ތަމްރީން ދަތުރެއްގައި ފިޔަވަތީގެ މުވައްޒަފުންތަކެއް މެލޭޝިއާގައި

މެލޭޝިއާގައި ކުރިއަށްދާ އާރލީ ޗައިލްޑްހުޑް އެޑިއުކޭޝަން ތަމްރީން ޕްރޮގްރާމެއްގައި ފިޔަވަތީގެ މުވައްޒަފުން ބައިވެރިވެއްޖެއެވެ.

މެލޭޝިއާގެ ކުއަލަލަންޕޫރުގައި މިހާރު ކުރިއަށްދާ މި ތަމްރީނު ޕްރޮގްރާމުގައި ފިޔަވަތީގެ 5 ޓީޗަރުންނާއި މުވައްޒަފުން ދަނީ ބައިވެރިވަމުންނެވެ. އާރލީ ޗައިލްޑްހުޑް އެޑިއުކޭޝަން ޕްރޮގްރާމެއް ހިންގަވަނީ ފިޔަވަތީގައި ދިރިއުޅޭ 2 އަހަރާއި 5 އަހަރާ ދެމެދުގެ ކުދިން ޕްރައިމަރީ ސްކޫލަށް ތައްޔާރުވުމަށް އެހީތެރިވުން ކަމަށް ޖެންޑަރ މިނިސްޓްރީން ވިދާޅުވެއެވެ.

މި ތަމްރީނު ޕްރޮގްރާމް ކުރިއަށްގެންދަނީ ޕާރމަޓާ މެލޭޝިއާގެ ފަރާތުންނެވެ. ޖެންޑަރ މިނިސްޓްރީން ވިދާޅުވީ ދައުލަތުގެ ބެއްލެވުމުގެ ދަށުގައި ތިބޭކުދިންގެ ދުޅަހެޔޮކަން އިތުރުކުރުމަށްޓަކައި، މިފަދަ އިތުރު ތަމްރީން ޕްރޮގްރާމްތައް ބައިނަލްއަޤްވާމީ އެކި ފަރާތްތަކާއި ގުޅުގެން ކުރިއަށް އޮތްތަނުގައިވެސް ކުރިއަށްގެންދަވާނެ ކަމަށެވެ.

ހުޅުމާލޭގައި ހުންނަ މިނިސްޓްރީ އޮފް ޖެންޑަރ އެންޑް ފެމިލީގެ ކުދިން ބަލަހައްޓާ މަރުކަޒު ކަމުގައިވާ ފިޔަވަތީގައި 10 އަހަރުން ދަށުގެ 85 ކުދިން ދިރިއުޅެމުންދެއެވެ.