ސަޢޫދީ ޢަރަބިއާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢުދު ރަސްމީ ދަތުރުފުޅެއްގައި އަންނަމަހު ރާއްޖެވަޑައިގަންނަވާނެއެވެ.
ސަޢޫދީ ގެޒެޓްގައި ވާގޮތުން އަންނަ މަހުގެ ތެރޭގައި ސައުދީ ރަސްގެފާނު 5 ޤައުމަކަށް ރަސްމީ ދަތުރުފުޅެއް ކުރައްވާނެއެވެ. އޭގެތެރޭގައި ހިމެނެނީ އިންޑޮނޭޝިއާ، ޖަޕާން، ޗައިނާ، މެލޭޝިއާ އަދި ދިވެހިރާއްޖެއެވެ.
މިއީ ސަޢޫދީގެ މިހާރުގެ ރަސްގެފާނު ސަލްމާން ބިން ޢަބްދުލްޢަޒީޒް ރާއްޖެ ވަޑައިގަންނާ 3 ވަނަ ފަހަރެވެ. ކުރިން އެމަނިކުފާނު ރާއްޖެވަޑައިގެންފައިވަނީ ސަޢޫދީ އަރަބިޔާގެ ރިޔާޟްގެ ގަވަރުނަރަކަށް ހުންނެވިއިރު 15 އޭޕްރީލް 2010ގައެވެ. އަދި އެއަށްފަހު ސަޢޫދީގެ ކްރައުން ޕްރިންސަކަށް ހުންނެވިއިރު 2014 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުވެސް އެމަނިކުފާނު ރާއްޖެ ވަޑައިގެންފައިވެއެވެ.
އެހެންނަމަވެސް މިއީ ސަޢޫދީގެ ރަސްގެފާނަކު ރާއްޖެ ވަޑައިގަންނަވާ ފުރަތަމަފަހަރެވެ. ސަޢޫދީ ރަސްގެފާނުގެ މިދަތުރުފުޅަކީ އިރުމަތީ އޭޝިއާގެ ޤައުމުތަކާއެކު ގުޅުން ބަދަހިކުރެއްވުމަށް ކުރައްވާ ދަތުރުފުޅެއްކަމަށް ސަޢޫދީ ގެޒެޓްގައިވެއެވެ.
ދިވެހިސަރުކާރުން ގެންދަވަނީ ސަޢޫދީ ޢަރަބިއާއާއެކު ޚާރިޖީ އަދި އިޤްތިޞާދީ ގުޅުން ބަދަހިކުރައްވަމުންނެވެ. އަދި ރައީސުލްޖުމްހޫރިއްޔާ ފ. އަތޮޅަށް ކުރެއްވި ދަތުރުފުޅެއްގައި އެމަނިކުފާނު ވަނީ ސަޢޫދީ ސަރުކާރުން ފ. އަތޮޅުގައި ބިޔަ މަޝްރޫޢެއް ފެއްޓެވުމަށް ތައްޔާރުވެވަޑައިގަންނަވަމުން ގެންދަވާކަމުގެ އިޝާރާތެއް ކުރައްވާފައެވެ. ސަޢޫދީ ސަރުކާރުން ވަނީ އެކި ފަހަރުމަތިން ދިވެހިރާއްޖެއަށް މާލީ އެހީތެރިކަން ފޯރުކޮށްދެއްވާފައެވެ. އެގޮތުން އިޤްތިޞާދީ ބޮޑެތި މަޝްރޫޢުތަކަށާއި، ދިވެހިރާއްޖޭގެ ތަޢުލީމީ ދާއިރާއަށް ސަޢޫދީ ޢަރަބިއާއިން އެހީތެރިވަމުންގެންދަވައެވެ.