އެމްޓީސީސީގެ މަޝްރޫޢުތަކަށް ބޭނުންވާ ބޮޑުހިލައިގެ ފުރަތަމަ ބަލްކް ޝިޕްމަންޓް ރާއްޖެ ގެނެސްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފައިވާ ޕީއެސްއައިޕީ މަޝްރޫޢުތަކަށް ބޭނުންވާ ބޮޑުހިލައިގެ ފުރަތަމަ ޝިޕްމަންޓް ރާއްޖެ ގެނެސްފިއެވެ.

އެމްޓީސީސީއިން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރައްޔިތުންނާ ބައްދަލުކުރެެއްވުމަށް ކުރައްވާ ދަތުރުފުޅުތަކުގައި، ރައްޔިތުން އެދިލައްވަމުން ގެންދަވާ ޢުމްރާނީ ތަރައްޤީގެ މަޝްރޫއުތުތައް ނުހުއްޓި ކުރިއަށް ގެންދިއުމަށްޓަކައި، އެމްޓީސީސީއާ ހަވާލުކޮށްފައިވާ މަޝްރޫއުތަކަށް ބޭނުންވާ ބޮޑު ހިލައިގެ ފުރަތަމަ ބަލްކް ޝިޕްމަންޓް ރާއްޖެ ގެނެސްފައިވާކަމަށެވެ.

އެގޮތުން، އެމްޓީސީސީއާ ހަވާލުކޮށްފައިވާ މަޝްރޫޢުތައް ނިންމުމަށް ބޭނުންވާ 2.5 މިލިޔަން ޓަނުގެ ބޮޑު ހިލަ މިއަހަރު ނިމުމުގެ ކުރިންރާއްޖެ ގެނައުމުގެ މަސައްކަތް ކުރަމުން އަންނަކަމަށް އެކުންފުނިން ވިދާޅުވެއެވެ. އަދި މި ޝިޕްމަންޓް ގެނެސް، އެ ކުންފުންޏާ ހަވާލުކުރެވިފައިވާ މަޝްރޫޢުތައް ނިމުމާއެކު، ރައްޔިތުންނަށް ގިނަ ފަސޭހަތަކެއް ލިބިގެންދާނެކަމަށް އެ ކުންފުނިން ވިދާޅުވެއެވެ.

އެމްޓީސީސީން ވިދާޅުވީ، ޕީއެސްއައިޕީ މަޝްރޫޢުތަކަށް ބޭނުންވާ ބޮޑު ހިލައިގެ ފުރަތަމަ ބަލްކް ޝިޕްމަންޓުގައި، 56،450 ޓަނުގެ ބޮޑުހިލަ ރާއްޖެ ގެނެވިފައިވާކަމަށެވެ.

އެގޮތުން، މި ޝިޕްމަންޓުގައި ގެނެވިފައިވާ ބޮޑު ހިލައިގެ ތެރެއިން މާޅޮސްމަޑުލު ދެކުނުބުރީ މާޅޮހުގެ ބަނދަރު ތަަރައްޤީކުރުމަށް ބޭނުންވާ ބޮޑުހިލައިގެ ފުރަތަމަ ޝިޕްމަންޓް އެ ރަށަށް ގެންގޮސްފައިވާކަމަށް އެކުންފުނިން ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، އެމްޓީސީސީއަށް ހަވާލުކޮށްފައިވާ ޕީ.އައި.އެސް.ޕީ މަޝްރޫޢުތަކަށް ބޭނުންވާ ބޮޑުހިލައިގެ ފުރަތަމަ ބަލްކު ޝިޕްމަންޓް ރާއްޖެ ގެނެސްފި
ޕްރެސް ރިލީޒް:https://t.co/0EnZ8Dl6Qc pic.twitter.com/PxybxZV94M

— MTCC Plc (@MTCCPlc) October 11, 2025

މީގެއިތުރުން، ބ، ރ، އަދި ޅ އަތޮޅުގެ އެހެނިހެން މަޝްރޫޢުތަކަށް ބޭނުންވާ ބޮޑު ހިލައިގެ ޝިޕްމަންޓު ފޮނުވޭނެކަމަށް އެމްޓީސީސީން ވިދާޅުވެއެވެ.

ވޭތުވެދިޔަ 44 އަހަރުތެރޭ އެމްޓީސީސީން ވާނީ ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްޤީގެ ގިނަ މަޝްރޫޢުތަކެއް ހިންގައި ކާމިޔާބުކަމާއެކު ނިންމައިފައެވެ. އަދި މިހާރުވެސް އެކުންފުނިން އަންނަީ ރާއްޖޭގެ ޢުމްރާނީ ތަރައްޤީގެ ގިނަ މަޝޤރޫޢުތަކެއްގެ މަސައްކަތް ކުރަމުންނެވެ.