މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އިން އަޅުއްވަމުންދާ ފިޔަވަޅުތަކަކީ ވަކި ދާއިރާއަކަށް ނުވަތަ ވަކި ފަރާތަކަށް އަމާޒުކުރައްވައިގެން އަޅުއްވާ ފިޔަވަޅުތަކެއްކަމަށް ޤަބޫލުފުޅު ނުކުރައްވާކަމަށާއި، އެއީ އެންމެހާ ފަރާތްތަކާމެދު ހަމަހަމަ އުސޫލަކުން ކުރައްވަމުން ގެންދަވާ މަސައްކަތްތަކެއްކަމަށް ދެކެވަޑައިގަންނަވާކަމަށް ސަރުކާރުން ވިދާޅުވެއްޖެއެވެ.
ވިލާ ކުންފުނިން ދައުލަތަށް ދައްކަންޖެހޭ ފައިސާއާއި ގުޅޭގޮތުން ދެކެވެމުންދާ ވާހަކަތަކާއި ގުޅިގެން ރައީސުލް ޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، މިރާ އިން ކުރައްވާ މަސައްކަތަކީ ޤާނޫނުން އެއިދާރާއަށް ލާޒިމްކުރާ މަސައްކަތްތަކެއްކަމަށެވެ. ރައްޔިތުންނަށްޓަކައި ސަރުކާރުން ކުރިއަށްގެންދަވަން ޖެހިވަޑައިގަންނަވާ މަޝްރޫޢުތަކަށް ފައިސާ ބޭނުންވާ ހިންދު އެފައިސާ ލިބެނީ ދައުލަތައް އާމްދަނީ ލިބިގެންކަމަށާއި، އެއާމްދަނީ ހޯދާ އެންމެ ބޮޑު އެއްދައުރެއް އަދާކުރަނީ މީރާއިން ކަމަށާ، ދައުލަތަށް ލިބެންޖެހޭ ފައިސާ ހޯދުމުގެ މަސައްކައްކަތަކީ މީރާއިން ކުރަންޖެހޭކަމެއްކަމަށް މިނިސްޓަރު ވިދާޅުވިއެވެ.
މީރާއިންއިން ވިދާޅުވެފައިވާ ގޮތުގައި ޓެކްސްއާގުޅޭ 1800 މައްސަލައެއް އެއިދާރާއިން މިހާރުވެސް، ގެންދަވަނީ ބައްލަވައި ފިޔަވަޅުއަޅުއްވަމުންނެވެ. މީގެ ތެރޭގައި ޓޫރިޒަމްދާއިރާގެ 270 މައްސަލަ ހިމެނެއެވެ. ނޫސްވެރިންނަށް މަޢުލޫމާތުދެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ބައްދަލުވުމުގައި ޓޫރިޒަމް މިނިސްޓަރ މޫސާ ޒަމީރު ވިދާޅުވީ، ރިޒޯޓް ތަރައްޤީކުރެއްވުމަށް އަމިއްލަ ފަރާތްތަކަށް ދޫކުރާ ރަށްތަކާއި ފަޅުތައް ތަރައްޤީ ނުކޮށް ހަމައެކަނި އެތަންތަނުގެ ކުލި ދެއްކިޔަސް ސަރުކާރުން ބޭނުންވާ އަމާޒަށް ވާސިލު ނުވެވޭކަމަށެވެ. މިރާއަށް ލިބޭ އާމްދަނީ ދަޢުލަތަށް ވަރަށް މުހިއްމުކަމަށާއި، ޤާނޫނޫން މަތިކޮށްފައިވާ ޒިންމާތައް އެއިދާރާއިން އަދާކުރަނީ ވަކި ފަރާތަކުން ވަކިގޮތަކަށް އަންގައިގެން ނޫންކަމަށްވެސް މިނިސްޓަރު ވިދާޅުވިއެވެ.
img:http://s1.psmnews.mv/images/660x400/14914129413521.jpg|މިނިސްޓަރު އަހުމަދު ޒުހޫރު- ފޮޓޯ: ޕީއެސްއެމް
ރައީސުލްޖުމްހޫރިއްޔާގެ އޮފީހުގެ މިނިސްޓަރ އަޙްމަދު ޒުހޫރު ވިދާޅުވީ، ފިޔަވަޅު އަޅުއްވަންޖެހޭ ވިޔަފާރިތަކާމެދު ފިޔަވަޅުއެޅުއްވުމަކީ ވަކި ދުވަސްވަރަކަށް، ވަކި ވަގުތަކަށް އަމާޒުކުރައްވައިގެން މީރާއިން ކުރައްވާކަމެއްކަމަށް ޤަބޫލުފުޅު ނުކުރައްވާކަމަށެވެ. މާ ކުރިންވެސް އެތައްފަހަރެއްގެ މަތިން ކަންކަން އިޞްލާޙްކުރުމަށް ކަމާގުޅުން ހުރި މުއައްސަސާތަކުން އަންގާފައިވާކަމަށެވެ. ވިލާ ކުންފުންޏާމެދު ސަރުކާރުގެ އިދާރާއަކުން އަޅާ ފިޔަވަޅާމެދު ހިންހަމަނުޖެހޭނަމަ، މިނިވަން އިދާރާތަކާއި، ކޯޓުތަކަށް ވަޑައިގަތުމުގެ މަގުފަހިވެފައިވާކަން މިނިސްޓަރު ޒުހޫރު ވަނީ ފާހަގަކުރައްވާފައެވެ.
17 ކުންފުންޏަކުން ދައުލަތަށް ދައްކަންޖެހޭ ފައިސާ ނުދައްކައިގެން އެފަރާތްތަކާމެދު މީރާއިން ފިޔަވަޅުއަޅުއްވާފައިވީނަމަވެސް، ވިޔަފާރިތަކުގެ ޙައްޤުތަށް ހިމާޔަތްކުރުމަށް އެވިޔަފާރިތަކުގެ ނަން މީރާއިން ހާމައެއްނުކުރައްވައެވެ. އެހެންނަމަވެސް ބައެއް ކުންފުނިތަކުން އަމިއްލައަށް އެފަދަ ކަންކަމާ ގުޅިގެން ސަރުކާރަށް ތުހުމަތުތަކެއް ކުރާނަމަ އެކަމުގެ ޙަޤީޤަތް ހާމަކުރައްވަންޖެހޭކަމަށް ސަރުކާރުން ވަނީ ވިދާޅުވެފައެވެ.