އެމެރިކާގައި މި އަހަރުގެ ޖޫން މަހު ފަށާ ވޯލްޑް ކަޕް ފުޓްބޯޅަ މުބާރާތުގައި އިރާން ނުކުޅަނަސް ވަރިހަމަ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އޭނާ މިހެން ވިދާޅުވީ އެމެރިކާ އާއި އިޒްރޭލް އިސްވެ އޮވެ އީރާނަށް ހަމަލާދީ އެ ގައުމުގެ ރިހީ ލީޑަރު އަވަރާހަލަ ކޮށްލައި ހަނގުރާމައެއް ފެށިފައިވަނިކޮށެވެ.
"އަހަރެން އެއްގޮތަކަށް ވެސް އަޅާ ނުލަ ނުލަން އެކަމާ. އިރާނަކީ ވަރަށް ބޮޑަށް ބަލިކަށިވެފައިވާ ގައުމެއް،" ޓްރަމްޕް ވިދާޅުވި އެވެ.
ނަމަވެސް މިކަމާމެދު ދުނިޔޭގެ ފުޓްބޯޅަ ޖަމިއްޔާ ފީފާއިން އަދި ވަކި އެއްޗެއް ނުބުނެ އެވެ.
ނަމަވެސް ޖޫން މަހު އެމެރިކާ އާއި މެކްސިކޯ އަދި ކެނެޑާގައި ކުޅޭ ވޯލްޑް ކަޕް ފުޓްބޯޅަ މުބާރާތުގައި އިރާނުން ކުޅޭނެ ކަމުގެ އެއްވެސް ޔަގީންކަމެއް މިވަގުތު ދެވެން ނެތް ކަމަށް އިރާނުން ވެސް ވަނީ ބުނެފަ އެވެ.
"މި ހަމަލާތަކާ ގުޅިގެން އަހަރުމެންނަށް އުއްމީދީ ނަރަޒަކުން ވޯލްޑް ކަޕާމެދު ނުވިސްނޭ،" އިރާނުގެ ފުޓްބޯޅަ ފެޑަރޭޝަނުގެ ރައީސް މެހްދީ ތާޖް ވިދާޅުވި އެވެ.
ވޯލްޑް ކަޕުގައި އިރާން ހިމެނެނީ ގްރޫޕް ޖީގައި ނިއުޒީލޭންޑާއި ބެލްޖިއަމް އަދި މިސުރާއެކުގަ އެވެ. އަދި އިރާނުން ވޯލްޑް ކަޕުގެ ގްރޫޕް ސްޓޭޖުގައި ކުޅެން ޖެހޭ ތިން މެޗު ވެސް އޮތީ އެމެރިކާގަ އެވެ. މިހެންވެ އެމެރިކާ އަށް ދަތުރު ކުރުމަކީ އިރާނުން މިވަގުތު ކުރާނެ ކަމެއް ކަމަށް ނުފެންނަ ކަމަށެވެ.
އިރާނާއި އެމެރިކާގެ ހަނގުރާމައިގެ ސަބަބުން ޔަގީނުން ވެސް އިރާނުގެ ސަޕޯޓަރުން އެމެރިކާ އަށް ދަތުރު ކުރާނެ ކަމަށް ނުބެލެވެ އެވެ.
އިރާނުގެ މައްސަލާގައި ފީފާގެ ރައީސް ޖިއާނީ އިންފަންޓީނޯ މީގެ ހައެއްގެ ދުވަސް ކުރިން ވިދާޅުވީ އޭނާ އުއްމީދު ކުރަނީ ކޮލިފައިވެފައިވާ ހުރިހާ ގައުމަކުން ވެސް ވޯލްޑް ކަޕުގައި ކުޅޭނެ ކަމަށް ކަމަށެވެ. އަދި އިރާނާއި އެމެރިކާގެ ހަނގުރާމަ ފެށިފައިވީ ނަމަވެސް ފުޓްބޯޅައިގެ ކަންކަމުގައި އެންމެ ފަހު ބަސް ބުނާނީ އިރާނުގެ ފުޓްބޯޅަ ފެޑަރޭޝަނުން ކަމަށެވެ.
އިންފަންޓީނޯ މިހެން ވިދާޅުވިއިރު އޭނާ އަކީ އެމެރިކާގައި ބޭއްވި ވޯލްޑް ކަޕް ގުރު ނެގުމުގެ ރަސްމިއްޔާތަށް ވަޑައިގަތުމަށް އިރާނުގެ ފުޓްބޯޅަ ފެޑަރޭޝަނުގެ ރައީސަށް ވިސާ ހަމަޖައްސައި ނުދެވުނު ބޭފުޅެކެވެ. އެ ކަމަށް އިރާނުން އެދުމުން ވެސް އެމެރިކާގެ ރައީސް ޑޮނަލްޑް ޓްރަމްޕާ ގާތް ގުޅުމެއް އޮންނަ އިންފަންޓީނޯ ހުންނެވީ ވަކި އެއްޗެއް ވިދާޅުނުވެ ހަނު އެވެ.