ބޮޑުކަމުންނެވެ. ނަމަވެސް ދޮރުމަތީގައި ހުރީ ހުދާއާއި އެކީގައި ހޮސްޕިޓަލުގައި މަސައްކަތް ކުރާ ގާތް ރަހުމަތްތެރިއެއް ކަމަށްވާ ރަނާއެވެ. ހުދާގެ ދުޅަވެފައިވާ ދެލޯ ފެނި ރަނާ ހާސްވިއެވެ.
ޝަރީފު އަހަރެން ދޫކޮށްފަ ދިޔައީ...""
ރޮމުން ރަނާގެ ގައިގައި ހުދާ ބައްދާލިއެވެ. އޭގެ ދިހަ ވަރަކަށް މިނިޓް ފަހުން ވީގޮތް އޮޅުންފިލި އިރުގައި ރަނާގެ ރުޅި ވަނީ ގަދަވެފައެވެ. "ޝަރީފު އަކީ ހާދަ ވިޔާނުދާ މީހެކޭ ދޯ.... ހުދާ އެކަހަލަ މީހަކާ އެކީ އުޅޭނެ ކަމެއް ނެތް... ކޮންމެ ކަމެއްވެސް ވާނީ ރަނގަޅަކަށް... މިކަންވެސް މިހެން މިވީ އޭގައި ކޮންމެވެސް ޢިބުރަތެއް އޮތީމަ..." ހުދާގެ ހިތަށް ތަސައްލީ ހޯދައިދެވޭތޯ ރަނާ ބެލިއެވެ.
އޭގެ 5 ވަރަކަށް ދުވަސް ފަހުން ހުދާ ރަށު ކޯޓަށް ހާޒިރު ކުރިއެވެ. ވަރި ސާބިތު ކުރުމުގެ އަޑުއެހުމަށެވެ. ޝަރީފު ވަރި ކުރި ފަހުން ހުދާއަށް ޝަރީފު މި ފެނުނީ ކިރިޔާއެވެ. ހުދާ ކަޅި ޖަހާނުލާ ޝަރީފުއަށް ބަލަމުން ގެންދިޔައިރުވެސް ޝަރީފު އިނީ އިސް ޖެހި ގޮތަށް އިސް އުފުލާވެސް ނުލައެވެ. ޝަރީފު އިސް އުފުލާލީ ގާޒީ އޭނާއާއި ސުވާލު ކުރުމުންނެވެ. ސުވާލަކަށް ފަހު ސުވާލަކަށް ޖަވާބު ދެމުން ގޮސް ހުދާގެ ހަށި އިން ގޮތެއް ގާޒީ އެހިއެވެ. ޖަވާބު ދިނުމަށް ހުދާ ތައްޔާރުވި ތަނާ ޝަރީފު ދިން ޖަވާބުން ހުދާގެ ހަށިގަނޑުގެ އެންމެ ހިމަ ނާރުތަކަށް ވެސް އަސަރު ކުރިއެވެ.
"އަހަރެން އޭނާ ވަރި ކުރީ އޭނާއަކީ ދަރިން ނުލިބޭ އަންހެނަކަށް ވީމައެއްނުން."
ވަރީގެ ފޯމުގައި ސަބަބުގެ ގޮތުގައި އެހެން ލިޔެވިފައިވާތަން އެތައް ފަހަރަކު ފެނުނު ނަމަވެސް ޝަރީފުގެ އަނގައިން އެވާހަކަ އަޑު އިވުމުން ހުދާގެ ހިތަށް އަސަރު ކުރިއެވެ. ހުދާއަށް ނޭވާލާންވެސް އުނދަގޫވިއެވެ. ދަރިއަކު ލިބޭތޯ ދިންހާ ފަރުވާއަކާއި، ކުރިހާ ދުޢާއެއްގެ ހެކިވެރިންނަކީ ހަމަ ހުދާއާއި ޝަރީފުއެވެ. އޭރު ދެމީހުން އެކަކު އަނެކަކަށް ދެމުން ދިޔަ ހިތްވަރުން އުންމީދުތައް އާކުރަމުން ދިޔައެވެ. ކޮންމެ ގޮތެއް ވިޔަސް ހުދާގެ އެންމެ ކައިރީގައި އެކުގައި އަބަދު ވާނެކަމަށް ވަޢުދުވީ ޝަރީފުއެވެ. އެހެނަސް އެދުވަސްތަކުގެ މަތިން މިއަދު ޝަރީފު ހަނދާން ނެތްކަން ހުދާއަށް އެނގުނެވެ. ހުދާ ކުރި އިތުބާރުގެ އަގެއްނެތެވެ. ހުދާގެ ހަޔާތުގައި ޖެހި ފުރަތަމަ ކައިވެނީގެ ގޮށް އަބަދުގެ އަބަދަށް މޮހާލެވުނީއެވެ.
ހުދާ އެކަނިވީއެވެ. ހުދާގެ މަންމައާއި ބައްޕަ، ހުރި ހަމައެކަނި ދަރިފުޅު ބަހައްޓާފައި ދުނިޔެ ދޫކުރިތާ ކިތަންމެ ދުވަހެކެވެ. ހުދާގެ މުސްކުޅިވެފައިވާ ބޮޑުދައިތައެއްގެ އާއިލާ ފިޔަވާ އިތުރު އެހެން ބަޔަކު އެރަށުގައެއް ނޫޅެއެވެ. އެންމެ ގާތް ރަޙުމަތްތެރިއަކީ ރަނާއެވެ. ހުދާގެ ހަޔާތަށް ބިންދާލި ރާޅުގެ އަސަރު އެތައް ދުވަހަކަށް ދެމިގެން ދިޔައެވެ. ކާހިތް ނުވެ، މީހާ ހިކި އަނަރޫފަވެ ގައިން ބާރު ދޫވާން ފެށިއެވެ. ނަރުހެއްގެ ވަޒީފާ ނުހަނު ބަރާބަރަށް އަދާކުރަމުން ދިޔަ ހުދާއަށް ޑިއުޓީއަށް ދިއުމަށްޓަކައި އެނދުން ތެދުވުންވެސް ވީ ބުރަ ކަމަކަށެވެ. ހުދާ ވެއްޓިފައިވާ އަނދަވަޅުން އަރައިގަތުމަށް ވަގުތު ނެގިއެވެ. އެތައް ބައެއްގެ އެހީތެރިކަން ވެސް ލިބުނެވެ.
ހުދާގެ ވަރިއަށް ހަ މަސް ވޭތުވެ ދިޔައިރު އޭނާ ވަނީ ދިމާވި ކަންތައްތަކުން އަރައިގަނެ، އަނބުރާ ވަޒީފާއަށް ނިކުންނަން ފަށާފައެވެ. ނަރުހެއްގެ ގޮތުގައި އަދާކުރަން ޖެހޭ ހުރިހާ ކަމެއް ފަސް ނުޖެހި ކުރަމުން ދިޔައެވެ. މަސައްކަތުގެ މާހައުލުގެ ގޮތުން ތަފާތު އެކި މިޒާޖުގެ އެކި އުމުރުގެ މީހުންނާއި ދިމާވެއެވެ. ހުދާ އެދުވަހު ހެނދުނުގެ ޑިއުޓީ އަދާކުރަން އޮތީ ރަނާއާއި އެކު ވާރޑުގައެވެ. ވާރޑުގައި މެދު އުމުރުގެ ދެ މީހަކާއި ހަ އަހަރުގެ ކުޑަ ކުއްޖެއް އޮތެވެ. ބަލިމީހުންގެ ކައިރިއަށް ދިޔައިރުގައި ކުޑަ ކުއްޖާގެ ކައިރީގައި ބޮޑު މީހަކު ފެންނަން ނެތުމުން ރަނާ ގާތުގައި އެވާހަކަ ބުނެލިއެވެ.
ރަނާ ބުންޏެވެ."ބެޑް ފައިވް ތަ؟ އަރުމް؟... އެއީ އިޔާދުގެ ދަރިއެއް"
"އިޔާދު؟ މިރަށު މީހެއް ނޫން ދޯ؟" ނުދަންނަ މީހަކަށް ވުމުން ހުދާ އަހާލިއެވެ.
"ހުމްމްމް... ވަރަށް ފަހުން މިރަށަށް ބަދަލުވެގެން އުޅެނީ އޭނާގެ ދަރިފުޅަށް ކިޔަވަދޭން ވެގެންނޯ ... ފެނަކައިގަ އުޅެނީ... ސިންގަލް ޑޭޑް އެއް އެއީ... އޭ ހުދާއަށް ރަނގަޅެއްނުން..." ހުދާގެ ކޮޑުގައި ކޮށްޓާލަމުން ރަނާ ބުނެލިއެވެ.
" ރަނާވެސް ދޯ... ހަމަ ތަނަކުން މީހަކު ފެންނަ އިރަށް އެބަ ދައްކަޔޭ..." ހުދާގެ ގާތަށް ހިނިއައެވެ. އަދި ބޯ ހޫރާލުމަށްފަހު ކޮމްޕިއުޓަރ ކައިރީގައި އިށީނެވެ.
ގަޑިން 9 ޖެހުމުން ހެނދުނު ގަޑީގައި ދޭން ޖެހޭ ބޭސް ދިނުމަށްޓަކައި އަރުމްގެ އެނދު ކައިރިއަށް ހުދާ ދިޔަ އިރުގައި އަރުމްއަށް އޮތީ ނިދިފައެވެ. އަރުމްގެ ކައިރީގައި އެނދުމަތީގައި ބޯ އަޅައިގެން ފިރިހެނަކު އޮތެވެ. އެ ވާނީ ރަނާ އެކީ އަރުމްގެ ބައްޕަ އިޔާދު ކަމަށް ހުދާ ނިންމިއެވެ. ގަޑިއަށް ބޭސް ދޭން ޖެހޭތީވެ އަރުމް އަށް ގޮވާލިއެވެ. ގޮވާލި އަޑަށް ނިދިފައި އޮތް އިޔާދު އަށް ސިއްސައިގެން ގޮސްފައި ހޭލެވިއްޖެއެވެ.
"އަރުމް ބޭސް ބޯން ޖެހޭ ވަގުތު ޖެހިއްޖެ... އަވަހަށް ގޮވާލަދީ"
ހުދާ މިހެން ބުނުމާއެކު ދަރިފުޅާއޭ ކިޔާ އަރުމް ހޭލައްވައިގެން ކޮޅަށް ނެގިއެވެ. ބޮޑާހޭކުމެއްނެތި އަރުމް ބޭސް ބޮއިގެން ފެން ބޯން ފެށިއެވެ. އެވަގުތު ކައިރީގައި ހުރި އިޔާދުއަށް ހުދާ ބަލައިލިއެވެ. މޫނުމަތިން ވަރުބަލިކަމުގެ އިތުރުން ހާސްކަން ފާޅުވެއެވެ. ހީވާގޮތުން ރޭގައި ނުނިދަނީއެވެ. އިޔާދުގެ ހާސްކަން ފިލުވައިލުމަށްޓަކައި ހުދާ ބުނެލިއެވެ
" އެންމެ ފުރަތަމަ ހޮސްޕިޓަލަށް ގެނައި އިރަށް ވުރެން މިހާރު އަރުމްގެ ހާލަތު ރަނގަޅު.. ހުންވެސް މަޑުވަމުން ދަނީ " ހުދާގެ ވާހަކައަށް އިޔާދު ބޯ ޖަހާލިއެވެ. ހުދާ އަނބުރާ ކައުންޓަރާއި ދިމާލަށް އައި އިރުގައި ހުރިހާ ދަތްތަކެއް ސޭލު އަޅުވައިގެން ރަނާ ހުއްޓެވެ. ރަނާގެ ގޮތް ވަރަށް ރަނގަޅަށް ހުދާއަށް އެނގެއެވެ. އެހެން ކަމުން އަވަހަށް ފާޚާނާއަކަށޭ ބުނެ ހުދާ ވާރޑުން ނިކުތެވެ. އަރުމްގެ ހުން ރަނގަޅުވެ އޭގެ އަނެއް ދުވަހު ހޮސްޕިޓަލުން ދޫކޮށްލުމުން ހުދާއާއި އިޔާދުއާއި ދިމަލެއް ނުވިއެވެ.
އެހެނަސް ތަޤުދީރުގައި ދެމީހުންގެ ވާހަކަ އަދި ކިރިޔާ ފެށުނީއެވެ. ހުދާއަށް ދެން އިޔާދު ފެނުނީ އޭގެ ދެ ވަރަކަށް ހަފްތާ ފަހުންނެވެ. ހުދާ ދިރިއުޅޭ މަގުގައި ހުރި އެހެން ގެޔަކުން އިޔާދު ނިކުންނަނިކޮށް ފެނުނީއެވެ. އިޔާދު ހުރީ ސްކޫލް ޔުނިފޯމުގައި ހުރި އަރުމްގެ އަތުގައި ހިފައިގެންނެވެ. އަރުމްއާއި ވާހަކަ ދައްކަމުން ދިޔައީ ހިނިތުންވުމާއި އެކީގައެވެ. އެއް މަގެއްގައި ދިރިއުޅެން ފެށުމުން އެކަކު އަނެކަކަށް ގިނަ ގިނައިން ފެންނަން ފެށިއެވެ. އަބަދުވެސް ދެބަފައިން ފެނުމުން ހުދާ ހިނިތުންވުމެއް ދެއެވެ. އަނބުރާ އިޔާދުވެސް ހިނިތުންވެލާ ނިތް އެއްލައެވެ. އެއަށްފަހު މަގުމަތިން ދިމާވުމުން ހާލު އެހުމާއި އެކި އެކި ދުނިޔަވީ ވާހަކަ ދެކެވެން ފެށިއެވެ. ގިނަގިނައިން އިޔާދު ފެންނަން ފެށި ވަރަކަށް ހުދާގެ ހިތުގައި ތަފާތު އިހުސާސުތަކެއް ކުރަން ފެށިއެވެ. މިކަމާ ހުދާގެ ހިތްވެސް ބިރުގަންނަން ފެށިއެވެ. އެއީ ހުދާގެ ހިތުގައި ބިންވަޅުނެގިފައިވާ ޝަރީފުގެ ނަން ފަނޑުވަމުންދާން ފެށުމުންނެވެ. ހުދާ އޭނާއަށް ކުރެވެން ފެށި އިހުސާސްތަކަށް ފަސްއަޅާ ފޮރުވާލަން ބޭނުންވިއެވެ. އެއީ ދެވަނަ ފަހަރަށް ހިތަށް އަނިޔާއެއް ދޭން ބޭނުން ނުވީމައެވެ.
އެހެންނަމަވެސް ދުވަސްތައް ފާއިތުވަމުން ދިޔަ ވަރަކަށް ހުދާގެ ހިތް ދިޔައީ އިޔާދުއަށް އެދެމުންނެވެ. ހުދާގެ ހިތާއި ސިކުނޑީގެ އަރައިރުންވުމަކަށް ހިނގައްޖެއެވެ. އިޔާދުގެ އެއްވެސް އިޝާރާތެއް ނުވުމުންވެސް ހުދާ ހުރީ ހިތުގައި ޖެހިފައެވެ. ރަނާ ގާތުގައި ހުދާގެ އިހުސާސުތައް ބަންޑުންކޮށްލީ ރަނާގެ ހިޔާލެއް ހޯދުމަށެވެ.
" އަހަރެން މިހުންނަނީ ހުދާ ތިޔަ ވާހަކަ ދައްކާނެ ދުވަހެއްގެ އިންތިޒާރުގައި..... އަބަދު ޝަރީފުގެ ހިޔަނީގައެއް ނޫޅެވޭނެ. ހުދާ އަކީ ހުދާ.. ހުދާވެސް ޖެހޭނެ އަމިއްލަ ނަފްސާމެދު ވިސްނަން. ހުދާއަށް އިޔާދު ކަމުދާނަމަ ތިޔައީ ހަމަ ވަރަށް ރަނގަޅު ކަމެއް ކުރަން" ރަނާ މަޑުމައިތިރިކަމާއެކު ވާހަކަ ދެއްކިއެވެ.
" އެކަމަކު އޭނައަށް އަހަރެންގެ ބަލިފައި އެނގޭނަމަ އަހަރެންނަކާ ނުރުހޭނެ." ހިތާމައާއިއެކު ހުދާ ބުނެލިއެވެ.
ފުން ނޭވާއަކަށް ފަހު ރަނާގެ ވާހަކަ ފެށިއެވެ " ހުދާ.... މީހެއްގެ ގޮތް ކިޔާނީކީ އެމީހެއްގެ ހުންނަ ބަލިކަށި ކަމަކުން އެކަންޏެއް ނޫން. ކޮންމެ މީހެއްގެވެސް ވީކް ކަންކަން ހުންނާނެ. އެކަމަކު ހަމައެކަނި އެކަންކަމަށް ބަލައިގެން ކިހިނެއް އަހަރުމެން އުޅޭނީ؟ އެންމެންނަކީ ޕާރފެކްޓް މީހުންނެއް ނޫން. އެކަމަކު ކޮންމެ މީހެއްގެވެސް ހުންނާނެ ރަނގަޅު ސިފަތަކެއް. ހަމައެކަނި ގޯސް ކަންކަމަށް ބަލަން ހަދައިގެން މީހާގެ ރަނގަޅު ކަންތައްތައް މަތިން ހަނދާން ނެތުނީމަ ކަމަކު ނުދާނެ. ހުދާ ބުނެބަލަ. ހުދާގެ ކިބައިގައި ހުންނަ އެންމެ އެކަހަލަ ކަމަކުން ހުދާގެ ހުރިހާ ރަނގަޅު ކަމެއް ދަނީތަ އަޅެފަހެ؟" ހުދާ އޭނާގެ ބޯ ހޫރާލިއެވެ.
" އާން..... އެހެންވީމަ ހުދާވެސް ވިސްނަންވީ ހުދާގެ ރަނގަޅު ސިފަތައް މަތިން. އިޔާދުއަށް ހުދާގެ އެ ސިފަތައް ކަމުދޭ... ދެން އެހެންވީމަ އޭގަ ނެތެއްނުން މައްސަލައެއް" ރަނާގެ ވާހަކައިން ހުދާ އިސްއުފުލާލިއެވެ.
" އިޔާދު ބުނީތަ އެއްޗެކޭ ރަނާ ކައިރީގައި؟ " ހުދާ އަހާލިއެވެ. " ހުމްމް... މީގެ ދެދުވަސްވަރު ކުރިން އިޔާދުއާއި އަހަރެންނާ ދިމާވި. ހުދާގެ ވާހަކަ އެހީ... " ވާހަކަ މިހިސާބަށް ދިއުމާއެކު ހުދާގެ ހިތް ތެޅެންފެށިއެވެ. އިޔާދު ބުނީ ކީކޭތޯ ބަލަން ކެތްމަދު ވެއްޖެއެވެ. މަޑުމަޑުން އިޔާދު ބުނީ ކީކޭތޯ އަހާލިއެވެ.
"އިޔާދު ބުނީ ގަޔާވެޔޯ ހުދާއާ. ވަރަށް ލައިކްވެޔޯ...ތިމަންނަ ބޭނުމޯ އަރުމްއަށް މަންމައެއްގެ ލޯބި ހޯދަދޭން. ދެން އަހަރެން ބުނިން އަޅެ ހުދާގެ ހިޔާލެއްވެސް ތިޔަ ކަމުގައި ބަލާނަމޭ... ހުދާގެ ވިސްނުން ވެސް އެއްގޮތް ވަންޏާ ދެމީހުން ވާހަކަ ދައްކާފައި ތިޔަކަން ހަމަ ކުރަންވިއްޔޭ" މިހިސާބުން ހުދާގެ ހާސްވެފައިވާ ހިތަށް ތަސައްލީއެއް ލިބުނެވެ.
އޭގެ ހަފްތާއެއްވަރު ފަހުން ހުދާއާއި އިޔާދުއާއި ދެމީހުން ދިމާވިއެވެ. ދެމީހުންގެ ގުޅުމެއް ފަށަން ބޭނުންވަނީ ހުރިހާ ކަމެއް ސާފުކޮށް އެނގިގެން ކަމަށް ބުނެ ހުދާ އޭނާގެ ޙާލަތު އިޔާދުއަށް ކިޔައިދިނެވެ. އިޔާދުވެސް އޭނާގެ މާޒީގެ ޞޮފްހާތައް ހުޅުވާލާ ހުދާއަށް ދައްކާލިއެވެ. ދެމީހުންގެ ގުޅުން ދުވަހެއް ދުވަހަކަށް ބަދަހިވަމުން ދިޔައެވެ. ދެމީހުންގެ ގުޅުމަށް 1 މަސްވެގެން ދިޔުމުން އަރުމްއާއި ހުދާއާއި ބައްދަލު ކުރިއެވެ. އަރުމްއަށް ދޭހަވާނެ ގޮތަކަށް އިޔާދު ބުނެދެވޭތޯ ބެލިއެވެ. ހުދާއާއި އަރުމްގެ ގުޅުންވެސް ދުވަހެއް ދުވަހަކަށް ބަދަހި ވަމުން ދިޔައެވެ.
އޭގެ 4 މަސް ފަހުން ހުދާއާއި އިޔާދުގެ ކައިވެނީގެ ވާހަކަ ދެކެވެންފެށިއެވެ. ކައިވެނީގެ ކަންކަން ހަމަޖެއްސުމުގައި ހުދާ، ރަނާ އަދި ބޮޑުދައިތަ އަވަދިނެތި ހަރަކާތްތެރިވާން ފެށިއެވެ. އެދުވަހު ހުދާ އިނީ އަރުމްއަށް ސްކޫލުން ދީފައިވާ ފިލާވަޅެއް ކިޔައިދިނުމަށެވެ. އެހެން އިންދާ އައީ ރަނާގެ ފޯން ކޯލެކެވެ. ދުރަށް ޖެހިލާ ފޯނު ނަގާލިއެވެ. ރަނާ ގުޅީ ޝަރީފުގެ އެދުމުގެ މަތިންނެވެ. ރޭ ދަންވަރު މަރީ ވިހެއި ވާހަކަ ބުންޏެވެ. އަދި ޝަރީފު އެރޭ ހުދާއާއި ދިމާލަށް އެއްޗިހި ކިޔުނީތީ މަޢާފަށް އެދެން ބޭނުންވިނަމަވެސް ހުދާގެ ކުރިމައްޗަށް ދާނެ ހިތްވަރު ނެތުމުން ރަނާ ގާތުގައި މިވާހަކަތައް ބުނެދޭން ބުނީ ކަމަށް ބުންޏެވެ. ޝަރީފު ބައްޕައަކަށް ވީތީ ހުދާ ޙަމްދު ކުރިއެވެ. މިހާރު ހުދާގެ ހިތް ޝަރީފުއަށް ސާފުކަމަށާއި ކޮންމެކަމެއްވެސް ވާނީ އޭގައި ހިކުމަތެއް އޮތުމުން ކަމަށް ޝަރީފުގާތުގައި ބުނެދިނުމަށް އެދުނެވެ. އަދި ޝަރީފުއަކީ ވަރަށް ރަނގަޅު ބައްޕައަކަށް ވާނެކަމަށް އުންމީދު ކުރާކަމަށްވެސް ބުންޏެވެ. ފޯނުކޯލް ނިންމާލުމަށްފަހު ހުދާ ހިފަހައްޓައިގެން ހުރި ނޭވާ ދޫކޮށްލިއެވެ. މި ދުވަސް އަންނާނެކަން ހުދާއަށް އެނގެއެވެ. ޝަރީފުއާއި ވަކިވުމަށްފަހު މިދުވަހު ކަންތައްވާނެ ގޮތާއިމެދު އެކި ގޮތްގޮތަށް ވިސްނުނެވެ. އެހެނަސް ހުދާގެ ޒަމީރު މިއަދު ވަނީ އެދުވަހަށްވުރެން ވަރުގަދަ ވެފައެވެ. މިދުވަހާއި ކުރިމަތިލާނެ ހިތްވަރު މިއަދު ވަނީ ލިބިފައެވެ. ލުއި ހިނިތުންވުމަކާއިއެކު ގޮސް އަރުމް ކައިރީގައި އިށީނެވެ.
ހުދާއާއި އިޔާދުގެ ކައިވެނި ކުރެވުނީ ކޯޓުގައެވެ. ކައިވެނީގެ ވަލީމާ ބޭއްވުނީ ވަރަށްވެސް ކުޑަ ގޮތަކަށެވެ. އެއީ ދެމަފިރިންވެސް ބޭނުންވި ގޮތެވެ. އިޔާދުއާއި އަރުމްގެ ދިރިއުޅުން ބަދަލު ކުރީ ހުދާގެ ގެއަށެވެ. ހަޔާތުގައި ދިމާވެފައިވާ ކަންތައްތަކުން ދެމީހުންވެސް ޢިބުރަތް ހާސިލްކޮށްގެން ހަޔާތުގެ އައު ދަތުރެއް ފެށީ އެކީގައި ރަނގަޅު ދިރިއުޅުމެއް އުޅެވިދާނެ ކަމުގެ އުންމީދާއި އެކުގައެވެ. އަރުމްއަށް މަންމައެއްގެ ލޯބި ހޯދައިދިނުމަށް އުންމީދުކޮށްގެން ހުރި އިޔާދުއަށް ހުދާވީ ހަމަ ޖަވާހިރަކަށެވެ. އަމިއްލަ ދަރިއެއް ނޫންނަމަވެސް ހުރިހާ ކަމެއް އަރުމްއަށް ކޮށްދެނީ އެހާ ލޯތްބާއި އޯގާތެރިކަމާއިއެކީގައެވެ. އަރުމްގެ މަންމަ ދުނިޔެ ދޫކުރިތާ އަދި ވީ ދެ އަހަރެވެ. އެހެންކަމުން އަރުމްއަށް ހުދާއަށް މަންމަ ކިޔާފައި ގޮވުން ވީ އުނދަގޫ ކަމަކަށެވެ. އެހެނަސް އަރުމްވެސް ހުދާ ދެކެ ވަރަށް ލޯބިވެއެވެ.
ހުދާއާއި އިޔާދުގެ ކައިވެންޏަށް 1 އަހަރުވުމުގެ އުފަލުގައި އިޔާދު ބޭނުންވީ އެދެމީހުން އެކަނިން ދަތުރެއް ދިއުމަށެވެ. މިކަމާ ހުދާގެ ހިތް ނުތަނަވަސް ވިއެވެ. " އެކަމަކު އަރުމް އެކަނިން ބަހައްޓާފަ ދާކަށް އަހަރެން ހިތްހަމައެއް ނުޖެހޭ..." އެއް ރޭ ނިދަން އޮށޯވެ ހުދާ ބުންޏެވެ. ހުދާގެ ވާހަކަ އަޑުއެހުމަށްފަހު އިޔާދު ބުންޏެވެ. " އަހަރުމެން މިދަނީ އެންމެ ރެއަކަށް. އަރުމް ނުލާހިކު ބޭނުންވޭ ބޮޑުދައިތަ މެންގޭގަ އެވަރުގެ ކުދިން އުޅޭތީވެ އެގެއަށް އޯވަރނައިޓް އަކަށް ދާން. އަނެއްކަ ކަމެއް ވެއްޖިއްޔާ ރަނާ ހުންނާނެ. އަހަރެން ބުނެފަ އޮންނާނީ ގުޅައްޗޭ... ". އިޔާދުގެ ވާހަކައިން ހުދާއަށް ކޮންމެވެސް ވަރެއްގެ ހިތް ހަމަޖެހުމެއް ލިބުނެވެ.
ދެމީހުންގެ ކައިވެންޏަށް 1 އަހަރުވީ ދުވަހު ދިޔައީ ކައިރި ރިސޯޓަކަށެވެ. ދެމީހުން އެކަނިން ވަގުތުކޮޅެއް ހޭދަކޮށްލުމަކީ ކިހާ މުހިންމު ކަމެއްކަން ހުދާއަށް އިހުސާސުވިއެވެ. "ކޮންމެ އެނިވަރސަރީއެއްގަ މިކަހަލަ ދަތުރެއް ދާންވާނެ އިޔާދު. އަހަރުމެން ދެމީހުން އެކަނިން" އަނެއް ދުވަހުގެ ހެނދުނުގެ ނާސްތާއަށް އިންސާފުކުރަމުން ހުދާ ބުނެލިއެވެ. މިކަމަށް ތާއީދު ކުރުމުގެ ގޮތުން އިޔާދުވެސް ބޯ ޖަހާލިއެވެ.
ރަށަށް އަނބުރާ ދިއުމަށްޓަކައި ލޯންޗުގެ އިންތިޒާރުގައި ހުދާ އިނީ އޭނާގެ ފޯނާއި ކުޅޭށެވެ. އެވަގުތު ފޯނަށް އައި ނޮޓިފިކޭޝަންއެއް ފެނި ހުދާ ސިއްސައިގެން ދިޔައެވެ. އަދި އެޕް ހުޅުވާލާ ކަލަންޑަރަށް ރަނގަޅަށް ބަލާލިއެވެ. ހުދާގެ ސިކުނޑި ހަލުވިކަމާއެކު މަސައްކަތް ކުރަން ފެށިއެވެ. ހުދާ އަނެއްކާވެސް ސިއްސައިގެން ދިޔައީ އިޔާދު ގޮވާލި އަޑަށެވެ. ލޯންޗު އައީ ކަމަށް ބުނުމުން ފޯނު ޖީބަށްލުމަށްފަހު ޖެޓީއާއި ދިމާލަށް ހިގައިގަތެވެ.
ރަށަށް ދެވުމާއެކު ހުދާ ބޭނުންވީ ހުދާގެ ޝައްކު ޔަޤީން ކުރާށެވެ. އަރުމް ނިދަން ބޭއްވުމަށް ފަހު އަނބުރާ ކޮޓަރިއަށް ވަތް އިޔާދުއަށް ފެނުނީ ހުދާ އެނދުކައިރީގައި އިށީނދެ އިންތަނެވެ. ހުދާގެ ކައިރިއަށް ދިޔައިރު ހުދާ އިނީ އިސްޖަހައިގެން ދެފައި ގަޔާ ކައިރިކޮށްގެނެވެ. އިޔާދު ގޮވާލުމުންވެސް ޖަވާބެއް ނުލިބުމުން ހުދާގެ ދެ ކޮނޑުގައި ހިފާ ތަޅުވާލިއެވެ. އިސް އުފުލާލާ އިޔާދުއާއި ދިމާލަށް ބަލާލި އިރު ހުދާ އިނީ ފެންކަޅި ވެފައެވެ. ހުދާއަށް އިޔާދު ފެނުމުން ބާރަށް ރޯން ފެށުނެވެ. އަދި އަތުގައި އޮތް ޕްރެގްނެންސީ ޓެސްޓް އިޔާދުއަށް ދައްކާލިއެވެ. ޓެސްޓް ފެނުމާއެކު އިޔާދު ގަނޑުވިއެވެ. ހުދާގެ އަތުން ޓެސްޓް އަތުލާ ދެލޯ ކައިރިއަށް ގެނެސްގެން ބެލިއެވެ. އުފަލުގެ ކަރުނައިން އިޔާދުގެ ދެލޯވެސް ތެންމާލިއެވެ. "ހުދާ....." ހުދާގެ ގައިގައި އިޔާދު ބައްދާލިއެވެ. ދެމީހުން އެކަކު އަނެކަކުގެ ކޮނޑު އުފަލުގެ ކަރުނައިން ތެންމަމުން ދިޔައެވެ. "އަހަރެންނަށް އެނގޭ ހުދާ މިދުވަސް ދެއްވާތޯ ކުރިހާ ދުޢާ... އަހަރެންވެސް ހާދަ ދުޢާއެއް ކުރީމޭ .. ހާދަ އުންމީދެއް ކުރީމޭ.... އަހަރެންގެ އަރުމްވެސް ތި ބަލަނީ ހަމަ އަމިއްލަ ދަރިއެއް ފަދައިން.... އިރާދަކުރެއްވިއްޔާ މި ކުއްޖާއަށްވެސް އެއްވެސް ކަމެއް އުނިވިޔަކަ ނުދޭނަން" ހުދާގެ ބަނޑުމަތީގައި އަތް ބާއްވައިލުމަށްފަހު އިޔާދު ބުންޏެވެ.
- ނިމުނީ -