ތަރުބަވީ ޚާއްސަ ޕްރޮގްރާމް "ބިންގާ" ސްކޫލުތަކުގައި ފަށަނީ

ސްކޫލްތަކުގައި ކުރިއަށްގެންދިޔުމަށް ހަމަޖެހިފައިވާ ތަރުބަވީ ޚާއްސަ ޕްރޮގްރާމް "ބިންގާ" ކުރިއަށް ގެންދިޔުމަށްޓަކައި ސްކޫލްތަކުން ކުރަންޖެހޭ މަސައްކަތް ކުރުމަށް ތަޢުލީމީ ވުޒާރާއިން އަންގަވައިފިއެވެ.

ހުރިހާ ސްކޫލްތަކަށް ތަޢުލީމީ ވުޒާރާއިން ފޮނުވާފައިވާ ސަރކިއުލާގައި ވާގޮތުން މި ޕްރޮގްރާމަކީ ވަކި ތީމްތަކަކަށް ބަހާލައިގެން މުޅި އަހަރު ދުވަހަށް ދެމިގެންދާގޮތަށް ކުރިއަށްގެންދިޔުމަށް ހަމަޖެހިފައިވާ ޕްރޮގްރާމެކެވެ. ތަރުބަވީ ޚާއްސަ ޕްރޮގްރާމް "ބިންގާ"އަކީ އަޚްލާޤީ ރީތި ސިފަތަކާއި އާދަތަކަށް ދަރިވަރުން އަހުލުވެރިކުރުމުގެ މަޤްޞަދުގައި ސްކޫލްތަކާއި ބެލެނިވެރިންނާއި މުޅި މުޖުތަމަޢުގެ ބައިވެރިވުމާއެކު ކުރިއަށް ގެންދިޔުމަށް ހަމަޖެހިފައިވާ ޕްރޮގްރާމެކެވެ.

ތަޢުލީމީ ވުޒާރައިން ވިދާޅުވީ މި ޕްރޮގްރާމުގެ ހަރަކާތްތައް ކުރިއަށް ގެންދިޔުމަށް ހަމަޖެހިފައިވަނީ ކޮންމެ މަހަކަށް ޚާއްސަކޮށް ކަނޑައަޅާ ތީމްއެއްގެ މައްޗަށްކަމަށެވެ. މި ޕްރޮގްރާމް ފެށުމަށް ހަމަޖެހިފައިވަނީ "ޝުކުރުވެރިވުން" މި ތީމްއާއެކުގައެވެ. އެއަށްފަހު ކޮންމެ މެހެއް ފެށުމުގެ ކުރިން އެމަހަކަށް ކަނޑައަޅާފައިވާ ތީމް ސްކޫލްތަކަށް ތަޢުލީމީ ވުޒާރާއިން އަންގާގޮތަށް ވަނީ ހަމަޖައްސާފައެވެ.

މި ޕްރޮގްރާމް ވިލަރެސް ކުރުމަށް ޚާއްސަ ކޮމިޓީއެއް ތަޢުލީމީ ވުޒާރާއިން ކަނޑައަޅާފައިވާއިރު އެ ކޮމިޓީން ތީމް ކަނޑައެޅުމާއި ކުރިއަށްގެންދާނެ ހަރަކާތްތައް ސްކޫލްތަކަށް ހިއްސާކޮށް ޕްރޮގްރާމް ކުރިއަށްގެންދިޔުމަށް އެހީތެރިވުމުގެ އިތުރުން ޕްރޮގްރާމް ވަޒަން ކުރުމުގެ މަސައްކަތް ސްކޫލްތަކާ ގުޅިގެން ކުރާނެއެވެ.

މި ޕްރޮގްރާމްގެ ތެރެއިން ދަރިވަރުން ދީނީ ވާޖިބުތަކާއި އަޚްލާޤީ ރިވެތި ސިފަތަކާއި އާދަތަކަށް އަހުލުވެރިކުރުމަށް އަމާޒުކޮށް ކޮންމެ ސްކޫލްއަކުންވެސް ޚާއްސަ ހަރަކާތްތަކެއް ކުރިއަށްގެންދާނެކަމަށް ތަޢުލީމީ ވުޒާރާއިން ވިދާޅުވިއެވެ. އޭގެ ތެރޭގައި އިޙްތިރާމް ކުރުމާއި ޒިންމާނެގުމާއި ސާފުތާހިރުކަމާއި އަޅާލުމާއި އޯގާތެރިކަން އިސްކުރުންފަދަ ރިވެތި ސިފަތަކާއި އާދަތައް ދަރިވަރުންގެ ކިބައިގައި އަށަގަންނެވުން ހިމެނެއެވެ.

މި ޕްރޮގްރާމްގެ ތެރެއިން ފަރުޟު ފަސް ނަމާދުކުރުމަށް ބާރު އެޅުމުގެ ގޮތުން ކޮންމެ މަހަކަށް ކަނޑައަޅާ ތީމްއާއި ނަމާދުގެ މާތް އަޅުކަމާގުޅިގެންދާ ގޮތް ދަރިވަރުންނަށް އަންގާދޭންޖެހެއެވެ. ބިންގާ ޕްރޮގްރާމް ސްކޫލްތަކުގައި ކުރިއަށްގެންދިޔުމުގައި އެންމެ އިސްދައުރެއް އަދާކުރާނީ ޕްރިންސިޕަލް ނުވަތަށް އެވަގުތެއްގައި އެ ސްކޫލެއް ހިންގިމާ ހާވާލުވެ ހުންނަ ފަރާތެވެ.

މި ޕްރޮގްރާމްގެ ދަށުން ސްކޫލްތަކުން ކުރިއަށްގެންދާ ހަރަކާތްތަކުގެ އިތުރަށް ކޮންމެ މަހަކަށް ކަނޑައަޅާ ތީމް ތަޢާރަފްކުރުމަށް ކޮންމެ މަހަކު ޚާއްސަ އެސެމްބްލީއެއް ބޭއްވުމާއި ތީމްއާ ގުޅޭގޮތުން ވާހަކަދެއްކުމުގެ ފުރުޞަތު ދަރިވަރުންނަށް ފަހިކޮށްދޭންޖެހެއެވެ. އަދި ރަށު ފެންވަރުގައި ޕެނަލް ޑިސްކަޝަނެއް ފަދަ ބޮޑު ހަރަކާތެއް ކުރިއަށްގެންދިޔުމާއި އެކި މާއްދާތަކުގެ ތެރެއިން ތީމްއާ ގުޅޭ މަޢުލޫމާތުތާއި ހުނަރުތައް ދަސްކޮށްދޭންވެސް ޖެހެއެވެ.

މި ކަންކަމުގެ އިތުރުންވެސް ސްކޫލުން ރާވާ އިންތިޒާމްކުރާ ކޮންމެ ހަރަކާތަކީ ދަރިވަރުންގެ ކިބައިގައި ރިވެތި އަދަބާއި އާދަަތައް އަށަގެންނެވުމަށް ބާރުލިބިދޭ ގޮތަށް ކުރިއަށްގެންދާ ހަރަކާތަކަށްވެސް ހަދަންޖެހެއެވެ. އަދި މުޖުތަމަޢުގައި އުޅޭއިރު ކުރެވޭނެ ކަންތައްތައް ބެލެނިވެރިންނާއި ދަރިވަރުންނަށް އަންގައިދިނުމާއި ކޮންމެ މަހަކަށް ކަނޑައަޅާ ތީމްއާއި ގުޅޭގޮތުން ސްކޫލުން ހިންގާ ހަރަކާތްތައް އެ ސްކޫލެއްގެ މީސްމީޑިއާ މަންސަތަކުގައި ހިއްސާ ކުރުމަށްވެސް ތަޢުލީމީ ވުޒާރާގެ ސަކިއުލާގައިވެއެވެ.