ރަށުރަހަ: މަނަދޫ މެޓާގަނޑު ތަޖުރިބާކޮށްލަން ބޭނުންތަ؟
-
މިފަހަރުގެ ޕްރޮގްރާމް ޚާއްސަކޮށްފައިވަނީ މަނަދޫގެ ކެއުންތަކަށް
-
ޕްރޮގްރާމް ދައްކާނީ މިރޭ 10:00 ގައި
-
ދިވެހިންގެ އެންމެ އެވޭލާ ކެއުންތަކާއި ބުއިންތައް ގެނެސްދޭނެ
މިއަހަރުގެ ރަމަޟާންމަހަށް ޚާއްސަކޮށްގެން ޕީއެސްއެމް ނިއުސްއިން ގެނެސްދޭ އެންމެ ތަފާތު އެއް ޕްރޮގްރާމަކީ "ރަށުރަހަ" އެވެ. ދިވެހި ކެއުންތަކާއި ރަހަތަކަށް ޚާއްސަކޮށްގެން ގެނެސްދޭ މި ޕްރޮގްރާމުގެ ދެވަނަ އެޕިސޯޑު ޚާއްސަކޮށްފައިވަނީ ނ. އަތޮޅުގެ ވެރިކަންކުރާ ރަށް، މަނަދޫއަށެވެ.
"ރަށުރަހަ" މި ޕްރޮގްރާމުގެ މައިގަނޑު މަޤުޞަދަކީ ދިވެހިންގެ އެންމެ އެވޭލާ ކެއުންތަކާއި ރަހަތައް އަދި އޭރުގެ ކެއްކުމުގެ އާދަކާދަތަކުގެ ތެރެއިން ފާހަގަކޮށްލެވޭ ކަންކަން ބެލުންތެރިންނާ ހަމައަށް ޝައުގުވެރި ގޮތަކަށް ގެނެސްދިނުމެވެ.
މި ޕްރޮގްރާމުގައި ރާއްޖޭގެ ބައެއް ރަށްރަށަށް ޚާއްސަ ކެއުންތަކާއި ބުއިންތައް ތައްޔާރުކުރާނެ ގޮތްތަކާއި އެ ކެއުންތަކާއި ބުއިންތަކުގެ ޚާއްސަކަން އެ ރަށްރަށުގެ ރައްޔިތުން މެދުވެރިކޮށް ހިއްސާކުރެވޭނެއެވެ. އަދި ދިވެހި ކެއުންތަކުގެ ގޮތުގައި މިހާރު ތައްޔާރުކުރާ އެކި ކަހަލަ ކެއުންތަކާއި ބުއިންތައް ތައްޔާރުކުރާ ގޮތްތައްވެސް ގެނެސްދެވޭނެއެވެ.
މި ޕްރޮގްރާމުގެ ދެވަނަ އެޕިސޯޑު ޚާއްސަކޮށްފައިވަނީ ނ. މަނަދޫއަށެވެ.
މިފަހަރުގެ އެޕިސޯޑުގައި މަނަދޫގައި ތައްޔާރުކުރާ ބައެއް ޚާއްސަ ކެއުންތައް ދައްކުވައިދޭނެއެވެ. ވަކިން ޚާއްސަކޮށް އެރަށަށް މަޝްހޫރު ފޮނިއެއްޗެއްކަމަށްވާ "މެޓާގަނޑު" ތައްޔަރުކުރާނެގޮތް ފެނިގެންދާނެއެވެ.
މިއީ އެ ރަށަށް އަރާ މެހެމާނުން އެންމެ ގަޔާވާ އެއް އުފެއްދުމުގެ ގޮތުގައި މަނަދޫގެ ރައްޔިތުންވެސް ފާހަގަކުރެވެއެވެ. ހަދިޔާގެ ގޮތުގައިވެސް ރަށުގައި އެންމެ ޑިމާންޑު ބޮޑު އެއް އުފެއްދުމަކީ މެޓާގަނޑެވެ. މި ޕްރޮގްރާމް ދައްކާނީ މިރޭ 22:00 ގައެވެ.
"ރަށުރަހަ" ޕްރޮގްރާމުގައި ދިވެހިންގެ އެވޭލާ ކެއުންތަކާއި ރަހަތަކުގެ އިތުރުން، އެތަކެތި ތައްޔާރުކުރުމުގައި ދިވެހިން ނަގާ ފޯރިއާއި، ޖޯޝު ފެނިގެންދާނެއެވެ. އަދި ރަށްފުށުގެ ހިތްގައިމުކަމާއި ޗާލުކަންވެސް ދައްކުވައިދޭނެއެވެ.
އާންމު މަސްމަހާ ޚިލާފަށް ރަމަޟާންމަހަކީ ދިވެހިންގެ ތެރޭގައި ކެއްކުމުގެ ފޯރިވެސް ގަދަވެގެންދާ ދުވަސްވަރެއްކަމުން، ތަފާތު އައު ބުއިމެއް ނުވަތަ ކެއުމެއް ތަޖުރިބާކޮށްލަން ޝަޢުގުވެރިވާނަމަ، މިިއީ ބަލާލަން ހިތްގައިމު ޕްރޮގްރާމަކަށް ވެގެންދާނެއެވެ. ޚާއްސަކޮށް ދިވެހި ރަހަތަކަށް ލޯބިކުރާ ފަރާތްތަކަށް "ރަށުރަހަ" މިއީ ނުބަލާ ދޫކޮށްލާވަރުގެ ޕްރޮގްރާމެއް ނޫނެވެ.