ކުރިއަށް އޮތް ބާސެލޯނާގެ އިންތިހާބަށް އެންމެ ގިނަ ސޮއި ހުށަހެޅި ކެނޑިޑޭޓަކީ މިހާރުގެ ރައީސް ޖޯން ލަޕޯޓާ ކަމުގައި ވެއްޖެ އެވެ.
އަންނަ ހަފުތާގެ އާދީއްތަ ދުވަހު އޮންނަ އިންތިހާބަށް ކެނޑިޑޭޓުން ތާއީދު ފޯމުތައް ހުށަޅަން ޖެހޭ ފަހު ދުވަހަކީ އިއްޔެ އެވެ. އެންމެ ގިނަ ތާއީދު ފޯމު ހުށަހެޅީ އިންތިހާގުގެ ގަވާއިދުގައިވާ ގޮތުގެ މަތީން ވަގުތީ ގޮތުން މަގާމުން ދުރަށް ވަޑައިގަތް ލަޕޯޓާ އެވެ. އޭނާ ވަނީ 8169 ތާއީދު ފޯމު ހުށަހަޅައިފަ އެވެ.
ދެ ވަނަ އަށް އެންމެ ގިނަ ފޯމު ހުށަހެޅީ މީގެ ފަސް އަހަރު ކުރިން ބޭއްވި އެންމެ ފަހުގެ އިންތިހާބުގައި ވެސް ލަޕޯޓާއާ ވާދަކުރެއްވި ވިކްޓަރ ފޮންޓެވެ. މަޝްހޫރު ވިޔަފާރި ވެރިޔާ އަށް 5144 ތާއީދު ލިބިވަޑައިގަތެވެ. ތިން ވަނަ އަށް އެންމެ ގިނަ ފޯމު ހުށަހަޅާފައިވަނީ މާކް ސިރިއާ އެވެ. އޭނާ ހުށަހަޅާފައިވަނީ 2844 ފޯމެވެ. އިންތިހާބުގައި ވާދަ ކުރައްވަން ޒަވިއާ ވިލަޖޯނާ މަސައްކަތް ކުރި ނަމަވެސް އޭނާ އަށް ހޯދުނީ 1593 ތާއީދު ފޯމެވެ. މިހެންވެ އޭނާ ވަނީ އިންތިހާބުގައި ވާދަ ކުރަން ޝަރުތު ހަމަނުވާ މީހެއް ކަމަށެވެ. ސަބަބަކީ ކެނޑިޑޭޓަކަށް ވުމަށް މަދުވެގެން 2337 ތާއީދު ފޯމު ހުށަހަޅަން ޖެހޭތީ އެވެ.
މި ތަފާސް ހިސާބުތަކަށް ބަލާއިރު މި ފަހަރުގެ އިންތިހާބު ވެސް ކާމިޔާބު ކުރުން ގާތީ ލަޕޯޓާ ކަމަށް ވަނީ ބެލެވެން ފަށައިފަ އެވެ. ނަމަވެސް ދެ ވަނަ އަށް އެންމެ ތާއީދު ބޮޑު ވިކްޓަ ފޮންޓް ވަނީ ލަޕޯޓާ ބަލި ކުރުމަށް އިދިކޮޅު ހުރިހާ ކެނޑިޑޭޓުން އޭނާ އަށް ތާއީދު ކުރުމަށް ގޮވާލައިފަ އެވެ. ފޮންޓްގެ ކެމްޕޭން ޝިއާރަކީ ވެސް ގުޅިގެން ކުރި އަށް ދިއުމެވެ. ހުރިހާ ކެނޑިޑޭޓުން ލަޕޯޓާގެ ފޮންޓްގެ ފަހަތަށް އަރައިފިނަމަ ތާއީދު ފޯމުގެ ގޮތުން ފޮންޓަށް ކުރި ލިބޭނެ އެވެ.
ލަޕޯޓާ އާއި ފޮންޓަށް މި ފަހަރު ހޯދުނު ތާއީދަށް ބަލާއިރު ކުޑަކުޑަ ތަފާތަކުން ފޮންޓަށް ކުރި ލިބެ އެވެ. 2021 ވަނަ އަހަރު ލަޕޯޓާ ހުށަހެޅި ތާއިދު ފޯމުގެ އަދަދަކީ 10257 އެވެ. މިއީ މި ފަހަރަށް ވުރެ 2086 ފޯމު އިތުރު އަދަދެކެވެ، އެކަމަކު ފޮންޓް މި ފަހަރު ހޯދި ތާއީދު ފޯމުގެ އަދަދު ކުރީ ފަހަރަށްވުރެ 713 ފޯމު ގިނަ އެވެ.
ނަމަވެސް ލަޕޯޓާ ވިދާޅުވީ އިދިކޮޅު އެންމެން ގުޅުނަސް އޭނާގެ އަޒުމަކަށް ބަދަލެއް ނާންނާނެ ކަމަށާއި އިންތިހާބު ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.