ސަޢޫދީ ސަރުކާރުން ދިވެހިރާއްޖޭގައި ކުރެއްވުމަށް ނިންމަވާފައިވާ އިންވެސްޓްމެންޓްތަކާއި، ދެއްވުމަށް ހަމަޖެހިފައިވާ އެހީތަކާ ގުޅޭ މަޝްވަރާތައް ހުއްޓުމެއްނެތި ކުރިއަށްދާކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
ޕީޕީއެމުން ބޭއްވި ޖަލްސާއެއްގައި ވާހަކަދައްކަވަމުން އެމަނިކުފާނު ވިދާޅުވީ ސަޢޫދީ ޢަރަބިއްޔާއިން ރައްޖޭގައި ކުރެއްވުމަށް ނިންމަވާފައިވާ ބިޔަ އިންވެސްޓްމެންޓްގެ މަސައްކަތް ކައިރި މުސްތަޤްބަލެއްގައި ފެށިގެންދާނެކަމަށެވެ.
މަވެސް ޕީޕީއެމްގެ ނަމުގައި، ޕީޕީއެމަށް އަލަށްގުޅުނު މެންބަރުންގެ ފޯމް ޙަވާލުކުރެއްވުމަށް ދަރުބާރުގޭގައި ބޭއްވެވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރައީސުލްޖުމްހޫރިއްޔާގެ މަޤާމުގެ ޒިންމާ އަދާކުރެއްވުމުގައި ޤާނޫނީ ހަމަތަކުގެ ބޭރުން މަސައްކަތް ނުކުރައްވާނެކަމަށާއި، ދައުލަތުގެ މުއައްސަސާތަކަށް ފުރިހަމައަށް އިތުބާރު ކުރައްވައި، މުއައްސަސާތަކަށް ދޭންޖެހޭ އިޙްތިރާމާއި ޤަދަރު ދެއްވާނެކަމަށެވެ. އަދި ޝަރުޢީ ދާއިރާގެ މިނިވަންކަން ކަށަވަރު ކުރެއްވުމާ އެކުއެކީގައި ޝަރުޢީ ދާއިރާ ހަރުދަނާ ކުރައްވައި، ކޯޓްތަކުގެ މަސައްކަތްތައް ޙަލުވިކުރެއްވުމަށް މަސައްކަތް ކުރައްވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުން ފ. އަތޮޅުގައި ކުރިއަށްގެންދެވުމަށް ހަމަޖެހިފައިވާ މަޝްރޫޢާ ގުޅޭގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ރާއްޖޭގައި ހިންގޭ އެއްވެސް އިންވެސްޓްމެންޓެއްގައި، ދިވެހިރާއްޖޭގެ ސިޔާދަތާއި، އަމިއްލަވަންތަކަމަށް ނުރައްކާވެދާނެފަދަ އެއްވެސްކަމެއް ނުހިމެނޭނެކަމަށެވެ. އަދި ސަޢޫދީ ސަރުކާރުން ދިވެހިރާއްޖެއަށް ހަމަޖެހިފައިވާ އެހީތަކާއި އިންވެސްޓްމެންޓްތަކުގެ މަސައްކަތް ހުއްޓުމެއްނެތި ކުރިއަށްދާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ އިދިކޮޅު ފަރާތްތަކުން ދައްކަމުންދަނީ ސަރުކާރާމެދު ޙަސަދަވެރިކަން ކަމަށާއި، ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލައަކީވެސް އެ ޙަސަދަވެރިކަމުގެ ތެރެއިން ހުށައަޅާފައިވާ މައްސަލައެއްކަމަށެވެ. އަދި މިއީ ސިޔާސީ ގޮތުން ސަރުކާރަށް ދަތިކުރުމުގެ މަޤްޞަތުގައި ހުށައަޅާފައިވާ މައްސަލައެއްކަމަށް އެމަނިކުފާނު ވިދާޅުވިއެވެ. ރާއްޖޭގައި ހުރި މައްސަލަތަކުގެ ވާހަކަ އިދިކޮޅު ފަރާތްތަކުން ނުދައްކާ ކަމަށާއި، މުޅިންވެސް ދައްކަނީ ސިޔާސީ ވާހަކަކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މިއީ ރައްޔިތުންނަށް ހެޔޮއެދޭ ބަޔަކު ކަންތައް ކުރާނެ ގޮތެއް ނޫންކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ދިވެހިރާއްޖޭގައި ހިންގާ ކޮރަޕްޝަންގެ ޢަމަލުކާގުޅިގެން ދައުލަތުން ގެއްލިގެންދާ ފައިސާ އަނބުރާ ހޯއްދެވުމުމުގެ މަސައްކަތް ކަމާބެހޭ މުއައްސަސާތަކާ ގުޅިގެން ފައްޓަވާފައިވާކަމަށާއި، ކޮރަޕްޝަންގެ ޢަމަލުތަކަކީ ސަރުކާރުން ބަލައިގަންނާނެކަމެއް ނޫންކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި އެމަނިކުފާނުގެ ސަރުކާރުން މަސައްކަތް ކުރައްވަމުން ގެންދަވަނީ ދިވެހިރާއްޖޭގެ މުޅި ނިޒާމު އިޞްލާޙް ކުރެއްވުމަށްކަމަށާއި، މިމަސައްކަތް ކުރީގެ ސަރުކާރުތަކުން ކުރައްވަން ފެއްޓެވިނަމަ މިއަދު ފެނިގެންދާނީ މާ އުޖާލާ ދިވެހިރާއްޖެއެއްކަމަށް ރައީސުލްޖުމްހޫރިއްޔާ ވިދާޅުވިއެވެ.