އާޖެންޓީނާ އާއި ސްޕޭން ބައްދަލު ކުރަން ހަމަޖައްސާފައިވާ ފައިނަލިސިމާ ފައިނަލް މެޗު ގަތަރުގައި ނުކުޅެވިދާނެ ކަމުގެ ބިރު ހީވެއްޖެ އެވެ.
ދުނިޔޭގެ ޗެމްޕިއަން އާޖެންޓީނާ އާއި ޔޫރަޕުގެ ޗެމްޕިއަން ސްޕޭން ބައްދަލުކުރާ މި މެޗު ގަތަރުގެ ލުސައިލް ސްޓޭޑިއަމުގައި ކުޅެން ހަމަޖައްސާފައި އޮތީ މި މަހުގެ 27 ވަނަ ދުވަހު އެވެ. ނަމަވެސް މި މެޗު ގަތަރުގައި ނުކުޅޭވޭނެ ކަމުގެ ބިރު ހީވީ އެމެރިކާ އާއި އިޒްރޭލުން އިރާނަށް ހަމަލާ ދިނުމުން ރައްދުގައި އިރާނުން މެދުއިރުމަތީގައިވާ އެމެރިކާގެ ތަންތަނަށް ހަމަލާދޭން ފެށުމުންނެވެ. ގަތަރަކީ އެމެރިކާއާ ގާތް އެކުވެރި ގައުމެކެވެ. އެ ގައުމުގެ މައި އެއާޕޯޓަށް މިސައިލުން ދިން ހަމަލާތަކާއެކު ގަތަރުން މިހާރު ވަނީ ކުޅިވަރުގެ ހުރިހާ ހަރަކާތްތަކެއް ވެސް ހުއްޓާލައިފަ އެވެ.
މި މެޗާ ބެހޭ ގޮތުން ތަޖުރިބާކާރުން ބުނަނީ އާޖެންޓީނާގެ ކެޕްޓަން ލަޔޮނަލް މެސީ އާއި ބާސެލޯނާ އަށް ކުޅޭ ސްޕޭނުގެ ލަމީން ޔަމާލް ފުރަތަމަ ފަހަރަށް ބައްދަލުކުރާނެ މި މެޗު މިހާރު ގަތަރުގައި ކުޅެވޭނެ ކަމުގެ އެއްވެސް ޔަގީން ކަމެއް ނެތް ކަމަށެވެ. އަދި މިހާރު އޮތް ހަމައެކަނި ގޮތަކީ އެހެން ގައުމެއްގައި ހާއްސަކޮށް ޔޫރަޕުގެ ގައުމަކަށް މެޗު ބަދަލު ކުރުމެވެ. އެކަމަކު މާޗު 27އާ ދެމެދު އޮތް ވަގުތު ކުޑަތަންވެފައި އޮތުމުން މި މެޗުގެ އިންތިޒާމްތަކަށް ޖާގަ ލިބިދާނެ އެކަށީގެންވާ ދަނޑެއް ލިބިދާނެ ކަމާމެދު ވަނީ ޝައްކު އުފެދިފަ އެވެ.
ފައިނަލިސިމާ ފައިނަލް އެންމެ ފަހުން ކުޅުނީ 2023ގަ އެވެ. އާޖެންޓީނާ އާއި އޭރުގެ ޔޫރަޕުގެ ޗެމްޕިއަން އިޓަލީ ވާދަކުރި މެޗު ފަސޭހަ ކަމާއެކު ކާމިޔާބު ކުރީ އާޖެންޓީނާ އެވެ.