ހަނގުރާމައިގެ މައިދާނަކަށް ގައުމު ބަދަލުވެފައި ވަނިކޮށް، އޭޝިޔާ ކަޕްގެ އަންހެން ފުޓްބޯޅަ މުބާރާތުގައި އިރާން ވާދަކޮށްފި އެވެ.
މާޗު 1 އިން 21 އަށް އޮސްޓްރޭލިޔާގައި ކުޅޭ މުބާރާތުގައި ދެކުނު ކޮރެޔާއާ ދެކޮޅަށް ކުޅުނު މި މެޗުގައި އިރާނުގެ ހުރިހާ ކުޅުންތެރިންނާއި އޮފިޝަލުން ތިބީ ގައުމީ ސަލާމް ޖެހި ވަގުތު ހިމޭނުންނެވެ. އޭއެފްޕީ އިން ބުނެފައިވަނީ ބައެއް ކުޅުންތެރިން ދިޔައީ ރޮމުން ކަމަށެވެ.
މެޗު ކުޅެމުންދިޔައިރު ވެސް އެމެރިކާ އާއި އިޒްރޭލުން ދިޔައީ އިރާނަށް ހަމަލާތައް ދެމުންނެވެ. މިކަމާ މެދު އިރާނުގެ ކުޅުންތެރިން ބުނީ މިވަގުތު ހާލަތާމެދު އެ މީހުންނަށް ކުރެވެން އޮތް ހަމައެކަނި ކަމަކީ އެކުވެރިކަމާއެކުގައި ތިބުން ކަމަށެވެ.
މި މެޗުގައި ޓީމަށް ތަރުހީބު ދިނުމަށް މަދު އަދަދެއްގެ ސަޕޯޓަރުން ވެސް ދަނޑަށް ޖަމާވި އެވެ. މެޗުގެ ކުރިން ޓީމުގެ ކޯޗު މަރްޒިޔާ ޖަފަރީ ކުޅުންތެރިން ގާތުގައި ބުނީ އިރާނުގެ ރޫހީ ލީޑަރު އާޔަތުﷲ އަލީ ހާމަނާއީ އަވަހާރަ ކޮށްލާފައިވުމުން އެކަމާ އެންމެން ވެސް ދެރަވާނެ ކަމަށާއި ނަމަވެސް ޓީމަށް ކުރިމަތިވެފައިވާ ޒިންމާ އަދާ ކުރުމަށް ވެސް ވިސްނުން ބެހެއްޓުމަށެވެ.
މި މެޗުން އިރާން ބަލިވީ 3-0އިންނެވެ.
އިޒްރޭލާއި އެމެރިކާ ގުޅިގެން ހަމަލާތައް ދޭން ފެށުމާއެކު އިރާނުން ވަނީ ހުރިހާ ކުޅިވަރު ހަރަކާތްތަކެއް ހުއްޓާލައިފަ އެވެ. އަދި މި އަހަރުގެ ޖޫން މަހު އެމެރިކާގައި ފަށާ ވޯލްޑް ކަޕް ފުޓްބޯޅަ މުބާރާތުގައި އިރާނުގެ ފިރިހެން ޓީމު ބައިވެރިވުމާމެދު ވަނީ ސުވާލު އުފެދިފަ އެވެ.