ވިމެންސް އަންޑަރ 20 ވޯލްޑް ކަޕްގެ ޗެމްޕިއަންކަން ސްޕެއިނަށް

ޕޯލަންޑްގައި ކުރިއަށްދިޔަ ވިމެންސް އަންޑަރ 20 ފީފާ ވޯލްޑް ކަޕްގެ ޗެމްޕިއަންކަން ސްޕެއިންގެ ޒުވާން އަންހެން ޓީމު ކާމިޔާބު ކޮށްފިއެވެ.

މިމުބާރާތުގެ ޗެމްޕިއަންކަން ސްޕެއިނުން ހޯދާފައިވަނީ ފައިނަލްގައި މިމުބާރާތުގެ އެންމެ ފަހުގެ ޗެމްޕިއަންއަދި ތަށި ދިފާއު ކުރުމަށް މަސައްކަތް ކުރަމުންދިޔަ އުތުރު ކޮރެއާގެ ޓީމާއި ބައްދަލުކޮށް މޮޅުވެގެންނެވެ. އެއީ ފުރިހަމަ ވަގުތާއި އިތުރު ވަގުތު ކުޅެ ލަނޑެއް ނުޖެހި އެއްވަރު ވުމުން ޕެނަލްޓީ ޖަހައިގެން 4 ލަނޑު 3 ލަނޑުން ކުރި ހޯދައިގެންނެވެ. ވަރަށް ވާދަވެރި ކުޅުމެއް ދެޓީމުގެ ފަރާތުން ފެނިގެންދިޔަ މިމެޗުގައި ފުރިހަމަ ވަގުތުގައި ދެޓީމުގެ މެދުގައި މާބޮޑު ފަރަގެއް ފެނިގެން ގޮސްފައެއް ނުވެއެވެ. އަދި ފުރިހަމަ ވަގުތު ނިންމާލީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެއްވަރުވެފައި އޮވެގެންނެވެ. ހަމައެއާއެކު އިތުރު ވަގުތުގެ ކުޅުން ނިމުނުއިރުވެސް މެޗުގެ ނަތީޖާއަށް ބަދަލެއް އައިސްފައެއް ނުވެއެވެ.

މިމެޗުގެ ޕެނަލްޓީ ޝޫޓް އައުޓްގައި ސްޕެއިނުން ޖެހި 4 ޕެނަލްޓީ އެޓީމުން ކާމިޔާބު ކުރިއިރު އުތުރު ކޮރެއާއިން ޖެހި 5 ޕެނަލްޓީގެ ތެރެއިން 2 ޕެނަލްޓީ ވަނީ ސްޕެއިންގެ ކީޕަރ ލައިއާ ލޯޕޭޒް ދިފާއުކޮށްފައެވެ. މިއީ ވިމެންސް އަންޑަރ 20 ވޯލްޑް ކަޕް ސްޕެއިން އިން ކާމިޔާބު ކުރި ދެވަނަ ފަހަރެވެ. މީގެކުރިން އެޓީމުންވަނީ 2022 ވަނަ އަހަރު ބޭއްވި މުބާރާތް ކާމިޔާބު ކޮށްފައެވެ. އަދި މިކާމިޔާބީ އާއެކު މިއީ މިއަހަރު ސްޕެއިން އިން ކާމިޔާބު ކުރި ބައިނަލްއަޤްވާމީ ދެވަނަ މުބާރާތެވެ. މިއަހަރުގެ ޖުލައިމަހު ސްޕެއިންގެ ސީނިއަރ ފިރިހެން ޓީމްވަނީ ފީފާ ވޯލްޑް ކަޕްގެ ތަށި ކާމިޔާބު ކޮށްފައެވެ. އަދި އެއީ އެމުބާރާތުގެ ތަށިވެސް ސްޕެއިންއަށް ކާމިޔާބު ކުރެވުނު ދެވަނަ ފަހަރުކަން ފާހަގަ ކޮށްލެވެއެވެ.

މިމުބާރާތުގެ ތިންވަނަ މަގާމް ހޯދާފައިވަނީ އިޓަލީވިލާތާއި ބައްދަލުކޮށް ކުޅުނު މެޗު ކާމިޔާބު ކޮށްގެން ކޮލޮމްބިއާއެވެ. ފޯރިގަދަ ކުޅުމެއް ފެނިގެންދިޔަ އެމެޗުގައި ފުރިހަމަ ވަގުތު ހަމަވިއިރު އެއް ލަނޑު އެއް ލަނޑުން ދެޓީމު އެއްވަރު ވުމުން ޕެނަލްޓީ ޖަހައިގެން ކޮލޮމްބިއާއަށް ކުރި ލިބުނީ 4 ލަނޑު 3 ލަނޑުންނެވެ.

މިމެޗުގެ ފުރަތަމަ ލަނޑު ޖަހާ ލީޑު ނަގާފައިވަނީ އިޓަލީވިލާތުންނެވެ. މިލަނޑު ފުރަތަަމަ ހާފު ނިމެން 2 މިނެޓަށް ވެފައިވަނިކޮށް އެޓީމަށް ކާމިޔާބު ކޮށްދިނީ ގިއާޑާ ޕެލެގްރީނޯ ސީމޯއެވެ. އަދި ކޮލޮމްބިއާއިން މިމެޗުގެ ނަތީޖާ ހަމަހަމަ ކޮށްފައިވަނީ މެޗުގެ 61 ވަނަ މިނެޓުގައި ސިންތިއާ ކަބޭޒާސް ކާމިޔާބު ކޮށްދިން ލަނޑުންނެވެ. މިމެޗުގައި އިތުރު ލަނޑެއް ޖެހޭތޯ ދެޓީމުން މަސައްކަތް ކުރި ނަމަވެސް އެކަން ދެޓީމުން ކުރެ އެއްވެސް ޓީމަކަށް ކާމިޔާބު ކުރެވޭގޮތެއް ނުވިއެވެ. ޕެނަލްޓީ ޝޫޓް އައުޓްގައި ކޮލޮމްބިއާއިން ތިން ޕެނަލްޓީ ކާމިޔާބު ކުރިއިރު އިޓަލީވިލާތަށް ކާމިޔާބު ކުރެވުނީ ދެ ޕެނަލްޓީއެވެ.

މިމުބާރާތުގެ އެންމެ މޮޅު ކުޅުންތެރިޔާއަށްދިން އެޑިޑާސް ގޯލްޑަން ބޯލް ލިބިގެންދިޔައީ ސްޕެއިންގެ މެދުތެރެއިން މޮޅު ކުޅުމެއް ދެއްކި ރޮސާލިއާ ޑޮމިންގޭޒް އަށެވެ. އަދި ސިލްވަރ ބޯލް ލިބުނީ އުތުރު ކޮރެއާގެ ރީ ކުކް ހިޔަންގ އަށެވެ. އަދި ބްރައުންޒް ބޯލްގެ އިތުރުން އެންމެ ގިނަ ލަނޑު ޖަހައިގެން ގޯލްޑަން ބޫޓު ލިބިގެންދިޔައީ ސްޕެއިންގެ ޕައު ކޮމެންޑާޑޯ އަށެވެ. އޭނާ ވަނީ މިމުބާރާތުގައި 6 ލަނޑު ކާމިޔާބު ކޮށް އެއް އެސިސްޓު ކޮށްފައެވެ. އަދި މުބާރާތުގެ އެންމެ މޮޅު ގޯލް ކީޕަރަށް ދޭ ގޯލްޑަން ގްލޯވް ލިބިގެން ގޮސްފައިވަނީ މިމުބާރާތް ސްޕެއިން އަށް ކާމިޔާބު ކޮށްދިނުމުގައި މުހިންމު ދައުރެއް އަދާކުރި ލައިއާ ލޯޕޭޒްއަށެވެ. އަދި މިމުބާރާތުގެ ފެއަރ ޕްލޭ ޓީމަކަށް ހޮވުނީ އެމެރިކާގެ ޓީމެވެ.