"ކުރިމަގު ކެމްޕެއިން" މިނިސްޓްރީ އޮފް ފެމިލީ އެންޑް ޖެންޑަރ ޒެނީޝާ ޝަހީދު ޒަކީ އިފްތިތާޙް ކޮށްދެވައިފިއެވެ.
މި ކެމްޕެއިން އިފްތިތާޙްކުރެއްވީ، ޖެންޑަރ މިނިސްޓްރީން މިއަދު މޫކައި ހޮޓެލްގައި ބޭއްވެވި ރަސްމިއްޔާތެއްގެެ ތެރެއިންނެވެެ.
ކެމްޕެއިން އިފްތިތާޙް ކޮށްދެއްވުމަށްފަހު ޖެންޑަރ މިނިސްޓަރ ދެއްކެވި ވާހަކަފުޅުގައި، އިޖްތިމާޢީ ރައްކާތެރިކަން ކަށަވަރުކުރެއްވުމަށް، ވަކިން ޚާއްޞަކޮށް އަންހެނުންގެ ޙައްޤުތައް ރައްކާތެރިކޮށް، ކުރިއެރުވުމަށް ސަރުކާރުން ކުރައްވަމުން ގެންދަވާ މަސައްކަތްތައް ބަޔާންކުރެއްވިއެވެ. ހަމަ އެއާއެކު ކުރިމަގު ކެމްޕެއިންގެ ތެރެއިން އެމިނިސްޓްރީން ހިއްޕަވާފައިވާ އަމާޒާއި، ކުރައްވަން ނިންމަވާފައިވާ ކަންކަން ބަޔާން ކުރެއްވިއެވެ.
"މިއަދު އިފްތިތާޙް މިކުރެވުނު "ކުރިމަގު" ކެމްޕެއިނަކީ، އަންހެނުންނަށް ލިބިގެންދާނޭ ވަރަށް ބޮޑު އުންމީދެއްކަމުގައި އުންމީދުކުރަން. ކުރިމަގު ކެމްޕެއިންގެ މައިގަނޑު މަޤްޞަދަކީ، ގެވެށި އަނިޔާއިން އަންހެނުން ރައްކާތެރިކުރުމާއި، އިޖްތިމާއީ، އިޤްތިޞާދީ، އަދި ސިޔާސީ ރޮނގުން އަންހެނުންގެ ބައިވެރިވުން އިތުރު ކުރުން. މި ކެމްޕެއިންގެ ދަށުން، މިދެންނެވި ދާއިރާތަކާ ގުޅޭގޮތުން، ވަކިވަކި ގޭގެއަށް ޒިޔާރަތްކޮށް މަޢުލޫމާތު ފޯރުކޮށްދިނުމާއި، ހޭލުންތެރިކުރުމުގެ ސެޝަންތަކާއި، ތަމްރީން ޕްރޮގްރާމްތަކާއި، ވޯކްޝޮޕްތައް، މަލެއާއި އަތޮޅުތެރޭގައި ކުރިޔަށް ގެންދިއުމަށް ވަނީ ހަމަޖެހިފައި" މިނިސްޓްރީ އޮފް ޖެންޑަރ އެންޑް ފެމިލީ ޒެނީޝާ ޝަހީދު ޒަކީ ވިދާޅުވިއެވެ.