ދެ އަހަރު ތެރޭގައި 10 ރަށެއްގައި ޑަޔަލިސިސްގެ ޚިދުމަތް ފަށައިފި

ސަރުކާރުން ރައްޔިތުންނާ ގާތުން ޞިއްޙީ ޚިދުމަތް ފޯރުކޮށްދިނުމަށް ކުރައްވާ މަސައްކަތުގެ ދަށުން ވޭތުވެދިޔަ ދެ އަހަރު ދުވަހުގެ ތެރޭގައި ރާއްޖޭގެ 10 ރަށެއްގައި އަލަށް ޑަޔަލިސިސްގެ ޚިދުމަތް ފަށާފައިވާ ކަމަށް ޞިއްޙީ ވަޒީރު ޢަބްދުﷲ ނާޠިމް އިބްރާހީމް ވިދާޅުވެއްޖެއެވެ.

ރާއްޖޭގައި ގައިންގަޔަށް ނާރާ ބޮޑެތި ބަލިތަކުގެ ތެރޭގައި އެންމެ ގިނައިން ބޭސްފަރުވާއަށް ރާއްޖެއިން ބޭރަށް ދިޔުމަށް ދައުލަތުން ޚަރަދުކުރާ އެއް ބައްޔަކީ ކިޑްނީގެ ބަލިތަކެވެ. ކިޑްނީ ބަލީގެ ފަރުވާ ރާއްޖޭގައި ފުޅާކުރުމަށް ސަރުކާރުން އަންނަނީ މަސައްކަތް ކުރައްވަމުންނެވެ. ކިޑްނީ ބަލީގެ ސަބަބުން ހަފްތާއަކު ދެތިން ދުވަހު ޑަޔަލިސިސްގެ ޚިދުމަތް ހޯދަންޖެހޭ މީހުންގެ ޢަދަދު އަންނަނީ އިތުރުވަމުންނެވެ.

މި ޚިދުމަތް މާލެއާއި އަތޮޅުތަކުގެ ރަށްތަކުގައި ފުޅާކުރުމަށް ސަރުކާރުންވަނީ މަޝްރޫޢެއް ފައްޓަވާފައެވެ. މި މަޝްރޫޢުގެ ދަށުން އެންމެފަހުން ޑަޔަލިސިސްގެ ޚިދުމަތް ފަށާފައިވަނީ، ދ. އަތޮޅު ހޮސްޕިޓަލުގައެވެ.

މި ހޮސްޕިޓަލުގައި ޑަޔަލިސިސްގެ ޚިދުމަތް ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޞިއްޙީ ވަޒީރު ޢަބްދުﷲ ނާޠިމް އިބްރާހީމް ވިދާޅުވީ، ދ. އަތޮޅު ހޮސްޕިޓަލަކީ މި ވޭތުވެދިޔަ ދެ އަހަރު ތެރޭގައި މި ޚިދުމަތް ފެށި 10 ވަނަ ހޮސްޕިޓަލު ކަމަށެވެ. އަދި މީގެ ސަބަބުން އެ ރަށްރަށުގެ ރައްޔިތުން ޑަޔަލިސިސް ހެދުމަށްޓަކައި އެހެން ރަށްރަށަށް ކުރަންޖެހޭ ދަތުރުތައް ހުއްޓި، ބޮޑު ލުޔެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.

"މީގެ މާނައަކީ 2024ވަނަ އަހަރާއި 2025ވަނަ އަހަރު ޞިއްޙީ ޚިދުމަތްތައް ފުޅާކުރުމަށް ކުރެވުނު މަސައްކަތުގެ ތެރެއިން ހަމައެކަނި ޑަޔަލިސިސްގެ ޚިދުމަތް 10 ރަށުގެ ރައްޔިތުން، ތިބޭފުޅުން ހިސާބުޖައްސަވާ، 10 ރަށުގެ ރައްޔިތުން އެވްރެޖްކޮށް ކިހާ އާބާދީއެއްތޯ ބައްލަވާ ތިބޭފުޅުންނަށް އަޅުގަނޑު އެ ހިސާބު ދޫކޮށްލައްވާނަން. 10 ރަށުގެ ރައްޔިތުން މިހާރު އެހެން ރަށަކަށް ދަތުރުނުކޮށް ޑަޔަލިސިސްގެ ޚިދުމަތް ލިބޭނެ." ވަޒީރު ވިދާޅުވިއެވެ.

ޑަޔަލިސިސްގެ ޚިދުމަތް އަލަށް ފެށި ރަށްތައް:

* އާމިނާދިޔޯ ޞިއްޙީ މަރުކަޒު
* ގއ. އަތޮޅު ހޮސްޕިޓަލް
* ށ. އަތޮޅު ހޮސްޕިޓަލް
* ނ. ވެލިދޫ ޞިއްޙީ މަރުކަޒު
* މުލި ރީޖަނަލް ހޮސްޕިޓަލް
* ތ. އަތޮޅު ހޮސްޕިޓަލް
* އއ. އަތޮޅު ހޮސްޕިޓަލް
* އދ. އަތޮޅު ހޮސްޕިޓަލް
* ބ. ދަރަވަންދޫ ޞިއްޙީ މަރުކަޒު
* ދ. އަތޮޅު ހޮސްޕިޓަލް

މި ޚިދުމަތުގެ މުހިންމުކަމާ ގުޅޭގޮތުން ވާހަކަ ދައްކަވަމުން ވަޒީރު ވިދާޅުވީ، ޑަޔަލިސިސް ހަދަންޖެހޭ ބަލި މީހުންނަށް ނުވަތަ ބަލި މީހުންގެ އާއިލާއަަކަށް މެނުވީ އެކަމުން އުފުލަންޖެހޭ ތަކުލީފާއި ވޭން އިހުސާސް ނުކުރެވޭނެ ކަމަށެވެ. އެހެންކަމުން މިފަދަ އަސާސީ ޚިދުމަތެއް ރައްޔިތުން ތިބި ރަށަކުން ލިބޭނެ އިންތިޒާމު ހަމަޖެއްސުމަކީ ސަރުކާރުން ވަރަށް ބޮޑަށް އިސްކަމެއް ދެއްވާ ކަމެއް ކަމުގައި ވިދާޅުވިއެވެ.

މި ޚިދުމަތް ޤާއިމު ކުރުމަކީ ގިނަ މަސައްކަތްތަކެއް އެކުލެވޭ ކަމެއްކަން ފާހަގަކުރައްވަމުން ވަޒީރު ވިދާޅުވީ، މީގެ ތެރޭގައި ބޭނުންވާ އުމްރާނީ ތަރައްޤިއާއި، މެޝިނަރީޒް އަދި ސާމާނު ހޯދުމުގެ އިތުރުން، މިކަމަށް ބޭނުންވާ ފަންނީ މީހުން ތަމްރީނު ކުރުން ހިމެނޭ ކަމަށެވެ. އަދި ޚިދުމަތް ފެށި ގިނަ ރަށްތަކަކީ މީގެ ކުރިން އެކަމަށް ތަމްރީނުވެފައިވާ މީހުން ނެތް ރަށްތަކެއް ނަމަވެސް، މިހާރު އެ ރަށްރަށުގައި ތަމްރީނު ލިބިފައިވާ މުވައްޒަފުން ތިބެގެން ޚިދުމަތް ދެމުންދާނެ ކަމަށް ވަޒީރު ވިދާޅުވިއެވެ.

ޑަޔަލިސިސް ހެދުމަކީ، ބަލި މީހާއަށް އިތުރު ތަކުލީފުތަކެއް އުފުލަން ޖެހޭ ކަމެކެވެ. ހަފްތާއަކު 2 ދުވަސް ނުވަތަ 3 ދުވަހުވެސް ޑަޔަލިސިސް ހަދާ މީހުން މަދެއް ނޫނެވެ. އެހެންނަމަވެސް ޒަމާނާއި އެއްގޮތަށް ބަލި މީހުންނަށް އިތުރު ތަކުލީފުތަކާއި ނުލާ ޑަޔަލިސިސްގެ ހެދުމުގެ މަގު މިވަނީ ފަހިވެގެން ގޮސްފައެވެ. އެގޮތުން ރާއްޖޭގައި ޕެރިޓޯނިއަލް ޑަޔަލިސިސް ނުވަތަ ޑިވައިސެއްގެ އެހީގައި އަމިއްލައަށް ހެދޭ ޑަޔަލިސިސްގެ ޚިދުމަތް ވަނީ ދޭން ފަށާފައެވެ.

ރާއްޖޭގައި މިވަގުތު ޑަޔަލިސިސްގެ ޚިދުމަތް ނުފެށި އޮތީ، ވ. އަތޮޅުގެ އިތުރުން ފ.އަތޮޅުގައެވެ. މި އަތޮޅުތަކުގައި މި ޚިދުމަތް ޤާއިމްކުރެއްވިއްޖެނަމަ ރައްޔިތުންނަށް ލުއިތަކެއް ލިބޭނެއެވެ. ޚާއްޞަކޮށް އެކި ސަރަޙައްދުތަކުން އެ ޚިދުމަތް ލިބެން ފެށުމުން ކިޑްނީގެ ބައްޔަށް ފަރުވާ ހޯދުމާއި، ޚާއްޞަކޮށް އެޚިދުމަތް ހޯދުމަށް މާލެ އައުމާއި މާލެއަށް ދިރިއުޅުން ބަދަލުކުރަން ޖެހިފައިވާ މީހުން އަލުން އަމިއްލަ ވަޒަނުގައި ތިބެގެން ފަރުވާ ލިބޭނެ މަގު ފަހިވެގެންދެއެވެ.

އަމިއްލަ ރަށުގައި ޚިދުމަތް ނުފެށުނު ނަމަވެސް އަތޮޅު ވެރިކަން ކުރާ ރަށުގައި ޚިދުމަތް ހަމަޖެހިފައިވާނަމަ، އާރުޓީއެލް ފެރީގައި ކުރު ދަތުރެއް ކޮށްގެން ޚިދުމަތް ހޯދޭނެ މަގުފަހިވާނެއެވެ. ނުވަތަ އަތޮޅުވެރިކަން ކުރާ ރަށުގައި މާލެ އަށްވުރެ ކުޑަ ޚަރަދެއް ކޮށްގެން ޚިދުމަތް ހޯދޭނެ އިންތިޒާމްތައް ހަމަޖެހިގެންދާނެއެވެ. މިކަމުން މި ބަލި ތަޙައްމަލު ކުރަމުންދާ މީހުންނަށާއި، އާއިލާތަކަށް އެތަށް ލުއިފަސޭހައެއް ލިބޭނެއެވެ.