ހުޅުމާލެ ޔޫތް ސިޓީއެއްގެ ގޮތުގައި ނުވަތަ ޒުވާނުންގެ ސިޓީއެއްގެ ގޮތުގައި ތަރައްޤީކުރެއްވުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އެންމެ ބޮޑު ތަޞައްވުރެވެ. ޔޫތް ސިޓީއެއްގެ ގޮތުގައި ހުޅުމާލެ ތަރައްޤީކުރެއްވުމަށް ގިނަ ކަންތައްތަކެއް ސަރުކާރުން ވަނީ ރާއްވަވާފައެވެ. އެގޮތުން ޔޫތް ސިޓީއެއްގައި ހިމެނޭ މައިގަނޑު ބައިތައް ފުރިހަމަކުރެއްވުމަށްޓަކައި ގިނަ މަސައްކަތްތަކެއް ގެންދަވަނީ މިހާރުވެސް ހުޅުމާލެގައި ކުރައްވަމުންނެވެ. މީގެތެރޭގައި ތަރައްޤީއާ ގުޅުންހުރި ބޮޑެތި މަޝްރޫޢުތައްވެސް ހިމެނެއެވެ.
ކުޅިވަރާއި މުނިފޫހިފިލުވާނެ ނުވަތަ ސްޕޯޓްސް އެންޑް ރެކްރިޝިއޭޝަނަލް ޙަރަކާތްތައް ކުރިއަށް ގެންދެވޭނެ ވަޞީލަތްތައް ހުޅުމާލެގައި ޤާއިމްކުރެއްވުމަކީ މިގޮތުން ސަރުކާރުން އެންމެ އިސްކަމެއްދެއްވާ އެއްކަންތަކެވެ. ޒުވާނުންގެ ދުޅަހެޔޮކަމަށްޓަކައި ސަރުކާރުން ކުރައްވާ މިމަސައްކަތުގެ ތެރެއިން އެންމެ ފާހަގަކޮށްލެވެނީ ހުޅުމާލެގައި ތަރައްޤީކުރެއްވުމަށް ހަމެޖެހިފައިވާ ނޭޝަނަލް ސްޕޯޓްސް ކޮމްޕްލެކްސް ނުވަތަ ޤައުމީ ކުޅިވަރު އެކުވެންޏެވެ. ފަސް ހެކްޓަރުގެ ބޮޑު ބިމެއްގައި ތަރައްޤީކުރައްވާ މިއެކުވެނި ތަރައްޤީކުރެއްވުމަށް ހަ ސަތޭކަ ސޯޅަ ޕޮއިންޓް އަށެއް މިލިއަން ރުފިޔާ ޚަރަދުވާނެއެވެ.
img:http://s1.psmnews.mv/images/660x400/14613356677461.jpg|ހުޅުމާލެ ތަރައްޤީކޮށް ނިމުމުން އޮންނާނެ ގޮތުގެ ކުރެހުމެއް / ފޮޓޯ: އެޗްޑީސީ
ކޮންޓްރެކްޓަރ ފައިނޭންސް އުޞޫލުން ހިންގަވާ މި ބިޔަ މަޝްރޫޢުގެ މަސައްކަތް ފެއްޓެވުމަށްޓަކައި ސޮއިކުރައްވަންޖެހޭ އެއްބަސްވުންތަކުގައި ސަރުކާރުންނާއި މަސައްކަތް ކުރާ ކުންފުނިން މިއަދު ވަނީ ސޮއިކުރައްވާފައެވެ.
ހޮޓެލް ޖެންގައި ބޭއްވެވި ރަސްމިއްޔާތެއްގައި މިކަމާގުޅޭ ދެ އެއްބަސްވުމެއްގައި ސޮއިކުރެއްވިއެވެ. ފުރަތަމަ އެއްބަސްވުމަކީ މިކަމާގުޅޭ ފައިސާއާ ހަމަޖެއްސެވުމުގެ އެއްބަސްވުމެވެ. މިއެއްބަސްވުމުގައި ސޮއިކުރެއްވީ ޔޫތް މިނިސްޓްރީގެ ފަރާތުން މިނިސްޓަރ އިރުތިޝާމް އާދަމާއި އެޗް.ޑީ.ސީގެ ފަރާތުން މެނޭޖިންގ ޑިރެކްޓަރ މުޙައްމަދު ސައިމަން އަދި ފިނޭންސް މިނިސްޓަރ އަޙުމަދު މުނައްވަރެވެ.
ސްޕޯޓްސް ކޮމްޕްލެކްސް ތަރައްޤީކުރުމުގެ މަސައްކަތް ސަރުކާރުގެ ފަރާތުން ޙަވާލުކުރީ ބައިނަލްއަޤްވާމީ ކުންފުންޏެއް ކަމަށްވާ އޭޓީޖީ މެނޭޖްމަންޓް ކޮންސަލްޓިން އެންޑް ކޮންޓްރަކްޝަން ސާވިސަސް ލިމިޓެޑާއެވެ. މިކަމާގުޅޭ އެއްބަސްވުމުގައި ސޮއިކުރެއްވީ އެޗްޑީސީގެ މެނޭޖިންގ ޑިރެކްޓަރ މުޙައްމަދު ސައިމަންއާއި އޭޓީޖީގެ ޑިރެކްޓަރ މުއްރަތު ޓަރކޫލޫއެވެ.
img:http://s1.psmnews.mv/images/660x400/14791340005117.jpg|ސްޕޯޓްސް ކޮމްޕްލެކްސް ތަރައްޤީކުރެއްވުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން / ފޮޓޯ: ޕީއެސްއެމް
މިއެއްބަސްވުމުގެ ދަށުން ހުޅުމާލެގައި ތަރައްޤީކުރާ ސްޕޯޓްސް ކޮމްޕްލެކްސްގައި ބައިނަލްއަޤްވާމީ މިންގަނޑުތަކާ އެއްގޮތްވާ ގޮތުގެ މަތިން ކުޅިވަރު ކުޅެވޭ ފެންވަރުގެ ކޯޓުތަކެއް ތަރައްޤީކުރައްވާނެއެވެ. މީގެތެރޭގައި ބެޑްމިންޓަން، ބާސްކެޓްބޯލް، ނެޓްބޯލް، ވޮލީ ބޯލް، ހޭންޑްބޯލް، ފުޓްސަލް އަދި ޓޭބަލް ޓެނިސް ކޯޓުތައް ތަރައްޤީކުރެވިގެންދާނެއެވެ. މީގެ އިތުރުން ޖިމްއާއި އެރޯބިކްސް އަދި ބައުލިން އޭރިއާއަކާއި ބިލިއާޑް ކުޅޭނެ ތަންތަނާއި ފުޑް ކޯޓެއްވެސް މިއެކުވެނީގައި ތަރައްޤީކުރެވިގެންދާނެއެވެ.
ހުޅުމާލެ ސްޕޯޓްސް ޑިސްޓްރިކްޓްގައި ތަރައްޤީކުރައްވާ މިއެކުވެނީގައި ކުޅިވަރުކުޅޭ ތަންތަނުގެ އިތުރުން ފަރުވާދޭ ތަންތަނާއި ކުޅިވަރާބެހޭ ކްލިނިކެއް ހިމެނޭނެއެވެ. އަދި މުބާރާތްތަކަށް އަންނަ ފަރާތްތަކަށް ހުރެވޭނެ އެޕާޓްމަންޓްތަކެއްވެސް މިތަނުގައި ތަރައްޤީކުރުމަށް މި އެއްބަސްވުމުގައިވެއެވެ.
މި އެއްބަސްވުންތަކުގައި ސޮއިކުރެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ޔޫތް މިނިސްޓަރ އިރްތިޝާމް އާދަމް ވިދާޅުވީ ރައީސް ޢަބްދުﷲ ޔާމީން، ޒުވާނުންނަށް ކުޅިވަރު ކުޅެވޭނެގޮތް ހައްދަވައިދެއްވުމުގެ ގޮތުން ހިންގަވާ މިބިޔަ މަޝްރޫޢުގެ ސަބަބުން ކުޅިވަރު އެސޯސިއޭޝަންތަކަށް ދިމާވެފައިވާ ވަސީލަތްތަކުގެ ދަތިކަމަށް ޙައްލެއް ލިބިގެންދާނެކަމަށެވެ. އަދި މިމަސައްކަތް 2018 ވަނަ އަހަރުގެ ކުރިން ނިންމާލެވޭނޭކަމުގެ އުއްމީދު އެބައޮތްކަމަށް މިނިސްޓަރ ވިދާޅުވިއެވެ.
img:http://s4.psmnews.mv/images/660x400/14636741202673.jpg|ހުޅުމާލެ ދެވަނަ ފިޔަވަހީގެ ދަށުން ހިއްކި ބިން / 5 ހެކްޓަރުގެ ބިން ޚާއްސަކޮށްފައިވަނީ ކުޅިވަރާއި މުނިފޫހިފިލުވުމަށް
މި ރަސްމިއްޔާތުގައި ވާހަކަފުޅު ދައްކަވަމުން ހައުސިންގް ޑިވަލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވީ ހުޅުމާލޭގައި ހެއްދެވުމަށް ހަމަޖެހިފައިވާ މި ސްޕޯރޓްސް ކޮމްޕްލެކްސްއަކީ ގިނަ ކުޅިވަރުތަކެއް އެއްތަނަކުން ކުޅެވިގެންދާނެ ބޮޑު ކޮމްޕްލެކްސްއެއް ކަމަށާއި ހުޅުމާލޭގައި ހުރި ހުސްބިންތަކުގައި ހެދިގެންދާ މިކަހަލަ ވަޞީލަތްތަކުގެ ސަބަބުން ޒުވާނުންނަށް ގިނަ ފައިދާތަކެއް ކުރާނެކަމަށެވެ. އަދި ހުޅުމާލޭ ދެވަނަ ފޭސްގެ މަސައްކަތް ނިމޭއިރު ހުޅުމާލެއަކީ ޔޫތް ސިޓީކަން ވަރަށް ރަނގަޅަށް ފެންނަން އޮންނާނެކަމަށް މުޙައްމަދު ސައިމަން ވިދާޅުވިއެވެ.
ހުޅުމާލޭގައި ނޭޝަނަލް ސްޕޯޓްސް ކޮމްޕްލެކްސްއެއް ތަރައްޤީކުރެއްވުމުގެ މަސައްކަތް ފަށްޓަވާފައިވާއިރު، ހުޅުމާލެގައި މިހާރުވެސް ޒުވާނުންނަށް ކުޅިވަރު ކުޅެ، މުނިފޫހިފިލުވުމަށް ގިނަ ވަޞީލަތްތަކެއް ސަރުކާރުން ވަނީ ޤާއިމްކުރައްވާފައެވެ. އަދި މިހާރުވެސް ޔޫތް ޕާކެއް ހުޅުމާލެ ފޭސް އެކެއްގައި ތަރައްޤީކުރައްވަމުންދާއިރު، ބައިނަލްއަޤްވާމީ ފެންވަރުގެ ފުޓްބޯޅަ ދަނޑެއް ޤަތަރު ސަރުކާރުގެ އެހީއާއެކު ހުޅުމާލޭގައި ތަރައްޤީކުރެއްވުމަށް ނިންމަވާފައިވާކަންވެސް ސަރުކާރުން މިހާރު ވަނީ އިޢުލާންކުރައްވާފައެވެ.