މިއަހަރުގެ ތެރޭގައި މާލޭގައި ހިނގި އަލިފާނުގެ ބޮޑު ތިން ޙާދިސާގާއި ގެއްލުންވި ފަރާތްތަކަށް އެކަމުން އަރައިގަތުމަށް ދައުލަތުން 3 މިލިޔަނަށް ވުރެ ގިނަ ރުފިޔާ ޚަރަދު ކުރައްވާފައިވާ ކަމަށް ނެޝަނަލް ޑިޒާސްޓަރ މެނޭޖްމެންޓް ސެންޓަރުން ވިދާޅުވެއްޖެއެވެ.
އެ ސެންޓަރުން ވިދާޅުވީ މި ފައިސާ ހޭދަކުރައްވާފައިވަނީ ވަގުތީ ހިޔާ ފޯރުކޮށްދިނުމާއި، ޒަރޫރީ އިންސާނީ އެހީއަށާއި، ޙާދިސާގެ އަސަރުކުރި ފަރާތްތަކަށް ލިބުނު ގެއްލުންތަކުގެ ބަދަލުގެ ގޮތުގައި ކަމަށެވެ. ޤުދުރަތީ ކާރިސާތަކުގެ އިތުރުން އިންސާނުންގެ ފުށުން ކުރިމަތިވާ ޙާދިސާތަކާއި، ފަރުދުންގެ އިހުމާލުގެ ސަބަބުން ނުރައްކާތެރި ގިނަ ޙާދިސާތަކެއް ހިނގާ، ބޮޑެތި ގެއްލުންތައް ލިބިފައިވެއެވެ. މީގެ ތެރެއިން ވެސް ފަހަކަށް އައިސް މާލޭގައި ހިނގި އަލިފާނުގެ ޙާދިސާތައް ފާހަގަކޮށްލެވެއެވެ.
މި އަހަރުގެ މާޗްމަހުގެ 22 ވަނަ ދުވަހު މެންދުރު ފަހުގެ ވަގުތެއްގައި، ސިނަމާލެ އެކެއްގެ ފަސްވަނަ ފަންގިފިލާގައި އަލިފާންރޯވެ މާއްދީ ބޮޑެތި ގެއްލުންތައް ލިބިފައިވެއެވެ. މި ހާދިސާގައި ނެޝަނަލް ޑިޒާސްޓަރ މެނޭޖްމެންޓް ސެންޓަރުގެ ބެލުމުގެ ދަށުން 3 ގޭބިސީއެއްގެ 18 މީހަކަށް އެހީތެރިކަން ފޯރުކޮށްދެއްވާފައިވެއެވެ. އެ ޙާދިސާގައި ޙާލުގައި ޖެހުނު މީހުންނަށް ވަގުތީ ބޯހިޔާވަހިކަން ފޯރުކޮށްދިނުމަށް 87،000 އަށް ވުރެ ގިނަ ރުފިޔާ ޚަރަދުވެފައިވާއިރު، ހަމައެކަނި އެހީގެ ގޮތުގައި، ހަލައްކަ ސައްބީސް ހާހަށް ވުރެ ގިނަ ރުފިޔާ ހޭދަކުރައްވާފައިވާ ކަމަށް ޑިޒާސްޓަރ މެނޭޖްމެންޓުން ވިދާޅުވެއެވެ.
މި އަހަރުގެ އެޕްރީލް މަހުގެ 18 ވަނަ ދުވަހު ކޯސްޓްލައިން ހާޑްވެއަރގައި ހިނގި ނުރައްކާތެރި އަލިފާނުގެ ޙާދިސާއަކީވެސް އޭގެ ގެއްލުން އެތައް ބަޔަކަށް ލިބިގެންދިޔަ ހާދިސާއެކެވެ. ކުޑަ ވަގުތު ކޮޅެއްގެ ތެރޭގައި މުޅިތަން އަނދާ ހުލިވިއިރު، އެ ފިހާރައާއި އިންވެގެން ހުރި ގިނަ ގެތަކަކަށްވެސް ބޮޑެތި ގެއްލުންތަކެއް ލިބިފައިވެއެވެ. ޑިޒާސްޓަރ މެނޭޖްމެންޓް ސެންޓަރުން މަޢުލޫމާތު ދެއްވާ ގޮތުގައި މި ޙާދިސާގައި ގެއްލުން ލިބުނު ފަރާތްތަކަށް އެހީގެ ގޮތުގައި ޖުމްލަ 2.6 މިލިޔަން އެ ސެންޓަރުން ޚަރަދުކުރައްވާފައިވެއެވެ.
މީގެ އިތުރުން މިއަހަރުގެ ސެޕްޓެމްބަރު މަހު 7 ވަނަ ދުވަހު ގ.އެސްބަރި ގޭގައި ހިނގި އަލިފާނުގެ ޙާދިސާގައިވެސް ބޮޑެތި ގެއްލުންތައް ލިބި، 21 އާއިލާއެއް ޑިޒާސްޓަރ މެނޭޖްމެންޓް ސެންޓަރުގެ ބެލުމުގެ ދަށަށް ގެނެސްފައިވާއިރު، މީގެ ތެރެއިން ބައެއް އާއިލާތައް އަދިވެސް ތިބީ ޑިޒާސްޓަރ މެނޭޖްމެންޓް ސެންޓަރުގެ ބެލުމުގެ ދަށުގައެވެ. އަލިފާނުގެ މި ޙާދިސާގައި ޙާލުގައި ޖެހުނު މީހުންގެ ވަގުތީ ބޯހިޔާވަހިކަމަށްވެސް އެކަނިވެސް މިހާތަނަށް 193،000 ރުފިޔާ ޚަރަދު ކުރެވިފައިވާ ކަމަށް ނެޝަނަލް ޑިޒާސްޓަރަ މެނޭޖްމެންޓް ސެންޓަރުން ވިދާޅުވެއެވެ.
މި ތިން ޙާދިސާއަށް ބަލާއިރު، ޙާދިސާތަކުގައި ޙާލުގައި ޖެހިގެން ވަގުތީ ހިޔާ ފޯރުކޮށްދިނުމާއި، ޒަރޫރީ އިންސާނީ އެހީއާއި، ޙާދިސާގެ އަސަރުކުރި ފަރާތްތަކަށާއި، ލިބުނު ގެއްލުންތަކުގެ ބަދަލުގެ ގޮތުގައި ހޭދަކުރި ފައިސާގެ ޢަދަދު 3 މިލިޔަނަށް ވުރެ މައްޗަށް އަރައެވެ. ޑިޒާސްޓަރ މެނޭޖްމެންޓުން ވިދާޅުވީ އަލިފާނުގެ ޙާދިސާތަކަކީ ކުޑަ ވަގުތު ކޮޅެއްގެ ތެރޭގައި އަގު ނުކުރެވޭފަދަ ބޮޑެތި ގެއްލުންތަކެއް ލިބޭ ހާދިސާތަކަކަށްވުމުން އާއްމު ފަރުދުން ގޭބިސީތަކުގައި މިފަދަ ޙާދިސާއަކުން ރައްކާތެރިވުމަށް ފިޔަވަޅު އެޅުން ވަރަށް މުހިންމު ކަމަށެވެ.
އެ ސެންޓަރަށް ރިޕޯޓް ކުރެވޭ ގިނަ ޙާދިސާތަކަކީ ކޮންމެވެސް ހިސާބަކުން ފަރުދެއްގެ އިހުމާލުން ކުރިމަތިވާ ޙާދިސާތަކުގެ ގޮތުގައި ފާހަގަ ކުރެވިފައިވާ ކަމަށްވެސް އެ ސެންޓަރުން ވިދާޅުވެއެވެ. އެހެންކަމުން މި ފަދަ ޙާދިސާތަކަށް ދުރާލާ ތައްޔާރުވެ ރައްކާތެރި ފިޔަވަޅުތައް އެޅުމަށް އެ ސެންޓަރުން އިލްތިމާސް ކުރައްވައެވެ. ނެޝަނަލް ޑިޒާސްޓަރ މެނޭޖްމެންޓް ސެންޓަރުން ވިދާޅުވީ، މާލޭގައި އަލިފާނުގެ ޙާދިސާއެއް ހިނގައިފިނަމަ، އަވަހަށް ނިއްވާލެވޭނޭ އިންތިޒާމްތައް ކަމާގުޅޭ ދާއިރާތަކާއި ގުޅިގެން އެ ސެންޓަރުން ހަމަޖައްސަވަމުން ގެންދަވާ ކަމަށެވެ.