އައްޑޫ ސިޓީން ޕީޕީއެމާ އަލަށް ގުޅުނު 700 މެންބަރުންގެ ފޯމް ޕީޕީއެމްގެ މުސްތަޝާރު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އަރުވައިފިއެވެ.
މިކަމަށްޓަކައި މިއަދު ސްޓެލްކޯގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ޕީޕިއެމްގެ ނައިބުރައީސް ޓޫރިޒަމް މިނިސްޓަރ މޫސާ ޒަމީރު ވިދާޅުވީ، ޕީޕީއެމަށް މެންބަރުން އިތުރުކުރުމަށް ކައުންސިލް އިންތިޚާބުގައި އެޕާޓީގެ ފަރާތުން ވާދަކުރާ ކެނޑިޑޭޓުން ކުރާ މަސައްކަތް ކާމިޔާބުކަމަށެވެ. މެންބަރުން އިތުރުކުރުމަށް ކުރަމުންދާ މަސައްކަތަކީ ކުރިއަށް އޮތް ކައުންސިލް އިންތިޚާބު ތަނަވަސް އަޣުލަބިއްޔަތަކުން ކާމިޔާބު ކުރުންކަމަށް މިނިސްޓަރ ވިދާޅުވިއެވެ.
އައްޑޫއިން ގިނަޢަދަދެއްގެ މެންބަރުން ޕީޕީއެމާ ގުޅުމަކީ އެޕާޓީއަށް ލިބުނު ކާމިޔާބީއެއްކަމަށް ޒަމީރު ވިދާޅުވިއެވެ. އަދި ޕީޕީއެމަށް މެންބަރުންގެ އިތުރުކުރުމަށް ކުރަމުންދާ މަސައްކަތްތަކަށް ކުރިއަށްއޮތް ދެހަފްތާއެއްހާ ދުވަހުގެ ތެރޭގައި އިތުރު ކާމިޔާބީތަކެއް ލިބިގެންދާނެކަމަށް ޕީޕީއެމްގެ ނައިބުރައީސް ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން އައްޑޫ ސިޓީގައި ހިމެނޭ ޕީޕީއެމަށް ނިސްބަތްވާ ކައުންސިލަރުން ވަނީ ސަރުކާރުން އައްޑޫސިޓީގެ ތަރައްޤީއަށް ކުރައްވަމުން ގެންދަވާ މަސައްކަތައް ފާހަގަކޮށް ޝުކުރު ޢަދާކުރައްވާފައެވެ.
މިއަދުގެ ރަސްމިއްޔާތުގައި ޕީޕީއެމާ އަލަށް ގުޅުނު 700 މެންބަރުންގެ ފޯމް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާ ޙަވާލުކުރެއްވީ އައްޑޫ ސިޓީ ކައުންސިލްގެ އެކި ދާއިރާތަކަށް ވާދަކުރައްވާ ޕީޕީއެމްގެ ކެނޑިޑޭޓުންނާއި، އައްޑޫ ސިޓީގެ އެކި ރަށްތަކަށް ނިސްބަތްވާ ޒުވާނުންމެވެ.